Mariqoosi 5 - Mataafa Qulqulloota

Yesuusi akka nama hapura neeqa qapo dinshe

¹ Yesuusi isho tamaarewwaadi koonkaanne pakateeta Kelila tuullen ka piita Keresinoona kayen.

² Ete Yesuusi koonkaappa lekkadeeyye, nama takka hapura neeqan qapame ka eennow hawlalla kara desa isha mina sooke.

³ namoose pora hawlalla oppa'e kallaanni; umma nama takka nefo sansalaata nefon isha hideeta ka jarissa ettaninni in co.

⁴ Isha a lekatinni kaatena isho sansalaatan loqqa isho harka tupa hidammi, ma xoori sansalaatase alle meeni ka kaatenaase qeqqepinni ka alle dakkini. Umma nama takka nefo isha qapeeta ka isi kelopa oorissa ettaninni in co.

⁵ Isha awta piisa halkeetta ka kuyyaata hawlalla isho irrowwa qara pora anni ka pora ullupni ka dakintaadi dakaddan tuuqni ka faykittanni.

⁶ Isha ete laka desa Yesuusi akkeeyye, isha kapopa keere ka kela kilpiippade ka ishi sakatade.

⁷ Ka nessa kuttan ullupe ka kide, “Yesuusi atti inna Waaqase we piisa qara qapooti, ata maana ana qara qapta? Maxxa Waaqatinnin ke qinsanniiy, atara anan rakkacciisan.”

⁸ Sede nefo wa malla asse kide, qoota Yesuusi isha ajaje ka kide, “Atti hapura neeqa, namoose kara sooke!” malla.

⁹ Yesuusi ka isha kaassade ka kide, “Maxxaayti ayno?” Isha ka orshe ka kide, “Qootan lekinno malla maxxiyyo lekiyoon. ”

¹⁰ Ka akka Yesuusi piitoose oppa alle ishootta in daannini'i, harmo Yesuusi qinsade.

¹¹ Poroose oppaayye, xelloota tuuyyota kuttayteeta kunkunnawwa qudopa; dawwade.

¹² Hapurrasene nenneeqa ka Yesuusi qinsaden ka ishi kidene, “Atara akkan tuuyyawwosen karopa kallo'e, ino faqqate.”

¹³ isha ka ishootta faqqate. Hapurrasene nenneqa ka namase kara sooken ka tuuyyawwasene karopa kalen. Xellootase a tuuyyata kuma lakki mina kitto ka takeela quda kumpaappe hirte ka pakateeta karopa jimmite.

¹⁴ Sikimaya tuuyyawwaseneti ka alle qahen ka, katama isho palewwa kara otootase torren. Orra ka wa kodde tooyya malla tikkaasso kara sooke.

¹⁵ Ka Yesuusi kapopa de'e. Ka namase a turan karaayye hapurra nenneeqa caan a isi upnaade ka mehaddaadi kalsade ka eeyye qaa'e akken ka fuuren.

¹⁶ Orra turan sede akke ka wa namase orriyyaan qapame isho tuuyyawwasene qara kaye piisa ishootta torre.

¹⁷ Sitiiyyi orra piisseti ka akka Yesuusi piitaaysho kara sooko ka alle aano'e Yesuusi qinsade.

¹⁸ Ete Yesuusi koonka karopa fayyannooyye, namase a turan orriyya kara caan Yesuusi qinsade ka kide, “Ana ke olli de'o.”

¹⁹ Ma xoori Yesuusi ishi in faqqanne, ma i'ishi kide, “Tikaaytipa kale ka, akka poqalla ke maare ka wa atta kutta ke kode, toolaayshina torre.”

²⁰ Namase ka wa Yesuusi ishi kode piita takka Katamadda kudan kidammitto oppa torra paayye. Orra a dakaye piisa ka oppa qawwaawe.

Enenta iyya'iroosi isho iskatteetase ohaata Yesuusi quda qappatte

²¹ Yesuusi ete koonkaan pakateete afa disi opa oppa oorew ka tiitaaweeyye, orra lekayta ka isha kapopa ollopa de'ew; isha ka sitiiyyi pakateeta kapa ca.

²² Eyyeeyye nama takka Iyya'iroosi kidammo ka saarra tika a qinseeta a orra a Yihuta oppaayye takka kodde ka, ete Yesuusi akkeeyye, loqqaadi kela pi'e.

²³ Ka harmo isha qinsade ka kide, “Enentiyyo a shakka toota qara kittaay, akka dinto ka caatto'e, xooye ka harkaayti ishetta qara qapado.”

²⁴ Yesuusi ka isha olli aane. Sitiiyyi orra lekayta isha kamma anni ka qinda piisa desa isha tuukni.

²⁵ Iskatteeta takka para kudanka lakki diika urqissaan payyahate ka eeyye kitta.

²⁶ Isheetta akimewwa lekaya ishetta ekkayshe, ikka kaajaadi piisa sede kela'ew pirte; Ma xoori qaropa desaaw ishi deeni diisheey, ishi aknaannin kitto.

²⁷ Isheetta qoota kurra Yesuusi dakayte malla, otanta samaytase oli tuukno kara desa Yesuusi kamma desa deete ka ohaataadi qappatte.

²⁸ Wa malla asse koote nefo, qoota amanteetan isi karan xata dikatte ka kiite, “Kadin ohaataadi nefo quda qappada kiite, in dina.” malla.

²⁹ Diikase xaadi urrqino ka eennow qa'ade; Akka surumtaadi kela dinte, ikka dakintoppan xata ishi dakaatte.

³⁰ Yesuusi ka akka hupna isha kara sooke eennow upnaade ka isi kammandesa tiitaawe ka ishootta kide, “Ayno ohaatiyyo quda qappade?”

³¹ Tamaarewwaadi ka ishi kidene, “Samayta ke tukni akka akkiniy, atta kiini, ‘Ayno ana quda qappade?’”

³² Yesuusi xoori nama isha quda qappade akka'e, isi kapandesa tooyni.

³³ Iskatteetase xoori wa a isheetta kodde'e upnaatte ka fuuraan xarri ka loqqa Yesuusi kela pi'ite ka dukaata piisa ishi torrite.

³⁴ Yesuusi ka isheetta kide, “Enentiyyo, amanteetaayti ke dinsheey, nakaytan kale ka miiddotaayti piisa kela pahe.”

³⁵ A Yesuusi sede afaappa in dikkinniniiyi, orra tika saarase a tika qinseeta a orra Yihutaati desa de'e ka saaraseti kiini, “Enentaayti itooteey, maana'e patta kollissampayta yaalinni?”

³⁶ Yesuusi ete sede dakayeeyye wa kidine puyade ka saarase a tika qinseeta a orra Yihutaati kide, “Amanteeta pattaw amane diishe in fuuran.”

³⁷ Ka akka Peetiroosi ka Yayqoopi isho innaasso Yohaannisi mali nama takka nefo isha olli in deenini dawre.

³⁸ Ete tikase a saara tika qinseeta a orra Yihuta kayeneeyye, Yesuusi orra a olloppa qite ka pooyno ka ullupno akke.

³⁹ Ka oppopa kulle ka ishootta kide, “Enense imukte diisheey, in tooneey; maana malla olloppa qitten ka pooynittan?”

⁴⁰ Ishootta xoori isha puyaden ka qara xosalen. Yesuusi xoori ishootta piisa alle tika kela sookshe ka aappa ka aayya opa enentaseti isho tamaarewwasene xaadi isha olli ca olliiyyi kaatasene a enentase kara kitta kelopa kulle.

⁴¹ Ka enentase tupa harka qape ka isheetta kide, “Talitaaquumi” Se kideese nefo “Enenta shakka, in ke kiini xa'e” kideeta.

⁴² Ikka eennow xaate ka pora anta paayyite. Isheetta nefo enenta a para kudanka lakki pirrte. Ete asse kodditeeyye, orra ka harmo oppa qawwaawe.

⁴³ Yesuusi xoori akka nama takka nefo sede in upnaannini'i ishootta ajaje. ka ishootta kide, “Wa a damta isheetta daasha.”