Mataafa Asteeri 2 - Mataafa Qulqulloota

Asteeri akkima nuqusitteeta koddite

¹ Nuqusa kadi punu kammopa miirase' xaadi harfisade nefooyye, Astiini dapa koote ka wa dapaadi minan isheetta qara' murame, oppaaw dikanni.

² Sekkammaayye hayyowwasene nuqusa quda' deha ka ishi' kidene, “Tuparra a issin ca ka xarjaalluma qapa a nuqusa' fadamen;

³ piitadda a' mukinnitta kara orra a tuparra xarjaalluma qapa ke' reexo shuume ikka katamasene a Suusa kara porase a oppa iskatta ke' reexxame kalo oppopan de'en. Tuparrosen ka harkase a kunaytase Heka kidammo ka iskattaayti tooytino oppa' xaayamen; sira isho wa heenaane' piisa ka ishootta' daasamen.

⁴ Ka ishootta oppaayye enenta a akata jaalatte heme; ikka pakka Astiini oppa'e, nuqusitteeta koddito.” Dehaamtoose ka nuqusa xasayshe ikka akkimoose a kiden qara' kode.

⁵ Sitiiyyi Yihutitta takka a kafa Piiniyaami kodde ka sanynyeeta Qiisi isho a Seme'i oppa dalade, Mardekiyoosi kidammo ca; isha inna Ya'iri ka katama Suusa kara kala.

⁶ Mardekiyoosi, orrase a Naapukedenasoori nuqusase a Paapilooni Yursaalami kara Ikkoniyaani nuqusa Yihuta ollin pooje oppa takka.

⁷ Mardekiyoosi enenta inna opa aappaayshooti Asteerise afaa Iprutin Hadaassa kidammitto, a aappaaysho isho aayyaasso qara le'en ikka a enentaadi' mina' qohanno qapa; isheetta shorqa pahata ka akata xarjaallitteeta.

⁸ Ete saleetase a nuqusa' salisamteeyye, Asteeri ka tuparra lekaya olliiyyi katama Suusa opa qeedamte ka namase Hekaayi kidammo ka tikase a nuqusati tuparra reexxame' tooytino' daasamte.

⁹ Asteeri' qootan xarjaallitteeta malla, xasa Hekaayi' dakaade ikka isheetta ulfeesse ka ennow wa issin sirta ka tuparra isheetta quda sira tappa ka damta isheetta parpaaccisnitto piisa ollin ishi' daashe ka tikkasene a iskatta reexxame kara kallaanna oppa tika akata paxaara isheetta' daashe.

¹⁰ Asteeri akka Mardekiyoosi isheetta dehaame qara'e, akka sanynyeeta a Yihuta' koddite, eeyye iskara' qapatte.

¹¹ Mardekiyoosi wa Asteeri oppa kitta ka maana akkima isheetta qara' kayan upnaatta'e, awta piisa tikase a iskatta kara co turandesa pora a'anni ka qara dakkayssanni.

¹² Tuparrosen takka takka matta mina'e a nuqusa kapopa in kullinin turanne haka leya lehiti'i, sayteeta karpeetinni quda shohammi ka haka leya lehiti'iw shittoota ika lekayteetan quda daatammi. Ikka oori para kammaayye tara taraan nuqusa kapopa kullini.

¹³ Oto tikase a tuparra reexxameeti kara sooknitto ka nuqusa kapopa annittooyye, mehadda a faanitta piisa isheetta' daassammi.

¹⁴ Enenta a taraadi kayte nuqusa kapoopa halkeette kalli ka parraytaadiiyyi tika a iskatta turan nuqusa kapopa aane kara kallaanno a kunaytase Sha'ishakaasi kidammo ishootta tooytino opa qeedammi; enenta a nuqusa maxxaadin lammatta isi kapopa in halaccisnin oori lammatta isha kapopa tiitaawni in kitto.

¹⁵ Asteerise a Apihaali a Mardekkiyoosi' qohanno, ete kuyyaata oppa nuqusa kapopa kullitto kayteeyye, mehaddasene a kunaytase tuparra reexxame tooytino Hekaayi isheetta' daashe maliiyyi a pila in teyyanne. Nama isheetta akkino piisa ka isheetta peepni.

¹⁶ A Artekisiisi nuqusumeeyye para tappattatiiyyi leyase a kundatta Tepeeti kidammo oppaayye, Asteerikka nuqusa kapoopa qeedamte.

¹⁷ Nuqusa ka tuparrasene reexame piisa qaropeela Asteeri jaalade ka isheetta ulfeesse. Isha nefo ka kulleetase iskatteeta nuqusa isheetta qara kalshe ikka pakka Astiini oppa'e nuqusumte.

¹⁸ Sekkammaayye nuqusa ka Asteeri ulfeessa'e sankulta kode ka oppopa mukissampaya piitadda isho orrase isha olli piita mukinno hale ka piitadda a mukinna' pisa oppa kuyyaase akka kuyyaata xaysonessuma koddito salishe ka akka kolluma nuqussa' mina'e, orra' daassawwa daashe.

Akka Mardekiyoosi' toota kela nuqusan pahe

¹⁹ A tuparrasene lammatta olopa de'eneeyye, Mardekiyoosi sitiiyyi tika nuqusatiiyyi koda mukissa' kooni.

²⁰ Asteeri akka xattaaw dehaamta Mardekiyoosi dakaynitto mina'e, amma nefo dehaamtaadi teyyatte ka akka sanynyeeta Yihuta oppa dalatte nama takka nefo in lellin.

²¹ Mardekiyoosi a tika nuqusatiiyyi koda mukissa' koonooyye, kunayasene xarra nuqusa tooytina oppaayye, Pikitaani isho Taareshi imiirooden ka nuqusa ishshaata suladen.

²² Mardakiyoosi ka sullaase xaaysho upnaade ka Asteeri' lele, Asteeri ka akka Mardekkiyoosi qara dakayte nuqusa lelte.

²³ Ete sullaase qoreneeyye, ikka dukaata koddite; kunayasene lakki ka oori fannisamen sede ka akka nuqusa kapadesa maskapa nuqussa qara' puusamto' kodamte.