Maatiyoosi 3 - Mataafa Qulqulloota

Qaaleta a Yohannisise pishaan orra jaqino torre

¹ Sitiiyyi Yohannisise pishaan orra jaqno koommayta Yihuta oppa qaaleta torreetan deeni ka kollinni ka kiini,

² “Tin mankisteeta Waaqa idehaatteey, juppootayshin oppaayye oora!”

³ Isaase a xuumampaytase Issayyaasi haasawade ka kide, “Nessa nama a salinno ka kiino ‘Pora Poqalla harmisha ka saantaadi nefo ishi qajeelsha’ Qoota Yohaannisi desaa lelli;” Sede isha.

⁴ Mehadda a Yohaannisi kalsanna nyirfa kaala oppa kodamen, surraadippa salpata kollatta'e hidanni, damtaadi nefo torrayta ka takma taammata.

⁵ Sitiiyyi Yursaalami desa ka piita Yihuta pisa oppa isho piitadda kirra Yurtaanoosi kapan desa ca pisoppaayye orra ka Yohaannisi kapopa deeni.

⁶ Ka juppootaysho lelanni, ka kirra Yurtaanoosi oppa harka Yohaannisi oppa jaqammi.

⁷ Ma xoori Yohaannisi ete Feresaata isho Saatuqaatoppa lekaya isha kapopa jaqqatta deenaan ikka akkeeyye, i'ishootta kide, “Ishina hella maakaatiiyyi, miirase a Waaqa deeno kelaayye akka qahatane'e ayno tura desa ishina lele?

⁸ Asseeyye, koda akka a juppootayshin oppa oorten akkinno koda.

⁹ ‘Ino an hella Aprihaami’ kideetanne a kela pahatan ishina'en pahanaannin in ishina kiinii Waaqa dakaddosen oppaayye, Aprihaami'i, hella xa'issa iettanshaay

¹⁰ Amma xoori erkaha qora kela xaayame; Semmalla qoyra dalta fayya dallin kinnin piisa imurama ka apittoppopa katama

¹¹ Tin anti juppootoppa oorissa'en pishaan ishin jaqini, a ana kamma de'o xoori, Hapura Qulqulloota isho apittanne ishin jaqa isha ana qaropa a kuttate jaalli anti isha kela xopa loqqaadi mikka haadeta mina an qanne

¹² Isha simaata harkoppa qapade ka ishin fayya awtataappa kappa xayyisha ka miillata kootaroppa kalsha; ka ukkashsha apitta libbini in kinninin kupa.”

Akkima Yohaannisi Yesuusi pishaan jaqe

¹³ Sitiiyyi Yesuusi akka harka Yohaannisippa jaqamo'e piita kelilaati desa kirra Yurtaanoosi opa de'e.

¹⁴ Yohaannisi ka isha dawrini ka kiini, “Asse in koddito anti harkaaytippa jaqama ana parpaaccisniiyi, ata xawwa atti atta ana kapopa deeni?”

¹⁵ Yesuusi xoori i'ishi oorshe ka kide, “Saantosetinni koda hanqeelluma piisa dikkissa ino faaniy, amma diishe ikka asse koddito” Yohaannisi ka oppa owsade ka isha jaqe

¹⁶ Ete Yesuusi jaqameeyye sooka pisha oppa sookenne, moonta paname. Ikka Hapura Waaqa a eleela pahanaade ka Yesuusi qara lekkanno akke.

¹⁷ Sitiiyyiw nessa a kiino “Tin inii innasene xayyo an jaalanna ka mikta ishin xasoonna” Ka moonte xata dakaade.