Mariqoosi 7 - Mataafa Qulqulloota

Yesuusi qoota aata aappadaati desa wa haasawade

¹ Feresaata isho kollissampaya a seera a Yursaalami desa de'e oppaayye, takka takka ka Yesuusi kapopa ollopa de'en.

² Ka tamaarewwa Yesuusi oppa a demo a harka nyaleetin se kideese nefo a harkasso in jaqqannin mali damta damma akken.

³ Feresaata isho orra a Yihuta a ata hase haka aata qimaya tooytaadan ka taantetan harkaasso jaqadan mali damta dammi in caan.

⁴ Ka asseew oto urmalaappa kalaneeyye haka jaqqadan mali dammi in caan. Ka akkimose mina'ew, wa kuppaayya ka okkota ka meehaaysho a sipla oppa kodame isho looshshada jaqqeetan aata asse paha lekaya tooytaanni.

⁵ Semmalla Feresata isho kollissampaya a seera Yesuusi kaassaden ka kidene, “Tamaarewwasene xaayti maana'e aata qimaya qara kallaani in kinnin ka a harkaasso'e in jaqannin mali damta dammi?”

⁶ Yesuusi ka ishootta orshe ka kide, “Ishina pahanassampayaay, isase a Issayyaasi qootayshina desa xuuma haasawade ka kide, ‘ha samayse afa pattanne ana ulfeessini, ma karittaaysho ana kapa isekaade.

⁷ Ishootta aata anama kode'e seera Waaqati koden ka orra kollinni ka patta ana waaqaysanni.’ dukaata.

⁸ “Semalla ishina ajaja Waaqa'e alle diissen ka aata nama tooytaannittan.

⁹ Aataassin tooytaatta malla ajaja Waaqa alle diinnittan.

¹⁰ Muuse ikide, ‘aappaayshin isho aayyaassin ulfeesse. Nama aappaaysho taaki aayyaasso qara wa neeqa haasawanno, a alle ishshamo!’

¹¹ Ishina xoori ikkiinnitane, ‘Nama takka oton aappaaysho taaki aayyaassoti kiini qaarqaaarsa allu helati ana qara akkatto piisa kalisoota Waaqati in kalsheeyye;’

¹² Akka aappaaysho taaki aayyaasso qaarqaaro a faqqanni a kittan.

¹³ Ka pora asse pahon aataassin tooytaatta malla qaaleta Waaqa alle hattinnittan; ka wa asse paha lekaya koonittan.”

Wa nama nyalinna

¹⁴ Yesuusi isi kapopa samayta haleew ka ishootta kide, “Ishina piisanti anopa dakkaysada, ikka ishina kalto!

¹⁵ Wa nama kara sookna'e nama nyalinni diisheey, wa lake desa nama karopa anna nama nyalinni in caan!

¹⁶ [Semmalla nama napahata a dakaynitto qapo, a dakayo.”]

¹⁷ Yesuusi ete samayta eyye diishe ka kapa tika kelopa kulleeyye, tamaarewwaadi ka qoota pahanaseneti desa isha kaassaden.

¹⁸ Yesuusi ka ishootta oorshe ka kide, “hela ishin kuli sede matte in qapinini? Hela wa lake desa nama karopa anna akkima pakkanna nama nyalinni in kinnin ishina kalli in kitto?

¹⁹ Karitta karanne anni ka eenxata lakopa sookni diisheey, sataata karopa anni in caan.” Pamta piisa akkima nyala in qapnin Yesuusi ka seden ishootta upnayshe.

²⁰ Sekkamma Yesuusi ikide, “Wa nama nyalinna, wa nama kara sookna.

²¹ Ishootta nefo, dikatta neeqa ka sharmuutuma ka hatanta ka nama ikassa

²² ka dahaleeta taaki dahalsatta ka paata kaabbeeta ka neequmta ka sassapa ka fokkoota dapeeta ka yooyo'uma ka paata otitta ka isi peepa isho isi qaran xata paata xaayeeta.

²³ Wossin nenneeqa piisa nama karaaw sookni ka nama nyalinni.”

Amanteeta iskatteeta takkati

²⁴ Yesuusi eyye xa'e ka paleeta takka katama Tiroosi kapa kitto opa aane. Ka tika takka karopa kulle. Ka akkima eyye co akka nama takka nefo in upnaannini fade; ma dekatta in ettaninne.

²⁵ Iskatteeta takka a enentaadi hapura neeqan qapamte ka qoota Yesuusi desa dakayte ka eennow deete ka loqqa Yesuusi kela pi'ite.

²⁶ Iskatteetase nefo Kirikkitteeta a sanynyeeta Sirofinqa, ka akka Yesuusi hapurase neeqa enentaadi kara sooksho'e isha qinsatte.

²⁷ Yesuusi xoori i'isheetta oorshe ka kide, “Damta hellaa qeedeeta ka kutta kateeta in parpaaccisneey, paayyota a hellaa duttanen.”

²⁸ Isheetta ka ishi oorisse ka kiite, “Poqallaayyo, sede dukaata ma, ha kutta nefo pusaasa a hellaa kela sehena'e piite pohanni.”

²⁹ Yesuusi ka isheeta oorshe ka kide, “Sede a asse kiite malla hapurase neeqa enentaayti kara isookeey, tikaaytipa kale.”

³⁰ Iskatteetase oori ete kalteeyye, enentase xaadi kara hapura neeqa isooke ikka isheeta a loshsha qara nakaytan mukte akkite.

Yesuusi nama dakkawe ka haasa kuli ettaninni in kinnin dinshe

³¹ Yesuusi piita a Tiroosi kapandesa kitto oppa alle xa'e, ka Sitoona oppan tarpe ka piita takka Katamadda kudan kidammitto desa pakateeta Kelila opa aane.

³² Ikka piitositiiyyi nama dakkaawe ka haasa kuli ettaninni in kinnin isha kapopan de'en ka akka harkaadi isha qara qapado isha naappaden;

³³ Yesuusi ka namase orroppaayye xawwi desa qeede ka qupiyyaadi nappa karopa ishi kullishe ka hanjuftaadi tuffe ka arrapa qaran ishi qappade.

³⁴ Ka moontandela tooyyade ka shammaqsade ka namaseti kide, “Effatah!” Se kideese nefo “Paname!” kideeta.

³⁵ Nappaadi ka eennow panamen, arrapaadi nefo ka furmade ikka rakkoota takka nefo mali haasawatta paayye.

³⁶ Yesuusi ka akka sede nama takka nefo in lellini'i, orrase ajaje. Ma xoori ishootta a isha akka pora in torrinini ishootta kokkonnayshe qaran qapto'e a kuttaati torren.

³⁷ Orra torrosen dakaye piisa ka a kuttati oppa qawwaawe ka kide, “We piisa harmishe ka dakkaya akka dakayan ka orra haasa ettaninni in kinnin nefo akka haasawado kooni.”