Mariqoosi 2 - Mataafa Qulqulloota

Yesuusi akka toonnayta takka dinshe

¹ Kuyyawwa lamaya kamma, Yesuusi katama Qifirnahoomi opa tiitaawe. Akkima tikoppa co ikka dakaatte.

² Orra ollopa de'e qoota koope malla, tikase ka immakaate, oyta kuli ka qajen; isha ka qaalese ishootta kollinni.

³ Sitiiyyi nama afur ka toonnayta takka haade ka isha kapopan de'e.

⁴ Qoota orra koope malla, pora oppan Yesuusi turopa toonnaytase dehayshane dapen ka qinda a Yesuusi conne moonte xata qaala pooten ka Yesuusi turopa toonnaytase shabbaan lekkishen.

⁵ Yesuusi ka amanteetaaysho akke ka toonnaytaseti kide, “Innaayyo, juppootaayti ike haste.”

⁶ Kollissampaya a seera a eeyye qaa'e demo ka karittaaysho karan xata dikaden ka kidene,

⁷ “namoose maana'e otitta asse paho Waaqa qara haasawanni? Waaqa takkayta maliiyyi a juppoota orra diissata ettaninno ayno?”

⁸ Eennow Yesuusi ka wa karittaaysho kara dikannaane hapuraadin upnaade ka ishootta kide, “Maana'e isi karan xata wa asse paha dikannittan?

⁹ Toonnaytoseti'i ‘Juppootaayti ike haste’ Kideeta isho ‘Xa'e ka shaabbaatti xaysado ka kale’ Kideetoppaayye a xaame nukkulli?

¹⁰ Xoori inna a nama akkima piita qara juppoota nama diissata hupna ukkumeeta qapan akka upnaattan,” Ka oori toonnaytaseti kide,

¹¹ “Xa'e ka shabbaatti xaysado ka tikaaytipa kale.”

¹² Toonnaytase ka eennow xa'e ka shabbaadi xaysade ka fuula samayta piisa tura desa sooke. Semmalla orra piisa ka wessen oppa qawwaawe ka Waaqa kalataysade ka kide, “Wa asse paha ino apari an akkine!”

Yesuusi akka Lewwise Maatiyoosi kidmmo hale

¹³ Yesuusi oppa'e ooreew ka pakateetase a Kelila kapopa aane. Orra lekayta ka isha kapopa ollopa de'e, ikka ishootta kollishe.

¹⁴ Ete eeppa desa tarpinooyye, Lewi inna Ilfiyoosi a pora qarata qara kute'e akke ka ishi kide, “Ana kamma xooye!” Isha ka xa'e ka kamma aane.

¹⁵ Sekamma Yesuusi tika Lewwiiyyi damta dama qara ca; orra lekayta qoota isha kamma de'e malla, ishootta oppaayye orra qarata qaratno isho juppoolaya lekaya Yesuusi isho tamaarewwaadi olli damta kute'e.

¹⁶ Kollissampaya seera a feresaata kodde, ete Yesuusi orra qarata qaratno isho juppoolaya olli damta dammo ikka akkeneeyye, tamaarewwaadi kaassaden ka kidene, “Isha maana'e orra qarata qaratno isho juppoolaya olli damta dammi ka ikkayta ikkni?”

¹⁷ Yesuusi ka sede dakaye ka ishootta kide, “Ha paaqoolaya diisheey, orra fayya qapo'e akimitta parpaaccisni in co. Anti nefo juppoolaya akka juppootaaysho oppa oorane'e ishootta hala'en de'e diisheey, hanqeelaya hala an deene.”

Kaassuma qoota damta musattaati desa dehaade

¹⁸ Sitiiyyi tamaarewwa Yohannisise pishaan orra jaqnooti isho Feresaata damta musanni. Orra demo ka Yesuusi kapopa de'e ka ishi kide, “Tamaarewwa Yohaannisi isho tamaarewwa Feresaata damta musanniiy, tamaarewwaatti maana malla damta musanni in kinnin?”

¹⁹ Yesuusi ka ishootta orshe ka kide, “Hela oto hemampayta hemattota olli cooyye, hemattose damta musatta i'isheetta faani? inna'i! Haka hemampayta isheetta olli co kara'e, damta musatta isheetta faani in kitto.

²⁰ Ma xoori kuyyaata a hemampayta isheetta kapa qeedamo de'aay, awwse damta musatta.

²¹ “Nama ohaata kerite qara japara haraya heddinno in co. Oton qara'e heddishaayye, japaroose haaraya ohaatase kerite xonyola ka ka'a, kaamattaadi ka a deyyo qaran qapnaada.

²² Akkimose minae'ew, nama maaddota a taadeta wayneeta akala xattayta kara qa'anno in co. Oton kara'e qa'ayye, maaddotase a taadeta wayneeta akalase kaa'ini, taadetase a wayneeta ka alle kara urqini; akala nefo ka patta panni. Semmalla maaddota taadeta wayneetati akala ammayta parpaaccisni.”

Kaassuma a sampata orra Yihuta malla dehaade

²³ Kuyyaata takka a sampata orra Yihutaatiiyyi, Yesuusi dula kappa oppa desa tarpini. Tamaarewwaadi ka ete tarpinaaneeyye, maanqa kappa me'atta paayyen.

²⁴ Feresaata ka isha kaassatte ka kiite, “Tamaarewwaatti maana'e wa sampatan dawrame kooni?”

²⁵ Yesuusi ka orshe ka ishootta kide, “Taawwiti, isho orra isha quda co, a ete do'en ka rakkadeneeyye, wa taawwiti kode ishina a nappapne?

²⁶ Kiseta Apiyataari a qeesitta kutta koddeeyye, Taawwiti tika Waaqa kelopa kulle ka laaqqotase qulqullaawte ka kalisoota Waaqati daasamte ka qeesewwa patta dameeta faqqatamte dame ka orra isha olli co kuli daashe.

²⁷ “Ka ishootta kideewwe, ha sampata nama malla kodame diisheey, nama sampata malla in uumame.

²⁸ Semmalla inna a nama sampata kuli qaraayye poqalla.”