Maatiyoosi 9 - Mataafa Qulqulloota

Yesuusi toonnayta takka dinshe

¹ Sekkammaayye Yesuusi koonkaappe fayyade ka pakateeta qaran tuulle ka katamaadipa kale.

² Orra ka toonnayta takka shabba qara mukkishe isha turopa haade. Yesuusi ka amanteetaaysho akke ka toonnaytaseti kide, “Innaayyo, in qaapan, juppootaayti ike hasteey”

³ Sitiiyyi kollissampaya a seera Muuse oppaayye demo ka iskaran xata dikanni ka kiini, “Namoose Waaqa onni!”

⁴ Yesuusi ka dikattaaysho upnaade ka ishootta kide, “Maana'e iskaran xata wa neeqa dikannittan?

⁵ ‘Juppootaayti ike hasse’ Kideetoppaayye ka ‘Xa'e ka aane’ Kideetoppaayye a xaame sholla'i?

⁶ Ma xoori inna a nama akkima piita qara juppoota nama diissata hupna ukkumeeta qapan, akka upnaattane!” Kide ka toonnaytaseti kide, “Xa'e ka shaabbaatti xaysado ka tikaaytippa kale”

⁷ Namase ka oori ela xa'e ka tikadipa kale.

⁸ Samaytase ka sede akke ka oppa qawwaawe. Ka Waaqase hupna ukkumeeta a asse paho nama daashe kalataysade.

Yesuusi akka Lewise Maatiyoosi kidame hale

⁹ Yesuusi ete porase oppadesa tarpinooyye, nama takka Maatiyoosi kidammo a pora qarata qara kuti'e akke ka ishi kide, “Ana kamma xooye!” Ikka xa'e ka isha kamma aane.

¹⁰ Yesuusi ete tikase a Maatiyoosiiyyi damta qara cooyye, orra qarata qaratno isho juppoolaya lekaya de'e ka Yesuusi isho tamaarewwaadi olli damta dame

¹¹ Feresaata ete sede akiteeyye, tamaarewwa Yesuusi kaassatte ka kiite, “Kollissampaytaayshin maana malla orra qarata qaratno isho juppoolaya olli damta dammi?”

¹² Yesuusi ka sede dakaye ka ishootta oorshe ka kide, “Ha orra paaqno akimitta faani diisheey, orra fayya qapo akimitta faani in co.

¹³ Ma xoori aana ka isase taafamte ka kiinitto, ‘Anti diissatan jaalanni diisheey, kalisoota an jaalanni an co’ Maana akkima koddite kara qora ka upnaada anti juppoolaya halaa'en de'e diisheey, hanqeellaya hala'e an deeneey.”

Kaassuma qoota damta musattaati desa dehaade

¹⁴ Sitiiyyi tamaarewwa Yohaannisi, ka Yesuusi kapopa de'en ka isha kaassaden ka kidene, “Feresaata isho ino, damta in musanninnaay, tamaarewwaatti maana'e damta musanni in kinnin?”

¹⁵ Yesuusi ka ishootta oorshe ka kide, “Oto hemampayta hemattoota kapa cooyye, hemattootose inyarrahani? Ma xoori eta a oppaayye hemampayta ishootta kapa qeedamo de'ay, etoosenetiiyyi damta musadan.

¹⁶ Nama ohaata kerite qara japara haaraya heddinno in co oton qara'e heddishaayye, japarase haaraya qoota ollopa kuttuuranno malla ohaatase kerite xonyolli; kaamantaadi ka qara'ew paldaanni.

¹⁷ Umma nama maaddota a taadeta wayneeta a kala kerayta kara qa'anno in co oton kara'e qa'ayye, akalase kaa'in, taadetase a wayneeta ka alle kara urqini, akala nefo ka panni. Se malla, maaddota taadeta wayneeta akala ammaytoppa'e qa'anni, ikka piisani pahani.”

Qoota enenta iyya'iroosi isho iskatteetase ohaata Yesuusi qappatte

¹⁸ Yesuusi ete sede haasawannooyye, saara takka a tika qinseeta'e de'e ka isha tura sakatade ka kide, “Enentiyyo amma itooteey, xooye ka qara harkaayti qapado, icaattaay”

¹⁹ Yesuusi ka oori xa'e ka isha olli aane tamaarewwaadi kuli ka olliiw aanen;

²⁰ Sitiiyyi iskatteeta takka para kudanka lakki diika urqissaan payyahate ka isha kamma desa deete ka ohaataadi mina kamaara qappatte

²¹ Maana malla isheetta iskaran xata dikatte ka kiite, “Oton asu ohaataadi pattan qappadaayye, in dina”

²² Yesuusi ka iskamman desa tiitaawe ka isheetta akke ka kide, “Enentiyyo, in fuuran, amanteetaayti ke dinsheey.” Isheetta ka eennow dinte.

²³ Yesuusi ete tika a saarase a tika qinseeta a orra Yihuta kayeeyye, orra a kaasa pooyta dawno ka pooyno akkeeyye;

²⁴ ikide “Enentose imukte diisheey in tooneey, lakopa sooka!” Ishootta xoori isha qara xosalen.

²⁵ Ete tikase kela orrase sooksheneeyye tikase kelopa kulle ka harka enentase tupa qape, ikka xaate.

²⁶ Otoose ka piitoose pisa oppa dakaate.

Yesuusi akka nama lakka a joole dinshe

²⁷ Yesuusi ete eyyeppa desa annooyye, nama joole lakki isha kamma anni ka ullupni ka kiini, “Inna Taawwiti, ino suraysado!”

²⁸ Ete Yesuusi tika kelopa kulleeyye, orrase ilda joole ka isha kapopa de'e isha ka ishootta kaassade ka kide, “Akkan ishin dinissa ettansho i'amannittane?” Ishootta ka ishi oorshen ka kidene, “Aa Poqallaay, in amanninna”

²⁹ Yesuusi ka oori ildaasso qappade ka ishootta kide, “Akka amanteetaayshina mina a ishina koddito”

³⁰ Ildaasso ka paata akken Yesuusi ka turadesaaw ishootta kokkonnayshe ka kide, “Akka nama takka nefo in upnaannini tooytaada”

³¹ ishootta xoori i'aanen ka kurraadi piitoose pisa oppan desa fiden.

Yesuusi nama takka a arrapaadi haasa ettaninni in kinnini dinshe

³² Ete ishootta eeppa xata sookeneeyye, orra ka nama takka a orritta qape ikka haasa ettaninni in kinnin isha turopan de'e.

³³ Ete orrittase isha kara sookeeyye, namase ka haasawade. Samayta ka oppa qawwaawe ka kide, “Xela wa asse paha apari piita Isira'eeli oppa in akkaanne!”

³⁴ Feresaata xoori ikiite “Isha saara orriyyaatinni orriyya sookinni.”

Yesuusi akka samayta suraysade

³⁵ Yesuusi ka katamadda isho palewwa pisa oppa pora anni ka tikase xaaysho a orra Yihuta a qinseeta kela kollinni; ka otootase a fayya a mankisteeta Waaqa orra torrini; ka paaqa isho deesa piisa dininni

³⁶ Yesuusi ete samayta akkeeyye, qoota a kaharra sikmayta dape mina dikattaan kupaden ikka tura ollin patte malla, ishootta suraysade.

³⁷ Ka tamaarewwaadi kide, “Fera ikutti, ferampaya xoori ishakkiiy;

³⁸ semmalla aappa dula akka feroseneti orra erko'e isha kaassada.”