Mariqoosi 9 - Mataafa Qulqulloota

Pissa akka Yesuusi pursame

¹ Kamma desa Yesuusi i'ishootta kide, “Dukaatannen ishina kiini, orrose amma are co oppaayye, orra a in leenin mali mankisteeta Waaqa a hupna kuttan deenitto akko takka takka ca.”

² Ka kuyyaata lehi kammaayye, Peetiroosi ka Yayqoopi isho Yohaannisi isi quda qeede ka, ishootta pattan irroota takka kutta qaropa fayyade, pissaadi ka ishootta tura pursame.

³ Mehaddaadi nefo ka harmo attaaden ka warwarri. Umma piita qaraayye, nama kadi mehadda diipa diipa nefooyye asse attassa in ettansho.

⁴ Sitiiyyi Eeliyaasi isho Muuse a Yesuusi olli haasawanna ka ishootta tura akkaaden.

⁵ Peetiroosi ka Yesuusi kide, “Kolissampayto are kallaatta i'ino paxaari; shaakka sessan qupna; takkan xaayti koddan, takkanka a Muuse koddan, takkan ka a Eeliyaasi koddan.”

⁶ Tamaarewwasene sessa qoota harmo tatammaqen malla, Peetiroosi wa a haasawanna nefo in upo.

⁷ Urratta ka de'e ka ishootta qara deke; Urrattase kara desa nessa a kiino, “Ini innasene xayyo an jaalanna, isha dakaya.” Ka dakaade.

⁸ Eennow ete tiitaawen ka tooyyadeneeyye, Yesuusi mali a ishootta kapa co, nama takka nefo in akkine.

⁹ A irrootase qara lekkannaaneeyye, Yesuusi i'ishootta ajaje ka kide, “Haka inna a nama tootoppa xa'an kara'e, wessen a akkitene nama takka nefo an lelan.”

¹⁰ Ishootta ka qaalese dakayen ka isi kara qapaden; A koddito ma ixolli haasawanni ka kiini, “Tootoppa xaana kideese, maana kideeta?”

¹¹ Ka Yesuusi kaassaden ka kidene, “Kollissampaya a seera maana malla kiini, ‘A paayyota qara de'o, Eeliyaasi kodda parpaaccisni?’”

¹² Yesuusi ka oorshe ka ishootta kide, “Keeto Eeliyaasi paayyota qara de'a ka we piisa harmisha, a koddito ma ‘Inna nama akkima rakkoota kokkoka isha qara kayto ikka needdamo, sede taafamte attaaw?’

¹³ Anti xoori in ishina kiini, Eeliyaasi xattaaw de'e, orra ka akka qootaadi desa taafamte mina'e, wa ishootta aaka piisa isha qara kode.”

Yesuusi inna takkan hapura neeqan qapamexe dinshe

¹⁴ Yesuusi isho tamaarewwasene sessa ete tamaarewwasene ata hase kapopa tiitaaweneeyye, orra lekayta a ishootta kapopa ollopa oore akken. kollissampayasene a seera ka tamaarewwasene oli shiishni.

¹⁵ Samaytase piisa ete Yesuusi akkeeyye itammaqe ka oppa qawwaawe. Ka isha kapopa hire ka nakayta isha qara kaassade.

¹⁶ Yesuusi ka tamaarewwaadi kaassade ka kide, “Ata maana qara ishootta oli shiishnittan?”

¹⁷ Nama takka ka orra kara desa oorshe ka kide, “Ha Poqallaay, hapura neeqa a nama tupa arrapa qapno innaayyo qape, an ka ke kapopan de'e.

¹⁸ Oto isha qara de'oyye, piitopa isha kanni; ikka afaappa rumpaya urqinni, ka ilka ollin qommi, dakintaadi ka eyye kokni ka pukka pahanaani. Akkima orrittose innaayyo kara sookshane'e an ka tamaarewwaatti kaassade, umma in ettaninne.”

¹⁹ Yesuusi ka ishootta kide, “Ishina orra amani in kinninitiiyyi, haka aytamiti'in ishin olli kallaada? Ka haka aytamiti ishin kela duupada? Intoonnooy, innoosen ana kapopan xooyaay.”

²⁰ Ishootta ka innasenetin isha kapopa de'en; Hapurase neeqa ete Yesuusi akkeeyye, eennow innasene piitopa kate ka akka feqado kode; ikka piitandesa kankalaanni ka rumpaya afaan urqinni.

²¹ Yesuusi ka aappa opa innaseneti kaassade ka kide, “Paaqose atta kitto isha paayye.” Aappaaysho ka kide, “Innumanne isha paayye,

²² Ka isha ikassa'e lekayteetan apitta isho pisha karopa isha kanni. Atara oton i'ettaninniiyyi, ino nyarrahe ka ino qaarqaare.”

²³ Yesuusi ka ishi kide, “Hela ‘oton i'ettaninni’ kiini? Nama amanno'e, we piisa ettansammi.”

²⁴ Ennow aappa opa innaseneti ka ullupe ka kide, “In amani ma wa amana anan kamma pisa oppaayye atti ana qaarqaare.”

²⁵ Yesuusi ka akkima samayta olkelan isha kapopa hirro akke ka hapurase neeqa fukke ka kide, “Atti hapura dakkaawe ka haasa ettaninni in kinniniiyi! akka innoosen kara sookto! ka lammatta karopa a oorini in ke ajajini.”

²⁶ Hapurase neeqa ka harmo ullupe; ka akka innasene akata feqadane kode; ka kara sooke; Qoota innasene pukka pahanaaden malla, orra lekayta ka kide, “Ito'en!”

²⁷ Ma xoori Yesuusi harka innaseneti qape ka xaashe, ikka ela qa'aden.

²⁸ Yesuusi ete alleeta kelopa kulleeyye, tamaarewwaadi ka xawwi desa isha kaassaden ka kidene, “Ino xawwi maana mallan hapuroose neeqa sookissa malaalle?”

²⁹ Isha ka ishootta oorshe ka kide, “Ikose asse paho qinseeta [isho damta musatta] mali wa pila takkan nefon sookni in co.”

Yesuusi qoota tootaadi isho a tootoppa xaanaaditi desa a lammattati haasawadeew

³⁰ Yesuusi isho tamaarewwaadi porase oppaayye alle xa'e n ka qinda piita Kelilaatin aanen. Yususi umma pora a ishi oppa co, akka nama takka nefo upnaado in faane.

³¹ Sede nefo wa malla asse koddite, qoota Yesuusi tamaarewwaadi kollinno malla, ka kiino “Inna nama, harka orra oppopa tuukkaman; ishootta ka isha ishshan. Ma xoori kuyyaata sessa kammaayye tootoppa ixa'a malla.”

³² Tamaarewwaadi xoori wossen ishootta in kalle; ma isha kaassatta ifuuren.

Ayno piisa qara jaalli?

³³ Yesuusi isho tamaarewwaadi piita Qifirnahoomi opa de'en. Yesuusi ete alleeta kelopa kulle kammaayye, tamaarewwaadi kaassade ka kide, “A poroppa kittaneeyye, maana qara olli shiishnittan?”

³⁴ Ishootta xoori jawe kiden; sde nefo qoota a poroppa caaneeye olli shiishen ka kidene, “Ata amma, ayno ino piisa qara jaalli?” Malla.

³⁵ Ete kute'e kammaayye, ikka tamaarewwaadi kudanka lakki isi kapopa hale ka ishootta kide, “Nama nama piisa qara qapnaatta heeno, a pisa kelopa xata caado; ka piisa kela orxayta koddo.”

³⁶ Ka inna takkan shakka qeede ka otantaaysho oppa qa'atishe; ka hadduune ka ishootta kide,

³⁷ “Nama hellosen asse cecca oppa takka maxxiyyon teyyanno, ana teyyanni; a'ana teyyanno piisaaw anan ma, isase ana erke teyyanni.”

Nama ino toorri in kinnin piisa ino qudaaw

³⁸ Yohaannisi ka Yesuusi kide, “Kollissampayyto, nama takka maxxaaytin orriyya sookinnon akkine ka, qoota inoppa in qapnin malla, isha dawrine.”

³⁹ Yesuusi xoori ikide, “Nama maxxiyyon wa orra qawwanna koono; ka eennow ana qara wa neeqa haasaanno, qoota in kinnin malla, isha an dawran.

⁴⁰ Nama ino toorri in kinnin piisa, ino qudaaw.

⁴¹ Dukaatannen ishina kiini, ishina qoota a Kiristoosi kodditen malla, nama maxxiyyon qulla kela pisha ishina qapo, wa kapa akkada in dapo.”

Pora Waaqa oppa orra kehaytissa tooytaatta

⁴² “Nama, a sene shashakka ana amane oppaayye, takka akka kamma dapo kodo kapaayye, kati yomatta a kutta xolmaappa ishi hiddan ka pakateeta karopa isha katane, ishi waayyi.

⁴³ Semmalla oton harkaayti akka juppoota kooto ke kooniiyyi, isi quda mure ka alle kate; a harka lakki qapnaatto ka kahannami oppopa katamto kapaayye, a kumuddayta harkatin caattappopa kalto ke wayyiiy.

⁴⁴ [Kahannami pora oppaayye punatittaadi tooni in kinnin, apittaadi ka libbini in kinnin. ]

⁴⁵ Oton loqotayti akka kamma dapto ke kooniiyyi, mure ka alle kate; a loqqa lakki qapnaatto ka kahannami oppopa katamto kapaayye, a toonnayta koddito ka caatta oppopa kalto ke wayyiiy. [

⁴⁶ Kahannami pora oppaayye punatittaadi tooni in kinnin, apittaadi ka libbini in kinnin. ]

⁴⁷ Oton iltaayti akka kamma dapto ke kooniyyi, isi kara sookshe ka alle kate; a ilda lakki qapnatto ka kahannami oppopa katamto kapa, a ilta takkaaw qapnaatto ka mankisteeta Waaqa oppopa kalto ke wayyiiy.

⁴⁸ [Kahannami pora oppaayye punaatittaadi tooni in kinnin apittaadi ka libbini in kinnin.]

⁴⁹ “Akka kalisoota sookittan me'aysammitto mina'e, nama piisa apittanne olkela oorsama.

⁵⁰ “Sookitta ipaxaari ma, kati marmaddumaadi, dapaayye maanaanne isha marmaddassaan? Ishin oppaayye, jaalala a sookitta mina marmaddaawna a caaden. Ka olli kala; ka nakaytan ollin kallaada.”