Mataafa Asteeri 4 - Mataafa Qulqulloota

Mardekiyoosi akka Asteeri qara qaarqaarsa kaassade

¹ Mardekiyoosi ete sede piisa dakayeeyye, nyarrahatanne isquda mehadda kakkaa'e ka mehadda a dapteeta' kalssade. Ka tara fidade ka ullupitta isho pooytan katamaappandesa pora anni.

² Ma xoori qoota nama mehadda dapteeta kalsade tika nuqusa karopa kullini in kinnin malla, xarroppaaw kaye diisheey tika nuqusa karopa in kulline.

³ Piitadda a oppa ajajoose a nuqusa' salisame pisa oppaayye, Yihutaata akata ullupte ka nyarrahate ka pooyte ka damta kuli musatte. Ishoottoppa lekaya ka mehadda a dapteeta' kalssaden ka isqarandela tara fidaden ka pooyta' kuti'en.

⁴ Sirampayasene a Asteeri isho kunayaasene isheetta tooytina ete qoota Mardekiyoosi desa isheetta' leleneeyye, akata nyarrahate ka akka mehaddasene a dapteeta isquda sooksho ka a paxaara' kalsado'e, ishi mehadda erkite; isha' xoori ishootta qara teyyatta itiite.

⁵ Sekkammaayye, Asteeri ka kunayasene a nuqusa isheetta' daasame, oppaayye takka Hataaki kidammo haleete ka wa Mardekiyoosi qara' kaye ikka malla asse nyarrahana qara qorado'e, isha kapopa erkite.

⁶ Hataaki ka paapahase xarra tika nuqusa tura co oppopa Mardekiyoosi kapopa aane.

⁷ Mardekkiyoosi ka wa isha qara' kaye piisa ishi' torre ka akkima Haama Yihutaata pira'e kaaja a tika nuqusa opa kalissa' xasa daasade kuli ishi' torre.

⁸ Ka akka wa kodde piisa Asteeri' torro'e ka akka anto ka qoota orraayshoti desa nuqusa kapaayye diissata naappatto'e ka warqatoose a saleeta katama Suusa kara' salisamte Asteeri kaytisho'e, Hataaki' daashe ka kokkonnayshe.

⁹ Hataaki ka aane ka wa Mardekiyoosi' kide piisa Asteeri' torre.

¹⁰ Asteeri ka a lammattati Mardekiyoosi kapopa Hataaki erkite ka ishi' kiite,

¹¹ “Akka seera nuqusa mina'e nama a diirta kodde takki a iskatteeta koddite, takka oton a nuqusa isha in haleenin mali nuqusa kapopa kullaayye, akkima ikannaan, hayyoowwa a nuqusa isho nama dalade piisa upa. Nama oto nuqusa kapopa kullinooyye, a nuqusa uleetase a warqeeta tura' qapo patta toota kela pahani. Umma anti leya kara'e, isha kapopa an halaammeey, attan isha kapopa kulla?”

¹² Mardekkiyoosi ka erkanasene a Asteeri ishi erkite dakaye.

¹³ Ka Asteeri erkanoosen erke ka kide, “Aane ka Asteeri' kide, ‘Atti' qoota tika nuqusa kara kalto malla, rakkoose Yihutaata qara' kayto kela in paha in kidan ka in dikadan.

¹⁴ Oton seppa jaw kiitaayye, qaarqaarsa Yihutaata pora pilaatiiyyi de'an, ishootta ka pahan ma xoori atti ittoota, toolaayshin ka qita. Ma ata ayno upa, takka punu a rakkoose kela inon paha malla nuqusitteeta koddite?’”

¹⁵ Asteeri ka Mardekiyoosi oorisse ka kiite,

¹⁶ “Aane ka Yihutaata katama Suusa kara kalto piisa ollopa xaashe ka kuyyaata sessa ka halkeetta sessa kara'e, damta musada; umma we in daman ka in ikkan ka qootiyyo desa qinsada; ana isho orxayasene' xayyo a iskatta asseewwen ollin damta musannaay; sekkammaayye kadi punu seera dawrina nefooyye, nuqusa kapopa in kulla ka oton toota koddini nefooyye alle' to'a.”

¹⁷ Mardekkiyoosi ka aane ka wa Asteeri ishi' kiite piisa kode.