Maatiyoosi 18 - Mataafa Qulqulloota

Ayno nama piisa qara jaalli

¹ Sitiiyyi tamaarewwa Yesuusi, Yesuusi kapopa de'en ka isha kaassaden ka kidene, “Ata amma mankisteeta moontatiiyyi a orra piisa qara jaallo ayno?”

² Yesuusi ka inna takkan shakka hale ka otantaaysho oppa qaatishe

³ ka kide, “Dukaatannen ishina kiini, oto ishina a pursammin ka akka hella shashakka mina a koddininiiyyi, pakkanna mankisteeta a moonta oppopa a kaltan.

⁴ Nama akka innoosen shakka mina mattaadi xata shakkinno piisa, mankisteeta moontatiiyyi, isha piisa qara jaalli.

⁵ Nama inna asse ca takkan maxxiyyon teyyanno piisa, ana teyyanni.”

Nama tura kehayta koddeeta kela isi tooytaatta

⁶ “Nama a sene shashakka ana amane oppaayye takka akka kamma dapo kodo kapaayye, kati yomatta kuttayta xolmaappa ishi hiddan ka pakateeta karopa isha katane ishi wayyi”

⁷ Kamma desaaw Yesuusi ikide, “Qoota wa juppoota orra kodacciisna malla, piita oo ishootta kido! Wa juppoota orra kodacciisa irreetan deena in diishan. Ma xoori nama a minan wossen juppoota orra kodacciisa de'an, oo isha kido.

⁸ Oton harkaayti taaki loqtaayti akka juppoota kooto ke kooniiyyi, isquda mure ka alle kate. A harka lakki taakiti loqqa lakki qapnaatto ka apittase libbini in kinnini oppopa katamto kapaayye, a toonnayta taaki kumuddayta harka qapnaatto ka caatta parapara akkatto ke wayyiiy

⁹ Oton iltaayti akka juppoota kooto ke koonniiyyi, iskara sookshe ka alle kate a ilda lakki qapnaatto ka apittase libbini in kinnin oppopa katamto kapaayye, a ilta takkaaw qapnaatto ka caatta parapara akkatto ke wayyiiy.

¹⁰ Sene shashakka oppaayye akka takka nefo ishina a puyannin tooytaada in ishina kiini, erkampattowwaasso awta piisa fuula aappase xanno moonte kalo oppa tooyniiy

¹¹ [Inna a nama isasene pate fadeeta ka dinissa'e de'eneey.”]

Pahana kahirta patte ka teyatte

¹² Kammadesaaw Yesuusi ikide, “Nama takka kati kahirra dippa qapaayye, takka ka oppaayye mayyaaqtaayye, kahirrasene kunda sakali sakal irroota qara diinni in co ka anni in co ka ise mayyaaqte faani in co? Mon atta ishina pahata?

¹³ Dukaatannen ishina kiini, oto akkooyye, kahirrasene in mayyaaqnini kunda sakali sakali kapaayye, sede takkanne a qaran qapto xasoonni.

¹⁴ Akkamose mina'ew, aappase xaayshin moonte kalo, sene shashakka oppaayye akka takka nefo pato in heeno.”

Nama dapa kode'e maana koda akka parpaaccisnitto

¹⁵ Kammadesaaw Yesuusi ikide, “Oton innaassina ishin ke dapaayye, aane ka pora oppa ishin lakki patta ollin kittan oppaayye, dapaadi ishi lele oton ike dakayeeyye, innaassin issipa i'oorisse.

¹⁶ Oton ke'e in dakaynin xoori, haasa maakkitta lakki taaki sessa maakkuma idukaysatammiiy, nama takka taaki lakki isquda qeedeew.

¹⁷ Oton ishootta'e dakaya tiitaayyeew, maapara amanteetati lele; oton maaparase a amanteetati dakaya tiitaayyeew oori, akka nama Waaqa amnni in kinnin ka juppootaadippa oorri in kinnin kapa isha dike.

¹⁸ “Dukaatannen ishina kiini, nama piisse qara issippa seertan piisa, moonteeyye asseew a seerame kodda; nama piisse qara furtan piisa, moonte asseew a furame kodda.

¹⁹ In ishina kiiniwwi, ishin oppaayye nama lakki kati piita qaraayye wa qinsatta faanaane takkan qara olli kalan ka qinsadaneeyye aappase xanno moonte kalo i'ishootta daasha.

²⁰ Pora oppaayye nama lakki taaki sessa maxxiyyon ollopa aano oppaayye, anti otantaaysho oppaayyen caadaay.”

Alekatin ishindapayta olli diissata

²¹ Sitiiyyi Peetiroosi ka Yesuusi kapopa dehaade ka isha kaassade ka kide, “Poqallaay, oto innaanno ishin ana dapaneeyye, meeqaannen ishi diisha? Hela haka tappati'in ishi diisha?”

²² Yesuusi ka ishi kide, “Tappaan kunda tappaan ishi diishen ke kiini diisheey, tappa pattan ishi diishe an ke an kiini an co.

²³ Semmalla mankisteeta moonta, nuqusa takka kaaja a orxayaadi qara qapa dika faano pahata.

²⁴ Ete nuqusase kaajasene dikatta paayyeeyye, ikka orxayta takka a nuqusase isha qara pirrewwa dikoota in qapnini qapo isha turopa dehayshen.

²⁵ Qoota orxaytose kuuroose oorissa malaale malla, poqallasene ka kuurase oorissaa'e akka isha ka iskatteetaadi ka hellaadi isho wa qapa piisa katamane ajaje.

²⁶ Orxayse xoori, loqqa nuqusaseti kela'e kilpiippade ka isha naappade ka kide, ‘Poqallaay, ana' duupado, piisan ke oorshaay.’

²⁷ poqallasene ka isha suraysaden ka kuurase ishi diishe; ka isha kalshe.

²⁸ “Orxaytase xoori ete desa sookeeyye, orra ollin orxumen oppaayye, orxayta takka a qaraayye dakara pirreeta dippa qapo akke ka qape ka niike; ka ishi kide, ‘Kuuriyyo ana oorshe!’

²⁹ Namase a ollin orxumen ka loqqaadi kela pi'e ka isha naappade ka kide, ‘Innayti ana' duupado, piisan ke oorshaay!’

³⁰ Isha xoori itiite; ka aane ka haka kuuraadi oorinno kara'e, tika hida kela isha hidacciise.

³¹ Orxayaasene a ollin orxummaane ka wa kodde akken ka harmo nyarrahen ka aanen ka wa kodde piisa poqallaassoti torren.

³² poqallasene ka orxaytase halacciisen ka ishi kidene, ‘Atti a orxayta neeqa, qoota ana naappatte mallan, kuuroose piisa ke diisheey;

³³ Ka kuli akkiman anti ke diishe mina'e, orxayse a ollin orxummittane'e diissata ke faani in kitto?’

³⁴ poqallasene ka oori miiroden ka haka kuurase xaadi piisa oorinno kara'e, harka foolisoota a isha miiddito oppopa isha tuukke.

³⁵ “Ishina takka takkaayyeew, oton innasene xaayshin Waaqa amannaati, karitta kareela juppootaaysho ishi a diinniniiyyi, aappaase xanno moonte kalo asseew ishin qara koda.”