Maatiyoosi 7 - Mataafa Qulqulloota

Orra pila qara dapa mureeta parpaaccisni in kitto

¹ Kamma desa Yesuusi ikide, “Akka dapa ishin qara in murammini'i, nama qara dapa in muran.

² Akkimose a nama qara dapa murrittan mina'ew, dapa ishin qara muramaay; taara a ishin kurrittanenneew ishina kuramtaay.

³ Maana'e kurpana iltaytippa co a akkini a kinnin ka miissa ilta innaassina oppa co tooyni?

⁴ Taaki a kurpana iltaaytippa co qaran desa atta innaassina kiita, ‘Ana iltaaytippa ke miissa qeedo?’

⁵ Atti pahanassampayto, paayyota qaraayye kurpanose iltaaytippa co mayshe, sekkammaayye miissase ilta innaassina oppa co qeeda'e fayya akkitaay.

⁶ “Wa qulqullaawe kutta tura in katan; ka furootaayshin tuuyyowwa tura in dakkan; tuuyyawwa furootaayshin qara loqqaassotinni diddiitan; kutta desa tiitaawan ka ishin qoman.”

Qoota qinseetati desa

⁷ Kammaddesa Yesuusi ikide, “Qinsada, i'ishina daasamtaay; fada, i'akkattaneey; xarroppa kookoosha, i'ishin tura panamaay.

⁸ Nama qinsanno piisa teyyanni, nama faano piisa ka akkanni, a xarroppa kooko'inno piisa turaayye ikka panammiiy.

⁹ Ishin oppaayye ayno oto innaadi isha qara dama qinsannaaneeyye, daka ishi daanni?

¹⁰ Ka oto isha qara murkuja qinsannaaneeyye, maaka ishi daanni?

¹¹ Ka asseeyye, oto ishina ukkuttowwa kuli hellaassina wa paxaara daassata uptaneeyye, aappase xaayshin moonteeyye kalo desa atta qaran in jaalinnin ka orra isha qinsanno wa paxaara in daannin?

¹² Semmalla wa orra pila akka ishina kodo faanittane piisa, ishina kuli asseew ishootta kodaaw. Seera Muuse isho kollissa xuumampaya wa kiinaane sedewweey.”

Pora killa'a

¹³ Kammadesaaw Yesuusi ikide, “Xarra killa'a oppan kulla. Xarra pora pateetta opa orran anno ipaldi, poraadi nefo asseew paldi, orra oppan kullino ileki.

¹⁴ Xarra pora caatta opa orran anno ikilla'i, poraadi nefo asseew killa'i. Orra porose teyno nefo shakkaytaaw.”

Nama kodaadinni upnaysammi

¹⁵ Kammadesaaw Yesuusi ikide, “Xuumampaya a darta kela isi tooyta. Ishootta oto ishin kapopa deenaaneeyye, qudandela kaharra pappahanaadan, ma karan xata qapampaya yoyta mina.

¹⁶ Ma xoori kodaayshotinni ishootta upnaattan. Qe'eyya qaraayye idalta wayneeta pohanni? Ka qassatta qaraayye dalta hilteeta pohanni?

¹⁷ Semmalla qoyra a paxaara dalta paxaara dalli. Qoyra a neeqa ka dalta a neeqa dalli.

¹⁸ Qoyra a paxaara dalta a neeqa daleeta ettaninni in co, umma qoyra a neeqa dalta a paxaara daleeta ettaninni in co.

¹⁹ Qoyra dalta a paxaara dalli in kinnin piisa alle murammi ka apittoppopa katammi.

²⁰ Semmalla xuumampaya a darta kodaayshotinni ishootta upnaattan.

²¹ Nama a heenna a aappinno a moonta koono, diisheey, ‘A Poqallaay, Poqallaay’ ana kiino piisa, mankisteeta a moonta opa in kalo.

²² Kuyyaata firteetatiiyyi orra lekayta ana kida, ‘Poqallaay, Poqallaay, ino maxxaaytin xuuma an haasawanne? Ka maxxaaytin orriyya an sookinne? Ka maxxaaytin kodadda orra qawwanna lekaya an koone?’

²³ Kuyyaatoseti anka ishootta kida, ‘Anti pakkanna an ishina an upooy, ishina ukkuttowwaayye, ana kapa sekaada!’”

Pahana a tikka lakkiti

²⁴ Kamma desaaw Yesuusi ikide, “Nama qaalese xayyo dakayo ka ishin kallaanno piisa, ilattayta nama a kookohota qara tika qupade paha.

²⁵ Roopa ka roope, malxa nefo ka urqe, puppeeta nefo ka puppite ka tikase qara deete ka ekkaysatte. Qoota kookohota qara qupamte malla, ikka in pi'inin.

²⁶ Nama qaalese xayyo dakayo ka ishin kallaanni in kinnin xoori, eepa nama a tahaytoppa tika qupade paha.

²⁷ Roopa ka roope, malxa ka urqe, puppeeta nefo ka puppite ka tikase qara deete ka ekkaysatte. Tikase ka pi'ite, pi'ittaadi nefo ka akata neeqnaade.”

²⁸ Yesuusi ete se haasawade ka dikkishe kammaayye, orra harmo'e kollissaadippa qawwaawe.

²⁹ Maana malla isha akkima kollissampaya a seera mina kollinni in co ma, akka nama hupna ukkumeeta qapo mina'e ishootta kollinni.