Maatiyoosi 5 - Mataafa Qulqulloota

Kollissa a Yesuusi irroota qara kollishe

¹ Yesuusi ete samayta kuttayta a isha kamma deeno akkeeyye, irroota qaropa fayyade ka kute'e. Tamaarewwaadi ka isha kapopa de'en.

² Ikka asse kide ka ishootta kollissa paayye:

Orra saka dukaata akkado

³ “Qoota mankisteeta moonta xaaysho koddite malla; orra kallaataaysho a hapuratin akka teekolaya kodden ishootta dakkannitto, i'eppisamen,

⁴ Qoota Waaqa ishootta xasa oorsho malla, a nyarrahana, i'eppisamen!

⁵ Naalaya qoota piita lehadan malla, i'eppisamen.

⁶ A hanqeelluma doxna ka deeponna, qoota duttanan malla i'eppisamen;

⁷ A diissata koona, qoota diissata akkadan malla, i'eppisamen;

⁸ A karitta fayya qapa qoota Waaqa akkan malla i'eppisamen;

⁹ A otanta orra oppa araara ka nakayta koona, qoota hellaa Waaqa kidaman malla, i'eppisamen;

¹⁰ A hanqeelluma malla pora daanamma qoota mankisteeta Waaqa xaaysho koddite malla, i'eppisamen.

¹¹ “Oto orra ana minan ishin onno ka pora ishin daannoyye, ka dartan maxxaayshin patinnooyye, xasa a ishina dakaado

¹² wa moonteeyye se kapa akkattane qoota kutti malla, xasa a ishina dakaado ka a kuttati xasooda ishootta xuumampaya a ishin turan ca qara'e asseew pora daanama isho rakkoota kaytisheneey.”

Pahana a la'ayta ka a sookitta

¹³ Kamma desa Yesuusi ikide, “Ishina piita'e a sookitta mina. Ma xoori sookitta otoo marmaddumaadi dapooyye, atta marmaddaawa ettansha? lakopa alle katama, orra ka loqqan qara aana diisheey, itturopa we'en nakaysho.

¹⁴ “Ishina piita'e alla'ayta mina katama irroota qara qupame dekattan ettanshan.

¹⁵ Orra oto ipsa la'ayshoyye akka nama a tika kela co piisa la'ayane'e, pora a opeela kide qara'e xaayni diisheey opani qara toma qupaapni in caan.

¹⁶ Akkamose mina'ew orra akka kodaayshin a paxaara akko ka aappase xaayshin a moonta kalataysado'e, la'aytaayshin a orra piisa tura la'ayo.”

Qoota seera Muuse desa

¹⁷ Kamma desaaw Yesuusi ikide, “Anti, a seera Muuse isho kollissa a xuumampaya alle hattissa de'e ishina'en pahanaannin. Dikkissaa'en de'e diisheey, hattissa an deene.

¹⁸ Anti dukaatannen ishina kiini, haka piita isho moonta tarpinaan kara'e, seera Waaqa piisa dikkada diisheey, seeroppaayye puussota takka taaki uqqinta takka nefo in patto.

¹⁹ Semmalla nama ajajaddasene oppaayye a shakka takka nefo qepsho ka akka orra pila asseew kodo kollinnoo mankisteeta moontatiiyyi a shakka kodda. Ma xoori nama ajajaddosen piisa tooytanno ka akka orra pila asseew kodo kollinno, mankisteeta moontati a kutta kodda.

²⁰ Semmalla oto hanqeellumaassin, hanqeelluma a kollissampaya a seera isho a Feresata qara in jaalliniiyyi, pakkanna akka mankisteeta a moonta opa a kalinnin ishina lelli.”

²¹ “Wa orra xatta kallaadeti kidame idakayten isheetta nefo ikiini ‘In ishshan; a nama ishshe qara ifaratamtaay’

²² Anti xoori in ishina kiini, nama a nama qara miironno piisa qara'e faratamta semaliiyyiiw nama a nama onno ka kiino, ‘Toofo’ piisa qara'e firtishoonkota farata nama a nama onno ka kiino, ‘Eepo’ piisa qara'e, apitta a libbini in kinninii faratama

²³ Semmalla, atti oto kalisootaayti porose a kalisoota qara Waaqa kalinittooyye; ka akka nama a ke qara nyarrahe co matte oorsattooyye,

²⁴ Kalisootaayti porase a kalisoota tura xaaye ka aane ka paayyota innasene xaayshin olli araarame ka kuli tiitaawe ka kalisootaayti kalshe

²⁵ Oto paarkaalaatti ke xasasaneeyye akka ollin tika firrteeta opa annittaneyye, a poroppa kittooyyeew irraqara paarkaalaatti olli kala. A taakiti paarkaalaatti taanynya'e ke tarpisha taanynya ka turaayye a ke hido ke tarpisha akka hidamtaay.

²⁶ Dukaatannen ke kiini, haka kaaja a ke qara faratame piisa isqara xaffallitto kara'e pakkanna eeyye kara a sookto.”

Kollissa qoota dahala taaki a dahalsatta dawretati desa daasame

²⁷ Kamma desaaw Yesuusi ikide, “Akkima ‘In dahalan’ kidamte iddakayten

²⁸ Anti xoori in ishina kiini, nama a iskatteeta opa tooyyade ka isheetta xajeele piisa, siti iskaran xata i'isheetta dahale

²⁹ Oton iltaayti a'akkitta minanni juppoota kooniyyi, iskaraayye qote ka alle kate a dakintayti piisa apittase libbinin kinnin oppopa katamto kapa, a dakintaaytippa meela takka dapto ke wayyiiy

³⁰ Oton iharkaayti a akkitta minanne juppoota kooniiyyi, isi quda mura ka alle kate a dakintaayti piisan apittase libbini in kinnin oppopa katamto kapaayye, a dakintaayti oppa meela takka dapto ke wayyi.”

Akka diirta isho iskatteetaadi oli in diinnini'i kollissa daasame

³¹ Ikidamte'e “Nama a iskatteetaadi alle diinno piisa a warqata ishin isheetta diishe isheetta daasho”

³² Anti xoori in ishina kiini, “A in dahallsannin mali nama a iskatteetaadi alle diinno piisa, akka dahalsatto'e kooni a iskatteeta alle diisamte hemino piisaaw, dahalmayta kodda.”

Akka xaxa dawramene kollissa a daasame

³³ Orra a xatta kallaade'e “Akka kidamte, ‘Darta qara'en xaxadan ma xoori wa a xaxattene poqalla dikkisha;’ Idakayten

³⁴ Anti xoori in ishina kiinii, pakkanna in xaxadan. Moonta qoota suufaana Waaqa koddite malla; moontannen xaxadan.

³⁵ Piita nefoow qoota pora oppa Poqalla loqqa qapanno koddite malla piitannen xaxadan yursaalami nefo qoota katama Nuqusase kuttati koddite malla ishinnin xaxadan

³⁶ ‘Qoota nyirfaattippa takka nefo attassa taaki poornassa a ettaninnin malla issi nefon an xaxadan;’

³⁷ Semmalla haasaassin oto ‘Aayye, Aa’ oton ‘Hee'eyye,’ hee'e a kodden; lela a sede qaropa co xoori a seetana'ey.”

Haalota qeedeeta akka parpaaccisni in kinnin

³⁸ “Akkima kidamte, ‘A ilta kapa ilta ka ilkitta kapa ilkitta idakayten’

³⁹ Anti xoori in ishina kiini, nama a neequmta ishin qara koono qara haalota in qeedan ma nama a dapnaayti a akkitta kandinno'e, a pittitta ishi tiitaysheew.

⁴⁰ Nama takka kadi xootetaayti teyyatta heena ka ke xasasaayye, kaappaatti kuli qara ishi daashew.

⁴¹ Nama takka kadi pora shakkayta ana olli aane kida ka ke kitteessaayye, pora seka kuli opa isha olli aane.

⁴² A ke qara qinsanno daashe, umma nama a ke qara leqessatta faano an dawran.”

Qoota paarkaala jaalattaati desa

⁴³ Kamma desaaw Yesuusi ikide, “Akkima kidamte, ‘Innaassina a piita jaalado ka paarkaalaatti needde’ iddakayten

⁴⁴ Anti xoori in ishina kiinii, paarkaalaassin jaalada ka orra ishin jiijno saka; ka a ishin needdannaati'i wa paxaara koda; ka aishin qara wa neeqa koona ka pora ishin daannaati Waaqa qinsada.”

⁴⁵ Oton sede kootaneeyye, hellaa a appaase xaayshin moonte kalooti'i koddita. Isha ukkuttowwa isho orra paxaara'e lettaadi piirinni; ka asseew hanqeellaya isho karpampaya'e roopaadi roopinni.

⁴⁶ Kadii orra ishin jaalanno pattaw jaalannittaneeyye, maana kamma teytan? Juppoolaya kuli asseew kooni in caane?

⁴⁷ Oto hellaassina a piita patta qara harka qeennittaneyye, wa jaalla maana koonittan? a Yihutaata in koddinin asseew kooni in caane?

⁴⁸ “Semalla akka a aappase xaayshina a moonta qaja in qapnin mina'e, ishina asseew a qaja in qapnini kodda.”