Mataafa Asteeri 1 - Mataafa Qulqulloota

Nuqusitteetase Astiini akka ulfeenaadi qara pi'ite

¹ Xattaayye nuqusa takka Arteksiisi kidammo piita Hinditi paayyatte haka piita Toobbiyaati piitadda dippa ka kunda lakki tappa mukinni.

² Sitiiyyi nuqusoose Arteksiisi, katama Suusa kidammati kala ka eyye desa piitaddoosen mukinni.

³ Nuqusoose Arteksiisi a mukissa paayyeeyye para sessattatiiyyi, mukissampaya piitadda isho orrase isha olli piita mukinno'e sankulta kode ka damtose oppopa saarra xela oranna a piita Faarisi isho a Medooni piisa ka saarra piitadda isho mukissampaya hale.

⁴ Ka haka leya lehiti'i, teyanta a qapo ka kutumta ulfeena a nuqusumaadi ishootta akkishe.

⁵ Sekkammaaw nuqusase Arteksiisi eenna tikaadi a mankisteeta kara'e teyantoolaya ka teekolaya a katama Suusa kara kala piisa'e, sankulta kode sankultose ka haka torpaati' jarte.

⁶ Pora a sankulseeti nefo, harmo'e sirame opanka ohaata a ilaawa isho a ata qussa quda' kaaranta' koden, wataroota a quda kaarantaddosen raken jifeeta a warqeeta oppa kodamte karanne kukullishen. Ka tuudda a paltittoppa kodame quda' hiden; loshshada mukitta warqeeta ka sipla dakaratinni kodamen ka pora wa ata ka a tiima ka a ilumta heeneetin daatene ka sirene qara' xaayamen.

⁷ Ikkayta ka kuppaayyadda a warqeetoppa kodame ka oli in pahanini oppa qootammi. Taadetoose a wayneeta' qoota tupa xata faaramte malla, nuqusa akka nama piisa mina desa iko'e ajaaje.

⁸ Nama piisa ka akka ishi aakto qara mina desa ikni.

⁹ Sitiiyyi, iskatteetase a nuqusa Astiini kuli ka tikase a nuqusa kara'e, iskatta' sankulta harmisseew.

^10-11 A damtoose' paayyatte kuyyaata a tappattatiiyyi, nuqusa Arteksiisi ete ike xasa ka ishi' dakaannooyye, nuqusitteetase Astiini qoota xarjaallitteeta koddite malla, mukissampaya piitadda isho orrase isha olli piita mukinno akka xarjaallumaadi rukan fade ka kunayaasene a orxaya tappa, isasene Mahumaan ka Piisitta ka Harpoona ka Pikita ka Apaakita ka Setaari isho Kaarkaasi kidamma hale ka ishootta' kide, “Aana Astiini hala ka ishi' kida, ‘A mehadda isho kulleeta a iskatteeta nuqusa koddeetaadi kalsatto ka deeto.’”

¹² Ma xoori ete isheetta' leleneeyye, nuqusa kapopa deena tiitte. Sede ka nuqusa tanasse ikka akata miirode.

¹³ Nuqusa xattaaw turan qoota seera ka a aataati desa, hayyowwa qara paata qoratta kollinsade malla, kuyyaasetiiyyi maana akkima kodo upnaatta'e, hayyowwa halacciise.

¹⁴ Hayyowwasene a nuqusa halacciise nefo tanynyadasene a Faarisi ka a Medooni tappa isasene turanneew mukissampaya kodde. Ishootta nefo Kaarshana ka Shetaari ka Admaata ka Taarshiishi ka Meeresi ka Maarsena isho Mamuukaani kidammi.

¹⁵ Ikka ishootta kaassade ka kide, “Ha anti mattiyyo'en akka deeto'e Astiini kamma orxayaayyo erke; ikka deena tiitteey, akka seera kiino mina'e atta isheetta kodan?”

¹⁶ Hayyoowwasene oppaayye takka Mamuukaani kiinaan ka haasa qeede ka kide, “Ha, nuqusitteese Astiini nuqusa patta in jeerinne ma mukissampaya piitadda ka orrase isha olli piita mukinno isho diira piitaddoosen a nuqusa mukinno oppa ca piisa jeerisse.

¹⁷ Semmalla arepa desa oton iskatta wa nuqusitteese Astiini koote dakayaayye, diirraasso'e puyadan ka kidane, ‘Atana nuqusitteetase Astiini kuli a nuqusase Arteksiisi isheetta haleenooyye qara' tiite?’

¹⁸ Iskatta mukissampaya a piita Faarisi ka a Medooni a sede dakaye, asseew diirraasso' puyatta paayya, miira isho peeqqa ka tikkaappa' koopan.

¹⁹ Semmalla nuquso, oton i''owsanniiyyi, nuqusitteese akka arepa desa lammatta ke kapopa in deenini'i, saleeta dawsiise ka sede akka seerase a Faarisi isho a Medooni pursammi in kinnin oppa' taafamto' kode. Ka ulfeenase a nuqusitteeta koddeetaadi qaraayye qeede ka iskatteeta a isheetta desa aakto' daashe.

²⁰ Oton saleetose piita a nuqusa mukinno piisa oppa' salisamaayye, iskatta a teyantoolaya isho a teekolaya piisa diirraasso tura fuura.”

²¹ Dehaama Mamuukaani' daashe qoota nuqusa Isho orra isha olli piita mukinno xasayshe malla, nuqusa akka Mamuukaani' kide qara' kode.

²² Semmalla nuqusa ka saleese akka afadda piita piisa opa oorsamto ka piitadda piisa opa erkamto' kode ka kide, “Aappa tika a tikaadippaayye aappumo, dehaamtaadi ka teyyatamo!”