Maatiyoosi 8 - Mataafa Qulqulloota

Yesuusi akka qoosholayta dinshe

¹ Yesuusi ete irroota qara lekkadeeyye, samayta kuttayta isha kamma aane.

² Sitiiyyi qoosholayta takka ka Yesuusi kapopa de'e ka isha tura kilpiippade ka ishi sakatade ka kide, “Poqallaay, oton iheentaayye, ana dinissa ka nyalaayyo tawissa i'ettanissa.”

³ Yesuusi ka harkaadi derayshe ka namase quda qapade ka kide, “In heenaay dine.” Namase ka ennoow qooshase kela dine.

⁴ Yesuusi ka isha kide, “Sede nama takka nefo kapa in lelan ma, aane ka qeesitta isi akkishe ka akka orra tura upnaatamto'e, kalisootase a Muuse ajaje kalshe.”

Yesuusi akka orxayta takka a motoloqa dinshe

⁵ Yesuusi ete katama Qifirnahoomi karopa kulleeyye, motoloqa takka a Roomi'e isha kapopa dehaade ka qinsade ka kidene,

⁶ “Poqallaay, orxaytiyyo toonnaawe ka harmo suraawni ka tikoppa muke.”

⁷ Yesuusi ka oorshe ka ishi kide, “In de'a ka isha dinsha.”

⁸ Motolaqasene ka Yesuusi kide, “Poqallaay, atti akka tikiyyo kelopa kullitto'e, ana parpaaccisni in kittooy qaaletaaw kide ka orxaytiyyo idinaay.

⁹ Anti mattiyyo'e saarra ana qaropeela ca'en qapa, foolisowwa a ana kelopa xata ca ka caaneew. Ishoottoppaayye oton takka ‘Aane’ kiinooyye, i'anni; ka oton takka ‘Xooye’ kiinooyyeew ideeni; oton orxaytiyyo takka kiinoowwe ‘Sede kode’ ikooni.”

¹⁰ Yesuusi ete sede dakayeeyye, oppe qawwaawe ka orrase isha kamma anno kide, “Anti dukaatannen ishina kiini, piita Isira'eeli oppaayye nama amanteeta asse kutta qapo takka nefo an akkine.

¹¹ Anti in ishina kiini, orra lekayta qinda piirtotati dela ka dumaateta xata ollopa de'a; ka Aprihaami ka Hisaaqi isho Yayqoopi olliiyyi mankisteeta moontati damta kuti'a.

¹² Isasene allu mankisteeta a moonta lehada ka lakopa alle tukkantase laka tula kitto oppopa kataman. Ka tukkantose karaayye, ikka eyyeeyye pooyta isho ilka ollin qomeeta koddita.”

¹³ Kamma desa Yesuusi motoloqaseneti kide, “Aane ka ikka akka amanteetaayti mina ke koddito.” Orxaytaadi ka eennow sitiiyyiw dine.

Yesuusi akka orra lekayta paaqoppa dinshe

¹⁴ Yesuusi ka tika Peetiroosi kelopa kulle ka aayya a opa haantota Peetiroosi a awdan paaqnitto ka eyye mukte akke.

¹⁵ Ka harkaadi quda qappade; awdase ka eennow isheetta diishe, ikka xaate ka Yesuusi paata deddehassa paayyite.

¹⁶ Ete shishshipteeyye, ikka a orriyyaan qapame lekayaan isha kapopa de'en. Ikka qaaletaadin ishootta kara hapurrasene nenneeqa sookshe ka paaqolayasene piisa dinshe.

¹⁷ Sede nefo isase xuumampaytase Issayyaasi kide, “Ha isha deesinno teyyade ka paaqinno haadade” Akka dikkato malla.

Rakkoota orra Yesuusi kamma anno qara deeto

¹⁸ Yesuusi ete a samayta isha kapa tiitayshe akkeeyye, akka pakateete afa disi opa tuullane'e tamaarewwaadi ajaje.

¹⁹ Sekkammaayye kollissampayta takka a seera Muuse ka Yesuusi kapopa de'e ka ishi kide, “Kollissampayto, anti pora opa annitto pisa opan ke kamma de'a.”

²⁰ Yesuusi ka ishi oorshe ka kide, “ka'ala qaawwa qapan, xampira moonta ka saatta qapan, inna nama xoori pora kela ela matta qapan nefo in qapan.”

²¹ Tamaarewwaadi oppa nama takka ka Yesuusi kide, “Poqallaay, ana paayyota aano ka aappinno hawlo.”

²² Yesuusi ka ishi kide, “Orra le'e a pukkadaasso hawlado ka atti ana kamma xooye.”

Yesuusi puppeeta pakateeta qara xaate jaw kiishe

²³ Se kammaayye Yesuusi koonka karopa fayyade tamaarewwaadi ka isha olli aanen.

²⁴ A isi qara in upnin mali puppeeta kokkoka ka pakateeta qara xaate. Koonkaasso ka pisha kelopa tawa foolsaden. Yesuusi xoori imuke.

²⁵ Tamaarewwaadi ka isha kapopa dehaaden ka mukittoppa isha xaashen ka kidene, “Poqallaay, in piramminna! Ata inon pahen!”

²⁶ Isha ka ishootta kide, “Ishina a amanteeta ishina qajte, maane pora fuurrittan?” Ka ela xa'e ka puppeetase isho xayxaytase fukke. Jaw kidayta kuttayta ka kodde.

²⁷ Orrase ka oppa qawwaawe ka kide, “Ata ini a puppeeta isho xayxayta kuli ishi ajajammaan, nama atta paho?”

Yesuusi akka nama lakki kara orriyya sookshe

²⁸ Yesuusi ete pakateeta Keliilaati afa disi opa tuulle ka piita Kerkesinooni kayeeyye, nama lakki a orriyyaan qapame hawlallaappa desa sossooke ka isha mina kaye. Ishootta nefo harmo'en karpampaya, umma nama takka nefo porose oppan tarpa ettaninni in co.

²⁹ Ishootta ka ullupitta paayyen ka kidene, “Atti inna Waaqa, maana ino qara qapta? Ka a xoorasene in kaynin mali ino rakkacciissa deete?”

³⁰ Porra ishootta kapa desa shakkayteeta seka oppaayye, xelloota tuuyyata kuttayteeta ka eyye deetta deenni.

³¹ Orriyyasene ka Yesuusi naappaden ka kidene, “Oton orrose kara ino sookinniiyyi, xelloose a tuuyyata karopa ino erke.”

³² Yesuusi ka ishootta kide, “Aana!” Orriyyasene ka sossooken ka tuuyyawwasene karopa kalen. Xelloose a tuuyyata piisa ka takeela quda xata jarjartan hirte ka pakateeta karopa sehte ka piramte.

³³ Sikmayasene a tuuyyowwa ka xaayshotin qahen ka katamaapa aanen ka wa kodde piisa torren ka waasene orrase orriyyaan qapame qara kodde kuli torren.

³⁴ Samayta katamaseneti piisa ka Yesuusi akka sooke. Ka ete isha akkeneeyye akka piitaaysho oppaayye alle aano'e, isha qinsaden.