Mariqoosi 14 - Mataafa Qulqulloota

Sullaata a Yesuusi qara Sulamte

¹ A xaysonessumaddasene a orra Yihuta a qaran tarpeeta isho a laaqqoota kayto'e kuyyaata lakkiw hase; saarra qeesewwa isho kollissampaya a seera akka tabaan Yesuusi qapan ka isha ishshane saanta faddini.

² Ma xoori ikidene “Samayta horayta xaashaay kuyaata xayso nessuma oppa an koono.”

Iskatteetase Yesuusi shittootan daatite

³ Yesuusi piita Pittaaniyaatiiyyi, tika qoosholayta takka Simooni kidammooyye ca, ka eeyye damta dammi. Iskatteeta takka ka shuubba takkan daka Alpastiroosi oppa kodame a kara shittoota takka akata heeraan kokkoka ka ulfeessamte naartoosi kidammitto oppa immakaatte qapatte ka ishin deete; ka shubbasene paqisse ka shittootase matta Yesuusi qara tuqte.

⁴ Orra eeyye co oppaayye a demo ka wa kodde malla miiroode ka olli kide, “Shittootose maana malla asse patta patte?

⁵ Helani tinaareta dippa sessa qaropa katamta opan ka hiyyeessadda qoonni heeneneey; ka iskatteese kojeessen.”

⁶ Yesuusi xoori ikide, “Diisha maana'e isheetta payyahinnittan? Wa fayyaxe ana kootey.

⁷ Hiyyessadda qoota awta piisa ishin olli caan malla, eta heentaneeyye ishootta qaarqaara i'ettanissan; Anti xoori awta piisa ishin olli an kinnaado.

⁸ Iskatteese wa ettanisse'e koote ka turanne qattisse ka dakintiiyyo shittootan daatite ka hawla harmisse.

⁹ Anti dukaatannen ishina kiini, piisse qara pora oppa otootose a fayya torraammitto pisa oppaayye, wossene a ishetta koote, isheetta matte oorsatta'e torraaman.”

Akka Yihuta Yesuusi qapsissa owsade

¹⁰ Asqorottittase Yihuta isase tamaarewwasene a Yesuusi kudanka lakkippa takka kodde, Yesuusi qapsiisa'e saarra qeesewwa kapopa aane.

¹¹ Ishootta ka ete sede upnaadeneeyye xasooden; ka akka kaaja kuli ishi daashanexe olli kalen; isha ka Yesuusi qapsiisa'e aroota ettanto faddanni.

Yesuusi akka eetota a qaran tarpeeta tamaarewwaadi olli dame

¹² Xayso nessumasene a laaqqoota oppa kuyyaata paayyotati kuyyaatase oppa laahase a qaran tarrpeeta qallaaneeyye, tamaarewwa Yesuusi kapopa de'en ka isha kaassaden ka kidene, “Akka eetotase a qaran tarpeeta damto'e; akkan ayshopa anno ka ke harminno heenta?”

¹³ Isha ka tamaarewwaadippa nama lakki erke ka ishootta kide, “Katamaapa aana ka, nama okkotan pisha haano akkitaneeyi, kamma aana.

¹⁴ Ka tika opa kullino opa kamma kulla; ka aappa tikati kida, ‘Kollissampayta ikiini, tika xaykitta a ana ettanto an kela tamaarewwaayyo olli eetota qaran tarrpeeta damo, a xaame?’

¹⁵ Isha nefo tika kuttayteeta a tula qara kitto a kela fayya harmisamte ishina akkishaay, eyye ino harmisha.”

¹⁶ Tamaarewwasene lakki ka eeyye sooken ka katamasene opa aanen ka akka Yesuusi ishootta kide mina'e, akken ka eetotase a qaran tarpeeta eeyye harmishen.

¹⁷ Ete halkeettaawteeyye, Yesuusi tamaarewwasene xaadi kudanka lakki olli de'e.

¹⁸ Ete damta kute'en ka dammaaneeyye Yesuusi ishootta kide, “Anti dukaatannen ishinakiini, ishin oppaayye nama takka ana qapsiisa. Isha nefo amma ana olliiyyi damta dama qara ca.”

¹⁹ Ishootta ka seppa nyarrahen ka tara taran isha kaassaden ka kidene, “Hela kati ana koddita?”

²⁰ Yesuusi ka ishootta kide, “Namoose ishin kudanka lakki oppaayye takka; ka amma ana olli tomoose karaayye wateeta poottanni.

²¹ Inna a nama akkima turanneew qootaadi desa taafamte mina'e, tootopa anta isha qara in hasto ma xoori, namoose inna a nama toota qapsiiso oo isha kido! namase kati in dalannini ishi wayyi.”

Taanteta qulqulloota qurpaana

²² A ishootta damta qara caaneeyye, Yesuusi ka Laaqqoota qeede ka qara Waaqa kalataysade ka oppa moosse ka tamaarewwaadi daashe ka kide, “Hinda, sede so'aayyooy.”

²³ Ka tiwwa qeedew ka qara Waaqa kalataysade ka ishootta daashe. Ikka piisantiiyyi tiwwase oppaayye ikken.

²⁴ Yesuusi ka ishootta kide, “Ini diikase xayyo a kodayteeta haaraya, a orra lekayta malla tuqamo.

²⁵ Anti dukaatannen ishina kiini, hakan mankisteeta Waaqati wayneetase haaraya ikko kara'e, arepa desa luukase a wayneeta diipamteppaayye lammatta an ikko.”

²⁶ Sekkammaayye masmuureta dawaden ka irroota Taprasayti qaropa fayyaden.

Yesuusi akkima Peetiroosi isha marmado turanneew lele

²⁷ Yesuusi tamaarewwaadi'i kide, “Itaafamte ka kiini, ‘Anti sikmaytan daysha, kaharra ka pasaneey’ Piisanti ana marmattan ka alle ana diissan ka ana kapa qahattan

²⁸ ma xoori oton tootoppa xa'o kammaayye, piita Kelila opan ishina qatta.”

²⁹ Sitiiyyi Peetiroosi ka ishi kide, “Kadi punu orra piisa ke marmadaayye, anti an ke an marmado!”

³⁰ Yesuusi ka ishi kide, “Anti, dukaatannen ke kiini, awwe halkeesse are kitto oppaayye, a lukkalitta lakkin in iyyinin turanne, sessan ana marmatta.”

³¹ Petiroosi xoori a qaran qapto'e kokkonnayshe ka kide, “Kadi punu toota koddita nefooyye, ke ollin to'a diisheey, pakkanna an ke an marmado.” tamaarewwa ata hase kulika asseew kiden.

Yesuusi akka Ketesemaaniiyyi Waaqa qinsade

³² Sekkammaayye ikka pora takka Ketesemaani kidammo opa aanen; Yesuusi ka tamaarewwaadi kide, “Anti eeyye'en qinsadaay, kello areppa tawa.”

³³ Ka Peetiroosi ka Yayqoopi isho Yohaannisi isi quda qeede ka aane ka harmo nyarraha ka qaapeeta paayye.

³⁴ Ka ishootta kide, “Haka tootati in akata nyarrahaniiy, areppa tawa ka japaada ka ana asa.”

³⁵ Ka shakkayteeta ishootta kapa desa sekaade ka kilpiippade ka fuula piitan kaye ka oton ikoddiniiyyi akka saatese isha qara tarpito waaqopa qinsade.

³⁶ Ka kide, “Aappo, we piisa ettaninniiy, tiwwoose a rakkoota alle ana qara tarpishe ma xoori a xaayti qara koddito diisheey, xayyo qara in koddinin.”

³⁷ Ete tamaarewwasene sessa kapopa ooreeyye, ishootta a muke'e akke ka Peetiroosi kide, “Simooni hela imukte? Hela saateta takka nefo tooyatta malaalte?”

³⁸ Ka ishootta kide, “Akka ekkaysumappopa a kallini'i, japaada ka qinsada; hapura iharmisade, so'a xoori nukkalayaay.”

³⁹ Ka lammatta aaneew ka waasene a paayyota qinsade'ew qinsade.

⁴⁰ Ka tiitaaweew ka qoota ildaasso mukittaan ulsaaden malla, ishootta a muke akkew; umma wa isha mina oorinnaane in upan.

⁴¹ Ka a sessattati ishootta kapopa ooreew ka ishootta kide, “Hela ammikki mukten ka nessannittane? Ha ikoddite. Saatetase ikayte tin inna nama harka juppoolaya oppopa tuukkaman.

⁴² Xa'a ka anna, tin isase ana qapsiiso idesa kayeey.”

Yesuusi akka qapame

⁴³ A Yesuusi sede afaappa in dikkinniniiyyi, Yihuta isase tamaarewwasene kudanka lakkippa takka kodde ka de'e. Orra a koraatewwa isho kumaya qapade kuttayta ka isha olli ca. Ishootta nefo saarra qeesewwa ka kollissampaya a seera isho qimoota piita kapa erkamen.

⁴⁴ Yihutase isha qapsiisno turanneew ishootta milikkita daashe ka kide, “Nama an dinko ka isha qara nakayta kaassado ishaay, qanqannissa qapa ka ishin aana.”

⁴⁵ Yihuta ka eennow de'e ka Yesuusi kapopa dehaade ka ishi kide, “Kollissampayto!” ka isha dinke.

⁴⁶ Sekkammaayye orrase ka Yesuusi qape.

⁴⁷ Orra Yesuusi kamma anno ka eeppa co oppa takka ka koraateta yukade ka orxayta takka a qeesitta kuttati dayshe ka qudaayye napahata kate.

⁴⁸ Yesuusi ka ishootta kide, “Hela wa malla koraatewwa isho kumaya qapatine ka deetene a tiyyoolayta mina ana qapeeta malla?

⁴⁹ An tika qulqulloota kela awta piisa kollinno ka eeyye ishin olli kalooyye, ishina ana a qapne; ma xoori sede wa malla asse koddite, akka qaaleta mataafa qulqulloota dikkatto malla.”

⁵⁰ Tamaarewwaadi piisa ka isha diishen ka alle isha kapa qahen.

⁵¹ xayyoolayta takka ohaata a xaynaata a qora talpa oppa dawamte patta uwwisade xoori yesuusi kamma anni ka ete isha kuli qapa ekkaysheneeyye,

⁵² ohaataadi alle kate ka kapa lulle xa'ade ka tawe.

Akka firtishoonkota turopa Yesuusi dehayshen

⁵³ Ikka Yesuusi qeeden ka, tika qeesitta kutta opa ishin aanen. Saarra qeesewwa ka qimoota piita isho kollissampaya a seera ka eeyyepa ollopa de'en.

⁵⁴ Peetiroosi haka tika qeesitta kuttati'i, lake desa Yesuusi kamma anni ka eeyye tooytampayaappa qaa'e ka apitta awsanni.

⁵⁵ Saarra a qeesewwa isho a firtishoonkota oppa ca piisa ka Yesuusi ikassa'e isha qara maakiyya faddini. Ma xoori in teyne.

⁵⁶ Lekaya ka isha qara darta maakkumen; ma xoori maakkumaaysho olqara in kalle.

⁵⁷ Orra demo ka xa'e ka darta isha qara maakkume ka kide,

⁵⁸ “namoose a haasawanno ka kiino, ‘Anti tikoose a qulqulloota harka namatin qupamten alle poota ka kuyyaata sessa kara a harka namatin in qupammin qupa’” dakayne

⁵⁹ a koddito ma se ikkiti'i maakkumaysho ol qara in kalle.

⁶⁰ qeesittase kutta ka ishoottopeela qa'ade ka Yesuusi kaassade ka kide, “kisseese a orroose ke qara dehanno maana? Hela oppa we takkan nefo a oorisso?”

⁶¹ Yesuusi xoori jawi kide diisheey, we takkan nefo oppa in oorinne. Qeesittase kutta ka oppa oorew ka Yesuusi kaassade ka kide, “Hela ken Kiristoosi innasene a Waaqa eepisame'e?”

⁶² Yesuusi ka kide, “Aa ana, inna a nama a harka Waaqase we piisa ettaninnooti akkitta kuti'e'e akkitan; ka a tiitaawe ka moonte oraarappa deeno akkitan.”

⁶³ qeesittase kutta ka miiran mehaddaadi isi quda kaa'e ka kide, “Maakitta pila maana'en faaninna?

⁶⁴ Tin a qaalese a otitta Waaqa qara haasaawanno idakayteneey, ka kuli maana ishina pahata?” Ikka piisanti qaaleta takkan kidene, “Toota isha parpaaccisni!” Ka qara faraten.

⁶⁵ A demo ka isha qara tufatta paayyen ka japara ilda qara ishi qapni ka xottooman isha toommi ka ishi kiini “Oton a xuumampaytaayye ayno akkima ke toome upnaado.” Tooytampaya ka isha kakkandinni ka ishin tawen.

Akka Peetiroosi Yesuusi marmade

⁶⁶ Peetiroosi a tikase a qeesittase kutta kamma xata, qoqqopa kara co ka eeyye orxaya a iskatteeta a saarase a qeesewwa oppa takka ideete

⁶⁷ ka a Peetiroosi apitta awsanno akkite ka isha quda ilda koote ka ishi kiite, “Atti kuli turan Yesuusise a Naasirati olliiwwi kitta.”

⁶⁸ Peetiroosi xoori ikide, “Anti an upo, umma wa a kiinitta ana kalli in can” Ka marmade. Ete asse kide ka xaropa xata sookeeyye, lukkalitta ka iyye.

⁶⁹ Orxayteetase ka Peetiroosi akkiteew ka a eeppa qa'annaati a lammattati haasawatta paayyiteew ka ishootta kiite, “Ha ini are co, ishoottoppa takka”

⁷⁰ Isha ka a lammatati marmadew. Ete shakkayteeta jareeyyeew, orra eeyyeppa qa'anno ka ishi kideewwe; “Akka nama Kelila koddite damayaayti ke lelliiyi, atti dukaatanne ishootta oppa a takka.”

⁷¹ Peetiroosi xoori ikide, “namoose a kiinittan anti an upo!” Ka isi jiijeta ka xaxatta paayye.

⁷² Lukkalitta ka eennow a lammattati iyye. Peetiroosi ka qaalese a Yesuusi ishi kide, “A lukkalitta lakkinni in iyyinin turanne sessaan ana marmatta” matte oorsade ka a kuttati pooye.