Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Mariqoosi 4 - Mataafa Qulqulloota


Pahanasene a xotta qupampayta
Maati 13:10-17 ; Luqa 8:4-8

1 Yesuusi oppa'e oore ka pakateetase kapa kollissa paayyeew. Qoota samayta kuttayta isha kapopa ollopa de'e malla, isha koonka pisha qara ca karopa fayyade ka kara kuti'e. Samayta piisa ka pakateetase kapa ca.

2 Ikka we lekaya pahanan ishootta kollishe ka ishootta kide,

3 “Dakkaysada! Qotampayta takka xotta qupa'e sookade.

4 Ete xottasene qupnooyye, xotta demo pora kapa'e seehen. Xampira ka de'en ka pohaden.

5 Xotta demoow kookohota, a qaraayye piita a kutta in kinnin qare seehen, ka qoota piita kutta kela in kinnin malla, eennow sakkatten.

6 a kodditoma ete atoota awditeeyye, iruqen, ka qoota hittina fayya in katannin malla koken.

7 Xotta demoow, qeeyya kara'e seehen. Qeeyyasene ka jifen ka sakkattase qara piren, ikka we takkan nefo in dallin.

8 Xotta a taakane xoori, piita fayya oppa'e seehen ka sakkatten, sakkattase ka jife ka pale; takka ka kunda sessa pale, a pila ka kunda lehi pale, takka'ew ka dippa paleew.”

9 Se kamma Yesuusi ikide, “Nama napahata a dakaynitto qapo, a dakayo.”

10 A Yesuusi xawwaati cooyye, orrase isha kamma anno isho tamaarewwasene kudanka lakki akka pahanoosen oli kela ishootta la'aysho'e isha kaassaden.

11 Isha ka ishootta kide, “Ishina haasa mankisteeta Waaqa a juutame upnaatta i'ishina daasamte; a mankisteeseti laka tula caati xoori, we piisanta pahanannew ishootta lelammi.

12 Sede nefo wa malla asse koddinitta akka kidamte ‘Ishootta akka Waaqopa in tiitaawnini'i, juppootaaysho ka ishootta in diisammini'i; a eeyye akkinaan kapa akkini in kinnin; ka a dakaynaan kapa dakayni in kinnin’” mina.

13 Yesuusi ka ishootta kide, “Hela ishina, pahanoosen ishina kalli in caane? Ka kuli atta pahanadda a pila ishina kala ettanshan?

14 Ini xotta qupno, qaaleta Waaqa'e qupni.

15 Ete qaalese qupamteeyye, xottoosen pora kapa seehe, wa akkinnaane orra qaalese a Waaqa dakaye, seetana ka eennow deeno ka qaaletase ishootta kara aylamte ishootta kara qeenno lelli.

16 Xottasene kookohota qara seehe nefoow, orrase ete qaalese dakaye, eennow xasan teyyanno lelli.

17 Ma xoori ishootta eta desa amanni diisheey, qaalese ishootta oppopa hittina in katanne ka oto qaalese minan rakkoota taaki pora daanama ishootta qara kaynooyye, ennow kehaysanni ka pi'ini.

18 Xottasene qeeyya kara seehe'ew, orra qaaletase dakkaysanno lelli.

19 Ma xoori qoota dikatta piisseti ka jaalala teyanta isho xajeelta a pila a paatapatta a karittaaysho kara co, qaaletase a Waaqa qara pirro malla, dalta dalli in caan.

20 Xottasene piita fayya oppa seehe'ew, xoori sene orrase qaaletase dakaye ka fayya teyyade lelli. Takkan ka kunda sessa dalen, a pila ka kunda lehi dalen, a pila ka dippa daleneew.”


ipsa qara dekama parpaaccisni in caan
Luqa 8:16-18

21 Sekamma Yesuusi ikide, “Hela nama oto, ipsa opayshooyye, iqara toma qupaapni? Taaki ilooshsha kela xaayni? Hela, pora a qara desa akkaadan qarae xaayni in co?

22 Semmalla oori, wa juutame laka sookeeta diini in can. Umma wa a dekade upnaatama diinni in caan.

23 Semmalla nama napahata a dakaynitto qapo, a dakayo.”

24 Ka ishootta kideewwe, “Wa dakaynittaneeti desa, qanqannissa tooytaada. Taara a ishin kurrittanenneew ishina kuramta ka qara kuli ishina padawamta.

25 A qapo qara'ew ishi daasamta; a in qapnin xoori, sede a qapo nefo qara qeedama.”


Pahana xotta kuttanna

26 Kamma desa Yesuusi ikide, “Mankisteeta Waaqa nama duloppa xotta qupno pahata.

27 Namase halkeetti imukni ka kuyyaate xaani. Atta akka koddinaan a in upnin maliiyyi xottasene ka sakkattini.

28 Piita mattaadi paayyota sakkattase akkaatinni. Ka kamma fiita akkaatinni. Fiitase ka miillata qapnaani.

29 Oto untase palitooyye oori, qoota eta fera koddinitto malla, namase ka ennow maajita harmisanni.”


Pahanasene a uqqinteeta leya
Maati 13:31-34 ; Luqa 13:18-19

30 Yesuusi ikide, “Mankisteeta Waaqa, maana kapa'en isheetta qapna? Ka pahana maanaatin isheetta ekkanna?

31 Isheetta uqqinteeta leyaa'e pahata. Uqqinteetase a leya, oto qupammittooyye xotta piita qara ca piisa kelopa xata shakki.

32 Oto qupamto kammaayye xoori, ikuttanni ka qora piisa qara jaalli ka taamma kukutta dehinni. Xampira nefo ka qara saatta saattaanni.”

33 Yesuusi ka a samayta qapatta ettaninno mina kitto'e, pahana asse paapaha a lekatin qaalese ishootta lelli.

34 Umma pahana mali ishootta kollinni in co. Oto xawwaati caaneeyye xoori, we piisa taamaarewwaadi oli kela la'anni.


Yesuusi akka puppeeta pisha qara xaate jaw kiishe
Maati 8:23-27 ; Luqa 8:22-25

35 Awseti shishshipeeyye, Yesuusi tamaarewwaadi'i kide, “Pakateeteeyye afa disi opa tuullina.”

36 Ikka samayta kapa xa'e n. Ishootta ka koonkasene a isha kara caatin isha qeeden ka aanen. Koonkada pila kuli ka ishootta olli caan.

37 Puppeeta kokkoka ka pisha qara xaate. Ka haka koonkasene pishaan immakannaane'e, koonkasene dadda'inni.

38 Sitiiyyi Yesuusi koonkasenetiiyyi qinda kammatinni we matta xaayade ka muke. Tamaarewwaadi ka isha xaashen ka ishi kidene, “Kollissampayto! in piramminnaay, hela ke dakaanni in kitto?”

39 Yesuusi ka xa'e ka puppeetase fukke. Ka pakateetaseti kide, “Jaw kide!” Xayxaytase ka jaw kide, we piisa ka ollin kidene “di'i!”

40 Yesuusi ka oori tamaarewwaadi kide, “Maana malla fuurrittan, hela haka ammati amanteeta a qaptane?”

41 ishootta ka akata fuuren ka olli kidene, “Ata ini a xayxayta isho pakateeta kuli ishi ajajammaan, ayno?”

ကြှနျုပျတို့နောကျလိုကျပါ:



ကြော်ငြာတွေ