Mariqoosi 15 - Mataafa Qulqulloota

Akka Pilatoosi turopa Yesuusin aanen

¹ Teykante parappanne saarra qeesewwa ka qimoota isho kollissampaya a seera, orra firtishoonkotoppa co ollini piisanti oppa oorsaden ka sekkammaayye Yesuusi hiden. Ka Pilatoosi qaropa isha tarpishen.

² Pilatoosi ka Yesuusi kaassade ka kide, “Hela atti a nuqusa Yihuta'e?” Yesuusi ka ishi orshe ka kide, “Akka atti kiite qara.”

³ Saarra qeesewwa xoori we lekayaanne Yesuusi xasasni,

⁴ Pilatoosi ka oppa oorew ka isha kaassade ka kide, “Akka we meeqaan ke xasasnaan tooye, malseeta takka nefo mina a oorisso?”

⁵ Haka Pilatoosi oppa qawwaawno'e, Yesuusi malseeta takka nefo in oorinne.

akka Yesuusi qara toota faratamte

⁶ Pilaatoosi para paroppa'e oto xayso nessuma a orra Yihuta a qaran tarpeeta kaytooyye, orra hidame oppaayye akka takka furmado'e, nama a samayta kaassade takka ishootta furri.

⁷ Sitiiyyi tiyyoolaya a mankisteeta qara xa'e ka orra leyshe ka hidame'e ca, Tiyyoolayoosen oppa takka Parpaani kidammi.

⁸ Samayta ka Pilatoosi kapopa aane ka akka kollatamte mina'e, akka nama takka diissata kodo ka ishootta furo isha kaassade,

⁹ Pilatoosi ka ishootta kaassade ka kide, “Akkan nuqusase a Yihuta ishina furo ihentane?”

¹⁰ Wa malla asse kide, akka saarra qeesewwa Yootan Yesuusi isha qaropa tarpishen qoota upo malla,

¹¹ Saarrasene a qeesewwa xoori, akka samayta Pilaatosi kaassado ka kido'e, “Pakkaadippa Parpaani ino fure'e, samayta nyarshen.”

¹² Pilatoosi ka oppa oorew ka samayta kaassade ka kide, “Ka kuli namase a kiinittane nuqusa Yihuta attan koda?”

¹³ Ishootta ka a lammatati ullupen ka kidene, “Fannise!”

¹⁴ Pilatoosi ka ishootta kide, “Maana'e? Maanaanne dape?” Ishootta ka qare'ew ullupitta koopshen ka kidene, “Fannise!”

¹⁵ Pilatoosi ka samayta xasassa'e Parpaani ishootta fure ka Yesuusi karafsiise ka akka fannisamo'e ishootta turopa tuukke.

Foolisoota akka Yesuusi kojeessite

¹⁶ Sitiiyyi foolisoota ka tika mukissampayta karopa Yesuusi qeette ka Foolisoota ata hasse piisa haleete.

¹⁷ Ka ohaata tiima quda uwwisse ka qe'eyya a xalaala mina marte ka matta qara ishi kalsse.

¹⁸ Ka ishi kiini, “Nuqusa Yihutaatiiyyi, nakayta a ke koddo!” Ka qara seesa'e, kaareeta ishi oorinni.

¹⁹ Ka xaashan mattoppa ishi qiini ka qara tufanni ka isha kojeessa'e tura kilpiippanni ka ishi sakatanni.

²⁰ Ka ete isha qara seesen kammaayye, ohaatase tiima isha quda qeeden ka mehaddaadi isha quda kalshen ka fannissa ishin aanen.

Yesuusi akka fannisame

²¹ Ka ete annaaneeyye Qerenitta takka, Simooni kidammo aappa opa Iskindiri isho a Ruufosi, a xaadi kantadaayye katamaappopa kallo akken ka akka irreetan masqalase a Yesuusi xaysado koden.

²² Ka sekkammaaye pora a Kolkoota kidammo opa Yesuusin aanen. Kolkoota kideeta, “pukurkura matta kideeta.”

²³ Ka eeyyeeyye taadeta wayneeta a oppa karpeeta lahen akka ikko ishi daashen; isha xoori in ikkine.

²⁴ Ka sekamma isha fannisen ka mehaddaadi a kalsanna qootaden ka qara qoyritta kataden.

²⁵ A Yesuusi fannisnaneeyye, siti teykante saateta sessa.

²⁶ Wanjalaadi akkissa'e taafeetase kiinitto, “Nuqusa Yihuta” Itaafamte.

²⁷ Ka Yesuusi quda'ew, shiftada lakkin de'en ka takka qinda akkittatin ka takka qinda pittittatin isha kapa fannisen. [

²⁸ Qaalese a xuuma kiinitto, “Tiyyoolayaappa'e dikame” ka dikatte. ]

²⁹ Orra isha kapan tarpino ka matta ishi lellehinni ka isha onni ka kiini, “Atti ke a tika qulqulloota pooto ka kuyyaata sessa kara qupo;

³⁰ intoonno amma masqaloose qara lekkado ka isi dinsheey!”

³¹ Saarra qeesewwa isho kollissampaya a seera ka asse isha qara seesni ka olli kiini, “Orra pila idinshe ma isi dinissa imalaale.

³² Isha oton Kiristoosi, nuqusase a, intoonno a amma masqaloose qara lekkadooy, ino ka akkino ka isha amannooy.” Shiftaddasene isha olli fannisame kuli ka asseew isha onni.

Yesuusi akkima to'e

³³ Kuyyaate saateta lehi paayyatte haka saateta sakaliti'i, piita piisa ka tukkantaawte.

³⁴ Ete saateta sakali kayteeyye, Yesuusi nessa kuttanne ullupe ka kide, “Elohi, elohi, laama sapaqitani!” Se kideese nefo, “Waaqiyyo; waaqiyyo; maane'e alle ana diisse?” kideeta.

³⁵ Orra eyye qa'anno oppa a demo ka ullupittose xaadi dakaye ka kide, “Ha Eliyaasi haleeni!”

³⁶ ishootta oppaayye takka ka keere ka wa takkan a fuuttota mina nukkulla qeede ka oppa haddaya wayneeta immake ka xaasha qara jikke ka Yesuusi dehayshe ka kide, “Intoonno akkima Eliyaasi de'o ka isha lekkisho tooynaay!”

³⁷ Sekkammaaye Yesuusi nessa kuttan ullupe ka nessa diishe.

³⁸ Kaaranta a tika qulqulloota ka illi xata paayyatte lakki kaamatte ka xata kayte.

³⁹ Motoloqa takkan Yesuusi tura qa'ade ka atta akkima Yesuusi to'e akke ka kide, “namoose dukaata'en inna a Waaqa.”

⁴⁰ Iskatta lake desa qa'ade ka sede tooyno ka eyye ca. Ishootta oppaayye nefo, Mekdelitteetase Maariyaami kiinaan ka, Maariyaamise Yayqoopise shakka isho Yoosa xaayte ka, Saloome ca.

⁴¹ Ishootta a Yesuusi piita Kelilaati cooyyew isha kamma anni ka isha qaarqaarri. Iskatta pila a Yesuusi olli Yursaalamipa de'e lekayta ka eyye caaw.

Yesuusi akka hawlame

⁴² Qoota letta halkeettaawte malla; lettose letta a sampata orra Yihuta tura qannitto ka a dikkisama'e koddite.

⁴³ Sitiiyyi Armatitta takka Yoosefi kidammo ka ulfeessame ka firtishoonkota Yihuta oppa takka kodde ka de'e; isha nefo nama a mankisteeta Waaqa kippeetan asanno; ka maxanyumaan Pilaatosi turopa aane ka akka pukka Yesuusi ishi daasho'e, isha naappade.

⁴⁴ Pilatoosi ka oppa qawwaawe ka kide, “Atta asse irra qara to'e?” Ka motolaqasene halacciise ka isha kaassade ka kide, “Hela Yesuusi keeto deyyo'ew to'e?”

⁴⁵ Ka ete toota Yesuusi motolaqa qara qalpeeffade kamma akka pukkaadi qeedo'e, Yoosefi faqqate.

⁴⁶ Yoosefi ohaata haaraya a pukkan hiddinaane pidde. Ka pukka Yesuusi masqala qara lekkishe; ka hidde; ka hawla shila kara xefen kara isha mooke. Ka shila kuttayta sukshe ka hawlase tura dufe.

⁴⁷ Mekdelitteetase Maariyaami isho Maariyaamise Yoosa xaayte ka ayshoppa akkima Yesuusi hawlinaan tooyni.