Maatiyoosi 4 - Mataafa Qulqulloota

Yesuusi akka ekkaysatame

¹ Sekkammaayye Yesuusi akka taapiloosin ekkaysatamo'e, Hapura Waaqa koommaytopa ishan aane.

² Ete kuyyaata kunda afuri ka halkeetta kunda afuri damta musade kammaayye ido'e.

³ Ekkaysattampaytase ka Yesuusi kapopa de'e ka ishi kide'e, “Atti oton a inna Waaqatiiyyi, intoonney, dakaddosen akka dama koddane ajajeey.”

⁴ Yesuusi xoori i'ishi kide, “Itaafamte ka kiini, ‘Nama, qaaleta afaa Waaqa oppa sookte piisanne kallaanni diisheey, dama pattan kallaanni in co.’”

⁵ Sekkammayye taapiloosi ka katamasene qulqullaawe a Yursaalami opa Yesuusin aane ka tika qulqullootati kuuta qara isha qaatishe,

⁶ ka ishi kide, “Itaafamte ka kiini, ‘Akka loqqaati daka qara in kehaysannini'i, akka harkaassotin ke keleela qapane'e, erkampattowwaadi ke ajajaay,’ oton a inna Waaqatiiyyi, are xata kumpaappe isi shuule.”

⁷ Yesuusi ka ishi oorshe ka kide, “Itaafamte ka kiini, ‘Waaqa Poqallaattin, ekkaysadan.’”

⁸ Taapiloosi ka oppa oorew ka irroota akata dera qaropa Yesuusin aane; ka mankistewwa piita piisa isho ulfeenaaysho ishi akkishe.

⁹ Ka ishi kide “Kadi ana tura piita ka ana sakatattaayye, sene piisan ke daasha.”

¹⁰ Sitiiyyi Yesuusi ka ishi kide, “Atti seetano, aane! itaafamte ka kiini, ‘Waaqa Poqallaatti sakatado ka isha pattaaw waaqaysado.’”

¹¹ Sekkammaayye Taaploosi ka Yesuusi diishe. Erkampattowwa Waaqa ka de'en ka isha qara tooyen.

Yesuusi akka kodaadi a kollissa piita Kelilaati paayye

¹² Yesuusi ete akka Yohaannisi hidame dakayeyye, piita kelila opa aane.

¹³ Ka katama Naasirati alle diishe ka katamasene a Qifirnahoomi piita a Saapilooni isho a Niftaalemitiiyyi pakateeta Kelila kapa caati kallaade.

¹⁴ Sede nefo wa malla asse koddite, qaalese a xuuma a xuumampaytase Issayyaasi haasawade ka kide,

¹⁵ “Piitaddasene porase pakateeta kapopa anno kapaayye caa ka kirra Yurtaanoositiiyyi afa disitiiyyi ca, A Saapilooni ka a Niftaalemi, isho a Keliila orra Yihutaata in koddinini;

¹⁶ Samaytase tukkanta oppa kaloo la'ayta kutta akke; a piitase a kaatta toota qara pi'e, oppa kalaati'i la'ayta ka piire.” akka dikkatto malla.

¹⁷ Sitiiyyi paayyatte Yesuusi ka torra paayye ka kide, “Mankisteeta a Waaqa idehaatteey, juppootayshin oppaayye oora.”

Yesuusi akka Nama afuri a murkuja qapanno hale

¹⁸ Yesuusi ete pakateeta a Kelila kapan tarpinooyye, hellaa a toola lakki a murkuuja qapanna'e akke, ishootta Simoonise Peetiroosi kidammo isho innaasso intiriyaasi. Ishootta sitiiyyi nyupuraasso pakateeta karopa kanni.

¹⁹ Yesuusi ka ishootta kide, “Ana kamma xooya! akka murkuja qapanittan mina'en akka ana orra ollopa haleetane'en kodaay.”

²⁰ Ishootta ka eennow nyupuraasso alle diishen ka isha kamma aanen.

²¹ Ikka eeppaayye desa tarpe ka hellaa a Septiyoosi lakki; Yayqoopi isho Yohaannisi akkew. ishootta nefo aappaaysho Septiyoosi ollinni koonka kara caan ka nyupuraasso harmisanni; ikka ishootta haleew;

²² ishootta ka eennow aappaaysho ka koonkasene alle diishen ka isha kamma aanen.

Yesuusi akka orra lekayta kollishe ka paaqolaya lekaya dinshe

²³ Yesuusi ka tikkasene a qinseeta a orra Yihuta kela kollissanne, ka otootase a fayya amankisteeta Waaqa torreetanne ka a paaqa isho deesa ika lekaytan qapame dinissaanne, piita Kelila piisa oppa tittiitaawni.

²⁴ Qoota kurraadi piita Sooriya pisoppa dakaade malla; orra ka a paaqa isho deesa ika lekaytan miidamma ka a orriyyaan qapame ka a mawna isho totoonnaya piisan isha kapopan de'e; isha ka ishootta dinshe.

²⁵ Orra a piita Kelila ka katamaddasene kudan ka Yursaalami isho Yihuta karaayye ka Yurtaanoosi afa disitiiyyi de'e kuttayta ka isha kamma aane.