Mariqoosi 1 - Mataafa Qulqulloota

Qaaleta a Yohaannisise pishaan orra jaqno torrino

¹ Sede paayyotase a otootase a fayya a qoota Yesuusi a inna Waaqa a Kiristoosi.

² Sede nefo, akkima xuumampaytase Issayyaasi taafe ka kide, “Tin anti erkamampaytiyyo a poraayti sahon, qattisha ka ke turan desa erka.”

³ Sede nefo, isase taafamte ka kiinitto, “nama takka koommaytoppa salinni ka kiini, ‘Poqalla pora harmisha ka saantaadi nefo ishi qajeelsha.’”

⁴ Semmalla Yohannisise pishaan orra jaqno ka koommaytoppa salissaan deeni ka kiini, “Akka juppootaayshina diissata teytane'e, juppootaayshin oppa alle oora ka jaqada.”

⁵ Orra piitase a Yihuti isho a katama Yursaalami lekayta ka isha kapopa deeni ka juppootaaysho lelanni. Yohaannisi ka kirra Yurtaanoosi oppa ishootta jaqni.

⁶ Mehadda a Yohaannisi kalsanna, nyirfa kaala oppa kodamen; surraadippa salpata kollatta'e hiddanni; damtaadi nefo, torrayta isho takma taammata.

⁷ Ka orra kiini, “namoose ana kamma de'o harmo'e ana qara qapa. Anti xata kideeta ka xopaadi isha kela fureeta mikka mina'e an qanne.

⁸ Anti pishaannen ishin jaqni ma, isha xoori Hapura Qulqullootatinni ishin jaqa.”

Akka Yesuusi jaqame ka ekkaysatame

⁹ Sitiiyyi Yesuusi katama Naasirati a piita Kelila kara caati desa de'e. Yohaannisi ka kirra Yurtaanoosi oppa isha jaqe.

¹⁰ Sooka Yesuusi pishaappa sookenne, Yohannisi ka moonta panamte isho a Hapura Qulqulloota eleela pahanaade ka Yesuusi qara lekanno akke.

¹¹ Sitiiyyi nessa a kiino'e “Atti a innaayyo an ke jaalanna ka ken xasoonna.” Ka moonte xata dakaade.

¹² Eennow Hapura Waaqa ka akka koommaytoppopa aano'e isha xaxxaashe.

¹³ Ikka koommayse oppa'e a seetana isha ekkayysanno quda kuyyaata kunda afur pire. Ka pinaana koommayta oppa jare. Erkampattowwa Waaqa ka isha qara tooyen.

Yesuusi akka kodaadi a kollissa Kelila karaxata paayye

¹⁴ Ete Yohaannisi hidame kammaayye, Yesuusi Kelilaapa aane ka otootase a fayya a Waaqa torrini

¹⁵ ka kollinni ka kiini, “Eta idesa kayen, mankisteeta Waaqa nefo ka dehaattey, juppootaayshin oppaayye alle oora ka otootase a fayyaati amana. ”

Yesuusi akka nama a fura murkuja qapanno hale

¹⁶ Sekkammaayye Yesuusi a pakateeta Kelila kapan tarpinooyye, Simooni isho Innaasso intiriyaasi qoota a murkuja qapanna kodden malla, a pakateeta karopa nyupuraasso kanna'e akke;

¹⁷ ka ishootta kide, “Ana kamma xooya! Anti, akka murkuja qapnittan mina'e, akka orra ollopa ana oorissane'en ishin kodaay.”

¹⁸ Ishootta ka ennow nyupuraasso alle diishen ka isha kama aanen.

¹⁹ Ete eeppa desa shakkayteeta tarpeeyyeew, hellaa toola lakki akke. ishootta nefo hellaasene a Septiyoosi Yayqoopi isho Yohaannisi ka koonkaasso kara caan ka nyupuraasso harmisanni;

²⁰ Yesuusi ka eennow ishootta hale. Ishootta ka aappaaysho Septiyoosi isho orraadi a xaayyade koonka kara diishen ka isha kamma aanen.

Yesuusi akka nama takka hapura neeqan qapame dinshe

²¹ Ikka tarpen ka katama Qifirnahoomi kayen, sampata a kamma deenooyye Yesuusi ka tikase a qinseeta a orra Yihuta opa aane. Ka kollissa paayye.

²² Yesuusi qoota akka kollissampayasene a seera mina kollinni in kinnin ka akka nama hupna ukkumeeta qapo mina kollinno malla, a dakkaysade piisa ka kollissaadippa qawwaawen.

²³ Nama takka hapura a neeqan qapame a tikase a qinseeta a orra Yihuta kela co ka, ullupe ka kide,

²⁴ “Ata Yesuusi a Naasirati, maana ino qara qapta? Hela ino patissa'e deete? Atti ayno akkima koddite in ke upa, atti a qulqullitta Waaqa.”

²⁵ Yesuusi ka hapurase neeqa fukke ka ishi kide “Jaw kide ka kara sooke!”

²⁶ Hapurase neeqa ka namase piitopa kate ka mijiqjiqshe ka nessa kuttan ullupe ka kara sooke.

²⁷ Orra piisa ka oppa qawwaawe ka oli kakaassanni ka kiini, “Ata ini maana? Ini kollissa haaraya a atta paho? Hapurra nenneeqa kuli hupnaadi a ukkumeetatin ajajin. Ishootta nefo ka ishi ajajammi.”

²⁸ Eennow kurra Yesuusi ka piitadda a Kelila kapandesa ca pisa oppa dakaade.

Yesuusi akka paaqolaya lekaya dinshe

²⁹ Sitiiyyiiw Yesuusi tikase a qinseeta a orra Yihuta kela sooke ka Yayqoopi isho Yohaannisi olliiyyi tika a opa Simooni isho a Intiriyaasipa aane.

³⁰ Aayya opa iskatteeta Simooni ka awdan paaqini ka eyye mukte. Ikka akka paaqnitto ennow Yesuusi lelen.

³¹ Isha ka isheeta kapopa dehaade ka harkaadi qape ka ela ishetta xaashe. Awdase ka ennow isheetta diishe; ikka xaate ka ishootta paata dedehasse.

³² Ete letta dummte ka shishshipteeyye, orra, ka paaqolaya isho orra orriyyaan qapame piisan Yesuusi kapopa de'e.

³³ Orra katamooseneti piisa ka tikase turopa ollopa oore.

³⁴ Yesuusi ka orra paaqa ika lekaytan miidammo lekaya dinshe; ka orriyya lekayta sookshe. Orriyyasene qoota Yesuusi ayno akkima kodde upan malla, Yesuusi akka qootaadi desa in haasawannini'i, ishootta dawre.

Yesuusi akka orra Kelilaati otoota fayya torre

³⁵ Yesuusi ete parinittooyye, paraappanne xa'e ka sooke; ka pora takka xawwi co opa qinseeta kede.

³⁶ Simooni isho orra a isha quda co ka isha fada aanen.

³⁷ Ka ete isha akkeneeyye ishi kidene, “Ha orra piisa kew faani.”

³⁸ Yesuusi ka ishootta oorshe ka kide, “Anti kollissa mallan de'ey, akkan otoose fayya kollisho'e, palewwoosen are kapan desa ca oppopa anna.”

³⁹ Ikka oori piita Kelila pisa oppa a''anni; ka tikkasene a orra Yihuta a qinseeta kela orra kollinni ka orriyya kuli sookinni.

Yesuusi akka qoosholayta takka dinshe

⁴⁰ Qoosholayta takka ka Yesuusi kapopa de'e. Ka loqqa kela ishi kilpippade ka kide, “Oton iheentaayye, ana dinissa ka nyala ana quda tawissa ettanissa.”

⁴¹ Yesuusi ka isha suraysade ka harkaadi derayshe ka quda qappade ka ishi kide, “In heenaay nyalaatti a ke quda tawen.”

⁴² Namase ka qooshase kela eennow dine. Nyalaasene ka quda tawen.

⁴³ Yesuusi ka turadesaaw isha lele ka kokkonnayshe. Ka isi qara isha xaashe ka ishi kide,

⁴⁴ “Sede nama takka nefo kapa in lelan ma, qeesitta kapopa aane ka qeesitta isi akkishe. Ka akka orra piisa maakitta koddito'e, qoota dinaayti ka nyala a ke quda taweeti desa, kalisootase a Muuse ajaje Waaqa kalshe.”

⁴⁵ a koddito ma, namoose eeppa xata sooke ka nama piisa torreeta paayye Yesuusi ka se minan akkaatta ka katama takkan nefo oppopa anta malaale ka oori pora oppa nama in kinnini oppa katamaayye laka tula kallaatta paayye. Orra lekayta ka qinda piisaayye desa isha kapopa deeni.