Mariqoosi 11 - Mataafa Qulqulloota

Yesuusi akka ulfeena kuttanne katama Yursaalami opa kale

¹ Yesuusi isho tamaarewwaadi ete katama Yursaalami kapa dehadeneyye, Peetefaake isho Pittaaniyaanne aanen ka Taprasayti kayen. Yesuusi ka tamaarewwaadippa nama lakki erke ka ishootta kide,

² “Qatta ka paleese ishin tura kitto oppopa aana; ka oto eyye kaytaneeyye, innayya harreeta anama takka nefo turan qara in kutiinini, a eyye hiddame'e akkitaneey, fura ka ishin xooya.

³ Oton nama ishina kiini, ‘Maana'e asse koonittan?’ ishi kida'e, ‘Poqalla'e parpaaccisni, ikka eennow oorsha ka erka.’”

⁴ ishootta ka aanen ka innayyasene a harreeta pora kapa tika takkaayye xarra tura hiddame akken ka furen.

⁵ Sitiiyyi orra eyye qa'anno oppa demo ka ishootta kaassaden ka kidene, “Maana'e innayyosen a harreeta furrittan?”

⁶ Ishootta ka waasene a Yesuusi ishootta kide orraseti lelen, ikka ishootta diishen.

⁷ Tamaarewwasene ka innayyasene a harreeta qeeden ka Yesuusi kapopan de'en; ka ohawwaasso innayyasene a harreeta qara afen, Yesuusi ka qara kute'e.

⁸ Orra lekayta ka ohawwaasso poroppan desa afni, a demo ka taamma haashsha qapa quurri ka poroppan desa afni.

⁹ Orra Yesuusi tura qate isho a kamma qate piisa ka nessa kuttan kiini, “Ulfeena a Waaqa koddo! a maxxa Poqallaatin deeno, a eeppisame.

¹⁰ Mankisteetase deenitto a aappinno a Taawwiti a eeppisamte; moonte'e, ulfeena a Waaqa koddo!”

¹¹ Yesuusi ete Yursaalami kayeeyye, tika qulqulloota kelopa kulle ka wa isha kapan desa ca piisa tooye. Ka qoota letta halkettaawte malla, tamaarewwaadi kudanka lakki olliiyyi Yursaalami kara sooke ka piita Pittaaniya opa aane.

Yesuusi akka hilteeta takka jiije

¹² Parraytaadi ete Pittaaniyaayye oorraaneeyye, Yesuusi idoxe.

¹³ Ka laka desa qoyra takka hilteeta a haashshaan ilaawa akke ka kide, “Takka punu luukkata qara caada;” Ka kelopa aane. Ma xoori ete kapopa dehaadeeyye, qoota eta oppaayye qoyroose a hilteeta dallo in koddinin malla, haashsha mali we qara in teyne.

¹⁴ Seminan Yesuusi ka qoyrase a hilteetati kide, “Arepa desa nama takka nefo ke qara luukkata in dammin” A sede haasawannooyye tamaarewwaadi ka dakayen.

Yesuusi akka orra tika qulqulloota kara hera heranno daane

¹⁵ Ete Yursaalami kayeneeyye, Yesuusi tika qulqulloota kelopa kulle ka eyye kara orra paata katanno ka heranno alle sookissa paayye ka tarabbeesaddasene a orra kaaja purinnoti isho parjumasene a orra eleela katannoti alle kara kakkalshe.

¹⁶ Umma akka nama takka nefo meeha xaysado ka qorrima tika qulqulloota karan tarpo'e in faqqanne.

¹⁷ Ka ishootta kollishe ka kide, “In taafamme ka kiini in kitto, ‘Tikiyyo samayta piisa'e tika qinseeta kidamta?’ Ishina xoori rahana sarampayaati kooten.”

¹⁸ Saarra qeesewwa isho kollissampaya a seera ka a sede haasawannooyye isha dakayen ma qoota a samayta piisa kollissaadippa qawwaawno malla fuuren; ka saanta saanta a oppan isha ishshan faddanni

¹⁹ Ete halkeettaawteeyye, Yesuusi isho tamaarewwaadi ka alle katamaappa sooken.

Qoyrase a hilteeta akkima koke

²⁰ Parraytaadi teykanteeyye, Yesuusi isho tamaarewwaadi ete porase oppa desa tarpinaaneeyye, qoyrase a hilteeta a hittinnaadi kuli ollin koke akken.

²¹ Peetiroosi ka matte oorsade ka ishi kide, “Kollissampayto, tin qoyrase a jiijte ikoke.”

²² Yesuusi ka ishootta kide, “Waaqa amana;

²³ Anti dukaatannen ishina kiini, nama oton isi karan xata oppa qaapni in kinnin ka wa kide akka ishi koddane amanni, kati irrootoseti kida, ‘Areppa xa'e ka pakateeta karopa katameeyye’ i'ishi koddita.

²⁴ Semmalla oto qinseetan we takkan Waaqa naappannittaneeyye, akka ishina koddite kapa dika ka amana, wa qinsannittane piisa ishina daasamaay.

²⁵ Aappaase xaayshin moonte co akka juppootaayshin ishina diisho'e, oto qinseeta qa'annittaneeyye, oton nama we takkaneetin ishina ishin dapaayye, ishi diisha. ”

²⁶ [Oto ishina dapa orra pilaati a diinni a kinniniiyi Aappaase xaayshin moonte kalo juppootayshin ishina in diishoow. ]

Yesuusi hupna ukkumeeta a maanaatin akka koda koono kaassuma a dehaade

²⁷ Ka lammatta Yursaalamipa de'enew. A Yesuusi tika qulqulloota karan desa titiitaawnooyye, saarra qeesewwa ka kollissampaya a seera isho qimoota Yesuusi kapopa de'en

²⁸ ka isha kaassaden ka kidene, “Hupna a ukkumeeta a maanaatin wossen kooni? Taaki akka wossen kooto'e a hupnose a ukkumeeta ke daashe ayno?”

²⁹ Yesuusi ka ishootta kide, “Anti nefo kaassuma takkanen ishin kaassadaaw, oton i'ishina ana malseeta oorisseneeyye; anti nefo hupna ukkumeeta a maanaatin akkan wossen koono in ishina lela.

³⁰ Pishaan jaqeeta a Yohaannisi, hela Waaqa kapa deetem, moon nama kapa deete? intoonno, ana oorshay.”

³¹ Ishootta ka olli oorsaden ka kidene, “Ka kuli maanan kiina? Oton in kiina, ‘Waaqa kapa deeteyye’ i'ino kida, ‘Maana malla isha a'amannin?’

³² Oton kiino ‘Nama kapa deete honnow?’ Qoota samayta piisa Yohaannisi xuumampayta kiino malla;” Asse kideeta ifuuren.

³³ Ka semmalla ishi oorshen ka kidene, “Ino an upno.” Yesuusi ka ishootta kideewwe, “Asseeyye anti nefo, hupna ukkumeeta a maanaatin akkiman kodaddoosen koono, an ishina an lelo.”