Mataafa Asteeri 5 - Mataafa Qulqulloota

Asteeri akka nuqusa naappatte

¹ Kuyyaata a sessattaatiiyyi Asteeri ka mehaddasene' xaadi a nuqusitteeta kalsatte ka ante ka tikase a nuqusa karaayye kaatasene a nuqusa kara kutiina tura' qa'atte; nuqusa sitiiyyi kaatasene karaayye xarra ture qaa'e.

² Asteeri ete kaatasene a nuqusa tura' qa'atteeyye, nuqusa ka isheettopa tooyyade ka xasoode ka uleetase a warqeeta isheetta' qape; ikka qara qappatte.

³ Nuqusa ka Asteeri' kide, “Ata nuqusiteeta maana'e' deete? Akkan maana ke' kodo' heenta? Kadi punu mankisteetiyyo quda paka takka kaassannittaayye, in ke daasha.”

⁴ Asteeri ka isha oorisse ka kiite, “Oton ike koddiniiyyi, sankulta an harmishe oppopa Haama ollin damta xooyada.”

⁵ Sekkammaayye nuqusa ka akka sankuultase a Asteeri harmisse oppa akkaado'e jarjartan Haama halacciise; ka oori ollin aanen.

⁶ A taadeta wayneeta ika qara caaneeyye, nuqusa ka Asteeri kide, “Ata maana ana qara kaassatta heenta? Kadi punu mankisteetiyyo quda paka takka kaassannittaayye, in ke' daasha.”

⁷ Asteeri ka kiite, “Waan faana ka kaassanna,

⁸ oton ana ulfeesiniiyyi ka waan kaassanna ana' koda heentaayye, parri Haama ollin damtiyyo' xooyaaw. Waan kaassatta heena sitiiyyin ke' lelaay.”

Haama akka Mardekiyoosi ikassa' piisade

⁹ Haama ete damtase oppa xasoottan kallo ka xarra tika nuqusa tura kayeeyye, Mardekiyoosi a eeyye' qaa'e akke; ete kapan tarpinooyye, umma isha in sakatanne; sede ka akata Haama miirasse.

¹⁰ A koddito ma iduupade ka iskara' qapade ka tikopa kale ka moottadaadi kamma erke ka iskatteetaadi Sereshi kuli hale.

¹¹ Ka oori isi peepa paayye ka kuttumta a teyantaadi ka lekuma hellaadi ka nuqusa atta akka isha kuttishe ka orrase a ollin piita mukinaan piisa qaropeela isha jaalshe, piisa ishootta' torre.

¹² Ka kideewwe, “Ata maanan sede patta? Ha Asteeri ana patta nuqusa olli damta' haleete ka parri kuli nuqusa olli ana haleetew.

¹³ Ma xoori oton Yihutittase Mardekiyoosi xarra nuqusa tura akkooyye; ulfeenoose piisa weti'i an dikini an co.”

¹⁴ Iskatteetaadi Sereshi isho moottadaadi piisa ka isha dehaamen ka kidene, “Qoyra a dunduma kunda ken kayo dishe ka akka parri Mardekiyoosi qara siibsamo nuqusa kaassado ka oori xasan nuqusa olli damtaseti aane.” Dehaamtose a isha dehaamen ka harmo Haama xasayshe ikka qoyrase' dishacciise.