Mariqoosi 10 - Mataafa Qulqulloota

Yesuusi akka qoota hemittati desa kollishe

¹ Yesuusi eyye xa'e ka piita Yihuta isho piitadda kirra Yurtaanoositiiyyi afa disiti ca opa aane. Orra akata leka ka isha kapopa ollopa de'ew, isha ka akka kollimaadi qara'e ishootta kollinni.

² Feresaattoppa lamaya ka isha kapopa de'en ka isha ekkaysatta faden ka isha kaassaden ka kidene “Hela seeroppa nama akkima iskatteetaadi alle diisho i'ishi faqqatamte?”

³ Yesuusi ka ishootta oorshe ka kide, “Muuse qootoseti desa maana ishin ajaje?”

⁴ Ishootta ka ishi oorshen ka kidene, “Muuse akka diirta warqata a ishin iskatteetaadi diishe, isheetta daasho ka isheetta diisho ifaqqate.”

⁵ Yesuusi ka ishootta oorshe ka kide, “Muuse, wa malla ajajaddosen ishina taafe, qoota karittaayshin daka kodde akka a dakayni a kinnin malla.

⁶ Ma xoori, uumata paayyotati paayyatte, ‘Waaqa diirta ka iskatteeta'e kode ka ishootta uume.

⁷ Semmalla nama aappaaysho ka aayyaasso'e diisha ka iskatteetaadi olli takka kodda.

⁸ Ishootta lakki ka dakinta takka koddan’ sekulipaata lakki koddeetaysho ka hasta ikka takka koddan.

⁹ Semmalla wa a Waaqa olli qudopa qape, nama olli quda in ma'innin.”

¹⁰ Ete tikopa tiitaaweneeyye, tamaarewwaadi ka qootoseti desa a lammattati Yesuusi kaassadeneew.

¹¹ Isha ka ishootta oorshe ka kide, “Nama iskatteetaadi alle diinno ka a pila hemino, iskateetaadi qara'e juppoota dahala kooni.

¹² Akkamose mina'ew, iskatteeta a diirtaadi alle diinnitto ka a pila opa hemammittow, a dahalsannitto koddini kideeta.”

Yesuusi akkima hellaa shashakkati sake

¹³ Akka harka ishootta qara qapado'e, orra hellaan Yesuusi kapopa de'e. Tamaarewwaadi xoori, orrase hellaan de'e peeqen.

¹⁴ Yesuusi ka sede akke ka miirode ka tamaarewwaadi kide, “Mankisteeta Waaqa qoota a sene asse pappahaati koddite malla, hella in dawran diisha, ikka ana kapopa de'en.

¹⁵ dukaatannen ishina kiini, nama a inna shakka mina in koddinin ka mankisteeta Waaqa teyyanni in kinnin, pakkanna oppopa in kalo. ”

¹⁶ Ka sekkammaayye hellaasene hahaduune ka harkaadi ishootta qara qapade ka ishootta sake.

Teyanta piita ka mankisteeta Waaqa

¹⁷ Yesuusi ete eyye sooke ka annooyyeew, nama takka isha minopa keere ka isha tura kilpiippade ka isha kaassade ka kide, “Atti kollissampayta a paxaara, akkan caatta parapara akkado'e, maana kodeeta ana faani?”

¹⁸ Yesuusi ka ishi oorshe ka kide, “Waaqa takkayta mali a paxaara takka nefo in cooy, maana'e a paxaara ana kiini?

¹⁹ Ajajadda i''upta, ishootta nefo ikiini; ‘In ishshan, in dahalan/ in dahalsadan, in hatan, darta in maakkuman, in sassapadan, aappaayshin isho aayyaassin ulfeesse.’”

²⁰ Namase ka ishi oorshe ka kide, “Kollissampayto, ajajaddosen an shakkiyyiiwwin paayye ka tooyte.”

²¹ Yesuusi ka ishopa tooyyade ka isha jaalade; ka ishi kide, “We takkane patta ke hase; aane ka wa a qapta piisa kate ka teekolaya qoote ka ana kamma xooye! Teyanta a tuulamte moonteeyye akkattaay.”

²² Namase ete sede dakayeeyye, nyarrahatane fuulaadi poornayshe; ka qoota teyanta kutta qapo malla, nyarrahatan alle aane.

²³ Yesuusi ka tiitaawe ka tooyyade ka tamaarewwaadi kide, “Teyantoolaya'e, mankisteeta Waaqa oppopa kalta, oo attan rakkoota!”

²⁴ tamaarewwaadi ka qaalese xaadippa qawwaawen. Yesuusi xoori i'ishootta oorshe ka kide, “Hellaay, mankisteeta Waaqa oppopa kalta oo attan rakkoota.

²⁵ A teyantoolayta mankisteeta Waaqa oppopa kalo kapaayye, a kaala qaawa marfeeta karan kullo sholla'i.”

²⁶ Tamaarewwaadi ka harmo oppa qawwaawen ka olli kidene, “Ka kuli ayno dineeta ettansha?”

²⁷ Yesuusi ka ishoottopa tooyade ka ishootta kide, “Keeto sede nama'e in ettansamto ma, a Waaqati desa xoori i'ettansamta; Waaqa we piisa ettaninniiy.”

²⁸ Peetiroosi ka ishi kide, “Tin ino we piisan alle diinne ka ke kamma deene.”

²⁹ Yesuusi ka orshe ka kide, “Dukaatannen ishina kiini, nama ana ka otootase a fayya malla kido ka tikaadi, taaki hellaasso, taaki tuparraasso, taaki aayyaasso taaki aappaaysho, taaki hellaadi taaki lehandaadi alle diisho,

³⁰ ka xeltose are kitto oppaayye, kadi punu toorammaayye, tikaadi ka hellaasso ka tuparraasso ka aayyaasso ka hellaadi ka lehandaadi harka dippa akkaada. Ka piita itturopa deenittooyye, caatta parapara akkaada.

³¹ A koddito ma, orra a tura qate lekayta kammopa oora, a kamma qate ka turopa oora.”

Yesuusi akka to'o ka tootoppa xa'o a sessattati turanneew haasawade

³² Ete pora Yursaalamipa anno opa caaneeyye, Yesuusi ishootta tura desa anni. Tamaarewwaadi ka seppa qawwaawen, a ishootta kammadesa deena ka fuuren. Yesuusi ka tamaarewwasene xaadi kudanka lakki isi kapopa haleew; ka qoota wa a isha qara kayaati desa ishootta upnayshe.

³³ Ka kide, “Yursaalamipan anna, inna nama ka saarra qeesewwa isho kollissampaya a seera turopa tuukkaman ishootta ka isha qara toota faratan; ka turaayye harka orra a Waaqa amanni in kinnini oppopa tarpishaan.

³⁴ Ishootta ka isha qara seesan ka qara tufadan ka karafan ka ishshan ma kuyyaata sessa kammaayye, tootoppa ixa'a.”

Qinseeta a Yayqoopi isho a Yohaannisi

³⁵ Hellaa Septiyoosi Yayqoopi isho Yohaannisi ka Yesuusi kapopa de'en, ka ishi kidene, “Kollissampayto; waan ke qara qinsanninna piisa akkima ino kooton faaninna.”

³⁶ Isha ka ishootta kaassade ka kide, “Akkiman maana ishina kodo faanittan?”

³⁷ Ishootta ka ishi orshen ka kidene, “Ulfeena mankisteetaayti oppaay, ino oppa nama takka akka qindaayti a akkittatin kute'o, takka ka a pittittati kute'o ino faqqate.”

³⁸ Yesuusi ka ishootta oorshe ka kide, “Ha wa qinsannittane a uptan. Rakkoose dikke neeqa an anti rakkado, rakkatta i'ettanissane?” (ka jaqattaase an jaqado jaqatta ettanissane?)

³⁹ Ishootta ka ishi oorshen ka kidene, “Aa, in ettaninna.” Yesuusi ka ishootta oorshe ka kide, “Dukaatanne jaqqattoose a rakkoota an anti jaqqado jaqqattan, ka rakkoose dikke neeqa an anti rakkado rakkattan

⁴⁰ Ma xoori a qindiyyo a akkita ka a pittitati nama kuti'inno anan; ini orra a Waaqa ishootta harmishe patta'e daasamta.”

⁴¹ Tamaarewwasene ata hase kudani ka sede dakayen, ka Yayqoopi isho Yohaannisi qara miiroden.

⁴² Yesuusi ka ishootta piisa isi kapopa hale ka ishootta kide, “Ukkumampaya piisiti, akkima samaytaysho qara ukkumampaya kidammaan, ka ishootta qara hupna ukkumeeta qapan i''uptan.

⁴³ Ishin oppa xoori, asse koddeeta parpaaccisni in kitto. Ishin oppa a nama kutta kodda faano, a orxaytayshin koddo;

⁴⁴ akkimose mina'e a ishin oppaayye piisa qaropa jaala heeno, a pisa kela karpishsha koddo.

⁴⁵ Maana malla inna a nama nefo orra kela orxayta koddeeta'e ka caattaadi kaaja orra lekaytan furannaaneti kodeeta ka daassata'e de'e diisheey, akka isha kela orxuman malla in deene.”

Yesuusi akka ilda Pertemoosi dinshe

⁴⁶ Sekkamma Yesuusi taamaarewwaadi olliiyyi katama Iyyaarko opa de'e. Ete katamasene oppan tarpino ka annooyye, samayta akata kutta ka isha kamma anni, nama takka Pertemoosi kidammo a ilda qara paten ka pora kapa qinsanni. Pertemoosi kideeta, “inna Temoosi” kideeta.

⁴⁷ A eeppa desa tarpino akkima Yesuusi a Naasirati kodde ete upnaadeeyye, “Yesuusi inna Taawwiti, atara ana suraysado!” Kideeta ka ullupa paayye;

⁴⁸ Orra lekayta ka isha fuke ka kide, “Jaw kide!” Isha xoori “Inna Taawwiti, atara ana suraysado!” Kide ka akata ullupe.

⁴⁹ Yesuusi ka qa'ade ka kide, “Isha hala!” Ishootta ka namase ilda qara patene kidene, “Xasoodo! ka xa'e, Yesuusi ke haleeniiy.”

⁵⁰ Isha ka ohaataadi isi quda kate ka shore ka qa'ade ka Yesuusi kapopa aane.

⁵¹ Yesuusi ka isha kaassade ka kide, “Akkaan maana ke kodo faani?” Namase a ilda qara paten ka ishi oorshe ka kide, “Kollissampayto, paata akkaan faani.”

⁵² Yesuusi ka ishi kide, “Amanteetaayti ke dinsheey, aane!” Namase ka eennow paata akkeeta ettanshe ka Yesuusi kamma qate ka olli aane.