Mariqoosi 16 - Mataafa Qulqulloota

Akka Yesuusi tootopa xa'e

¹ Ete kuyyaata sampata a orra Yihuta tarpiteeyye, Mekdelitteetase Maariyaami ka Maariyaamise Yayqoopi xaayte isho Seloome pukka Yesuusi quda daateta'e shittoota a qimaameta paxaara oppa kodamte pidden.

² Ka sampateeyye torpaappa kuyyaatase a paayyotati teykantan a letta piirritooyye, hawla kapopa aanen.

³ Ka a annaaneeyye, porandesa haasawanni ka kiini, “Ayno shilase hawla tura suksha ka ino pana?”

⁴ Wa malla asse kidene nefo, shilase hawla tura dufame qoota akata kutti malla. Xoori ete opeela tooyyadeneeyye, shilase qindopa sukume ikka aken.

⁵ Ete hawlase karopa kulleneeyye, xayyoolayse takka ohaata ata uwwisade ka qinda akkittain kute'e akken ka qara tammaqen.

⁶ Isha xoori i'ishootta kide, “In fuuran! ishina akka Yesuusise a Naasirati fannisame faanittan in upaay. Isha tootoppa ixa'e, umma are in co. Pora oppa hawlame nefo, are tooyya.

⁷ Amma aana ka tamaarewwaadi isho Peetiroosi kida, ‘Akkima turanneew ishina lele mina'e Yesuusi piita Kelila opa ishina' qattaay; eyye isha akkitan.’”

⁸ Iskattase ka fuuraan xarri ka porase a hawla oppa alle sooke ka qahe; qoota akata fuuren malla umma we takka nefo nama kapa in lelle.

Yesuusi akka Mekdelitteetase Maariyaami tura akkaade

⁹ Yesuusi ete torpaappa kuyyaata paayyotati sampate teykantan, tootoppa xa'e kammaayye, paayyota qaraayye, Mekdelitteetase Maariyaami a karaa orriyya tappa sookshe tura'e akkaade.

¹⁰ Isheetta ka ante ka isasene turan isha olli ca ka nyarrahana ka pooynaati lelte,

¹¹ ka kiite “Yesuusi icaade ka tootopa xa'e ! Anti ka ildaayyon akke!” Ishootta xoori isheetta in dukaysanne.

Yesuusi akka tamaarewwaadi lakki akkaade

¹² Sekamma Yesuusi tamaarewwaadi lakki a kantadaapa kallaati'i pissa pilaatin akkaadew.

¹³ Ishootta ka tiitaawen ka tamaarewwaadi a pilaati lelen, tamaarewwasene xoori ishootta in dukayysanne.

Yesuusi akka erkamampayasene kudanka takka tura akkaade

¹⁴ Sekamma Yesuusi kudanka takkasene damta kutexe ka dammta qara ca tura'e akkaadew. Ka qoota isaasene ishootta lele ka kide'e, “Yesuusi tootoppa ixa'e ka caade an ka ildaannon akkine” amana diishen ka, karittaaysho kokkonnayshen malla, ishootta fuke.

¹⁵ Ka ishootta kide, “Piita pisa oppa aana ka otootose a fayya uumata piisa kollisha.

¹⁶ Nama amane ka jaqame idina, a amanni in kinnin xoori qara'e faratamta.

¹⁷ Orra ana amanno piisa milikkitaddosene kamma akkaada; maxxiyyon orriyya sookshan ka afa haarayan haasawadan

¹⁸ kadipunu maakadda harkan qapnaaneeyye taaki qorsa a nama ikanno nefo ikkaneeyye, ishoottan miiddo; oton paaqolaya qara'e harkaaysho qapadaneeyye, paaqolaya idinan.”

Yesuusi akka moontopa fayyade

¹⁹ Poqalla Yesuusi ete sede piisa ishootta haasawade kammaayye, moontopa fayyade ka harka Waaqati qinda akkittaati kute'e.

²⁰ Tamaarewwaadi ka pora pisopa aanen ka kollishen. Poqalla ka ishootta olli kodaa kooni ka ishootta qudan daxxoowwa kooni ka, kollissaysho akka dukaata kodde sede akkinni.