Mariqoosi 3 - Mataafa Qulqulloota

Yesuusi akkima nama a harkaadi toonnaawe dinshe

¹ Yesuusi ka tikase a orra Yihuta a qinseeta kelopa kulleew. Nama harkaadi tupa toonnaawe takka ka eyye ca.

² Orra a Yesuusi xasasa faano ka isha kaatanni ka kiini, “Intoonno tooynaay, hela kati isampatan namoose dinsha?”

³ Yesuusi ka namase a harkaadi toonnaawe kide, “Xooye ka otantoppa qa'ado,”

⁴ ka sekkammaayye ishootta kaassade ka kide, “Hela amma kuyyaata sampatatiiyyi wa paxaara kodeetam moon wa neeqa kodeeta faqqatame? Nama dinissam, moon ikassa?” Umma ishootta oppa in oorinne.

⁵ Yesuusi ka karittaaysho a dundune qara nyarrahe; ka orra a kapandesa co ilda miiratin tooye ka namaseti kide, “Harkaayti derayshe!” Ikka derayshe, harkase xaadi ka dine.

⁶ Feresaata ka eennow sookte ka saanta a ishin Yesuusi ishshan, orra Herodiisi olli sulatte.

akka orra pakateeta kapopa yesuusi kapopa ollopa de'e

⁷ Yesuusi tamaarewwaadi olliiyyi pakateeta Kelila kapopa aane. Piita Kelila isho a Yihutaatiiyyi orra lekayta ka isha kamma aane.

⁸ Ete wa koona piisa dakayeneeye, samayta kuttayta ka piita Yihuta ka katama Yursaalami ka a Etoomiyasitiiyyi ka piita a Yurtaanoosi afa disiti kittooyye isho katama Tiroosi ka a Sidoonaatiiyyi isha kamma de'e.

⁹ Yesuusi qoota samayta koope qaran xaate'e akka arta kara isha in qanninnini'i, akka koonka ishi harmishane tamaarewwaadi ajaje.

¹⁰ Isha qoota orra lekayta dinshe malla, a paaqan miiddamma piisa, isha quda qappatta'e isha tuukni.

¹¹ Orra hapurra nenneeqaatin qapame oto isha akkooyye, hapurrasene nenneeqa isha tura'e seehni ka ullupni ka kiini, “Atti a inna Waaqa.”

¹² Yesuusi xoori akka aynumaadi in lellini'i harmo ishootta fuke.

Yesuusi akka erkamampaya kudanka lakki reexade

¹³ Yesuusi ete irroota qaropa fayyadeeyye, isasene a faana'e isi kapopa halaade. Ishootta ka isha kapopa de'en.

¹⁴ Ikka akkima isha olli kallaadan ikka orra kollissa ishootta erko malla, nama kudanka lakki reexade; ka maxxa ishootta kode ka kide, “Ishina a erkamampaya an ishin;”

¹⁵ Ka akka orriyya sookane'e, hupna ukkumeeta ishootta daashe.

¹⁶ Erkamampayasene xaadi a reexade namase kudanka lakki nefo, sene. Simoonise a Yesuusi Peetiroosi kide ka isha hale,

¹⁷ ka hellaasene a Septiyoosi Yayqoopi isho Yohaannisi, isasene a Yesuusi Poonerkesi kide ka ishootta maxxa kode. Se kideese nefo, hellaa qaqawwa kideeta.

¹⁸ Ka intiriyaasi ka Filippoosi ka Pertelemewoosi ka Maatiyoosi ka Tomaasi ka innasene a Ilfiyoosi Yayqoopi ka Tadewoosi ka Simoonise piitaaysho qara kammo

¹⁹ ka Asqorottittase Yihuta isase Yesuusi toota qapsiise.

Yesuusi isho Pe'elesepuli

²⁰ Sekkamma Yesuusi kale. Qoota orra lekayta ollopa oore mallaaw, Yesuusi isho tamaarewwaadi ka pora oppan damta daman nefo dapen.

²¹ Qoota orra kiino, “Yesuusi itaaroonni” Ikka dakayen malla, toolaaysho isha qeedaa'e de'e.

²² Kollissampaya a seera a Yursaalami xata lekkade itorrini ka kiini, “Ha isha Pe'elsapuuli kara ca ikka pe'elsapuuli saarase a orrittatinni orriyya sookinni.”

²³ Yesuusi ka isi kapopa ishootta hale ka pahanan ishootta kide, “Seetana atta seetana sookissa ettansha?

²⁴ Mankisteeta takka oto lakki olli qitto ka oli torpinittooyye, kallaanni in kitto;

²⁵ toola takka oto lakki olli qito ka oli torpinooyye, kallaanni in co.

²⁶ Akkimoose mina'ew, seetana oto lakki olli qitooyye ipata diisheey kallaatta in ettansho.

²⁷ “Nama takka, oto tika irreelayta opa kullooyye, a paayyota irreelayse in hiinin mali a teyantaadi sara ettaninno in co; oto hido kammaayye xoori, tikaadi sara i'ettansha.

²⁸ “Anti dukaatannen ishina kiini, juppoota a orra koono isho otitta a onnaan piisa ishootta diisama.

²⁹ Ma xoori, nama Hapura Qulqulloota qara afa otitta haasawanno piisa; ishin dapayta juppoota para para'e isha qara koddita diisheey, juppootaadi isi in diisamto”

³⁰ Yesuusi wa malla asse kide, qoota kidene, “Hapura neeqa qapa” malla.

³¹ Aayya opa Yesuusi isho hellaasso a diira ka isha kapopa de'en ka lakoppa qa'aden ka isha kapopa nama erken.

³² Orrase isha kapa qaa'e ka ishi kide, “Tin aayyaassin isho hellaassina a diira lakoppa'e qa'aden ka ke faani.”

³³ Isha ka ishootta oorshe ka kide, “Ata aayyaanno ayno? Hellaanno a diira kan opa ayno?”

³⁴ Ka orrase isha kapan desa qaa'epa tooyyade ka kide, “Aayyaanno ka hellaanno a diira sene.

³⁵ Nama a heenna Waaqa koono piisa, ishan innaanno ka enentinno ka aayyaanno.”