Mariqoosi 13 - Mataafa Qulqulloota

Yesuusi akka tika qulqulloota qitqitto xuuma haasawade

¹ Yesuusi ete tika qulqulloota kela sooknooyye, tamaarewwaadippa takka ka ishi kide, “Kollissampayto, dakaddosen isho qupeese tooye, orra qawwanniiy!”

² Yesuusi ka ishi orshe ka kide, “Qupeese kutta i'akkini? Dakaddosen piisa qitqita; umma daka daka qara in haso!”

Milikkitadda a eta piraampira

³ Yesuusi ete tika qulqulloota mina desa irroota Taprasayti qara kuti'eyye, Peetiroosi ka Yayqoopi ka Yohaannisi isho intiriyaasi ka xawwi desa isha kapopa dehaaden ka isha kaassaden

⁴ ka kidene, “Intoonno ino leleey, wossen aytami koddan? Oto sepisa kodda kela foolsannittooyye, milikkitaadi kan maana?”

⁵ Yesuusi ka ishootta orshe ka kide, “Akka nama takka nefo ishin in sassapannini tooytaada.

⁶ Orra lekayta maxxiyyon de'a ka kida, ‘Anti an Kiristoosi.’ Ka orra lekayta sassapadaay.

⁷ Pora a oppa kittan kapa oto orana qitooyye, ka pora sekaayye otoota oranna oto dakaynittaneeyye, in tammaqan. Sede piisa kitteetanne kodditaay. Ma xoori piraampira in dehan.

⁸ Samayta samayta qara'e oranna xa'a; mankisteeta ka mankisteeta qara oranna xaata, piita ka porra lekaya oppan lellehta. Porra lekaya oppa loota ka deeta; sede piisa kan rakkoota paayyota a yatatta paayyota mina pahanaatta.

⁹ “Ishina mattaayshina isi tooytaada. Orra firti shoonkota turopa ishin tuukka; ka tikkasene a qinseeta a orra a Yihuta kela ishin karafa, akka maakkiyyaayyo kodditanexe ishina ka ana minan mukissampaya isho nuqussa tura'e, firteeta qa'attan.

¹⁰ Asede piisa in koddinin turan xoori, otoose a fayya samayta piita piisa qara kayeeta isheetta faani.

¹¹ Oto orra ishin qapo ka firteeta turopa ishin dehannooyye, ‘Maanan mina oorsanna?’ In kidan ka turan in qaapan. A haasawado Hapura Qulqulloota diishe ishinanneey; semmalla wa saatese oppa ishina daasama pattaaw haasawda.

¹² Hellaa toola oli tarpishaan ka toota oli daashan; aappa ka innaadi toota tarpisha ka daasha. Hellaa ka toollaasso qara paarkaalummaatan xa'an ka ishootta leyshan.

¹³ Maxxiyyo minan akka orra piisa kapa needdatamtan; ma xoori, a haka piraampirati duupattan kokkonnanno, isha paha.”

Rakkootase akata neeqa

¹⁴ Akkima xuumampaytase Taani'eli haasawade mina'e, oto “nyala pateetta pora a oppa kinnaatta ishootta faani in kinnini oppa akkitaneeyye. Nama nappapno a sede matte qapnaado! Sitiiyyi a piita Yihuta oppa ca, a alle irroowwa qaropa qahen.

¹⁵ Nama pafteyye tula qara co, wa paftose kela ca takka nefo teyyatta in lekkannin ka etaadi in pirrin.

¹⁶ Umma a duloppa co, ohaataadi teyyatta isi kammandesa in oorrin.

¹⁷ Sitiiyyi iskatta a karittoppo inna qapo isho a xaaye ka luukinno, oo ishootta kido!

¹⁸ Akka sede piisa sorooroppe in koddinini'i, Waaqa qinsada.

¹⁹ Etoosenetiiyyi, haka a Waaqa piita uume paayyatte haka ammaati'i, rakkoota apari in koddinini kodda. Umma itturopa rakkoota asse pahato in koddito.

²⁰ Katin Waaqa kuyyawwosene in kumma'annini kiiteeyye, nama takka nefo helani paha in ettansho; ma xoori orrase reexxame malla, kuyyawwosen kumma'adan.”

²¹ “Semalla oton nama ishina kiini ‘Tin Kiristoosi are cayye!’ Taakki ‘Tin disi cayye!’ Takka nefo in dukaysadan.

²² kiristoosewwa darta isho xuumampaya darta ixa'an ka oton i'ishootta koddiniiyyi a reexame kuli akka kamma dapane koda'e daxxowwa isho wa orra qawwanna kodan.

²³ Anti we piisan turanneew ishina leleey, semalla tooytaada.”

Kiristoosi akkima lammata ooro

²⁴ “Sitiiyyi rakkoose piisa kammaayye, piirtota itukkanta, umma leyaa in la'ayo;

²⁵ hikka ka moonte seehan, hupnada moonta quda ca kuli ka lelleehan. Isa 34:4; Iyyu 2:10; koda 6:13

²⁶ Sekkammaayye inna a nama a oraaraappa hupna kutta ka ulfeenan deeno ka akkaada.

²⁷ Ka erkampattowwaadi erka; ishootta ka qindadda afurin desa aanan ka pora a oppa piita oorto pisa oppa, orra reexxame ollopa ishi tiitayshan.”

Pahana a qoyra hilteeta a deena Poqalla akkinna

²⁸ “Qoyrase a hilteeta qara pahana kollada. Oto taammaadi fujuqnaaneyye, haashshaadi ka japarraaneeyye, sitiiyyi akkima katana dehaade i'upnaannittan.

²⁹ Akkimose mina'ew, ishina oto wessen piisa koddinaan akka akkitaneeyye, eta oppa inna nama de'an akka kayte ikka xarroppa co upnaada.

³⁰ Anti dukaatannen ishina kiini, haka sede piisa koddinitto kara'e, xeltose in tarpito.

³¹ Piita ka moonta itarpan ma, qaaletiyyo tarpa in qapto.”

Kuyyaata isho saateta a oppa Poqalla de'an, nama takka nefo in upo

³² “Ma xoori qoota kuyyaatoseti isho saateseti desa Waaqa Aappa mali nama takka nefo in upo. Umma erkampattowwa moonta nefo in upan; umma inna nefo in upan.

³³ Etosen aytam akkima koddan a uptaneey, japada ka isi qara tooyya.

³⁴ Ha sede nama tikaadippa xa'e ka piita seka opa aane pahata; ka orxayaadi matta mina kodadda ika lekaya qara kite ka a xarra tooytino nefo akka japaado ka tooyto ajaje.

³⁵ Semmalla aappa a tika eta oppa kalo a uptaneey, tooytaada; takka punu kalaakala taakki olli qootta halkeetta, taaki a lukkala iyyinaane taaki teykante parappanne kala koddita.

³⁶ Akka ishina a isiqara in upnini qara in kallini'i ka ishina a muke in akkinnini'i impasa;

³⁷ “Akkiman ishina lele mina'ewwen a ata hase piisa kiini impasa.”