Maatiyoosi 12 - Mataafa Qulqulloota

Kaassuma qoota sampataati desa dehaade

¹ Sitiiyyi kuyyaata takka a sampata a Yihutaatiiyyi Yesuusi dula kappa oppa desa tarpini, tamaarewwaadi ka doddoxen ka maanqaase a kappa me'atta ka dameeta paayyen.

² Feresaata ka sede akkite ka Yesuusi kiite, “Tin tamaarewwasene xaayti wa sampataayye dawrame'e kooni”

³ Isha xoori i'ishootta kide, “Taawwiti, isho orra isha olli co ete doxeneeyye, wa a kode ishina a nappapne?

⁴ Ha tika Waaqa kelopa kulle ka laaqqotase kalisoota Waaqati daasamte a qeesewwa maliiyyi isha isho orra isha olli co damta in faqqatammin dame.

⁵ Qeesewwaaw, akkima kuyyata sampataati tika qulqulloota kela sampata nyalinnaan ikka juppoota ishootta qara dikammi in kinnin, ishina seeroppaayye a nappapne?

⁶ Ma in ishina kiini, ‘Ha a tika qulqulloota qara qapo are ca’

⁷ Kadin isase kiinitto, ‘Tin anti diissatan jaalanni diisheey, kalisoota an jaalanni an co’ Uptan kiiteeyye; helaniiyyi orra dapa in qapnin qara dapa a murri a heenne.

⁸ Maana malla, inna a nama sampata kuli qaraayyen poqallaay.”

Yesuusi akka nama takka harkan toonnaawe dinshe

⁹ Yesuusi porase oppaayye xa'e ka tikase a orra a Yihuta a qinseeta kelopa kulle.

¹⁰ Nama takka a harkaadi tupa toonnaawe ka eyye ca. Ikka wa minan isha xasasane akkatta malla isha kaassaden ka kidene, “Hela sampatan nama dinissa ifaqqatamte?”

¹¹ Isha ka ishootta orshe ka kide, “Ishin oppaayye nama a kaharta takka qapo ikka sampatan qaawa karopa tura pi'itooyye, a in qeennin ka qaawa kara in fayyinnin ayno?

¹² Ka kuli nama atta kahirta qara in qapnin? Semmalla sampatan koda paxaara kodeeta ifaqqatamte”

¹³ Ka sekkammaayye namaseti kide, “Harkaayti derayshe” Ikka derayshe harkase xaadi ka dine ka isase a takka mina fayya qapnaade.

¹⁴ Feresaata ka oori lakopa xata sookte ka saanta ishin Yesuusi ikasso sulatte.

Orxaytase a Waaqa reexade

¹⁵ Yesuusi ka sullaase xaaysho upnaade ka eeppaayye alle qinda kode. Orra lekayta ka isha kamma de'e, ikka paaqolaya piisa dinshe.

¹⁶ Ka akka qootaadi desa nama takka nefo in lellini'i ishootta ajaje.

¹⁷ Sede nefo isase a xuumampaytase Issayyaasi haasawade ka kide,

¹⁸ “Ha ini orxaytase xayyo an reexade! Anti ishan jaalanni ka ishin xasoonni; anti hapuriyyon isha daasha; ikka lekna piisa firteeta dukaata salisha;

¹⁹ isha pora paata in shiisho ka pora in ullupo; umma nessaadi porraappa in dakaytisho.

²⁰ Haka firteeta dukaata putayma qaran kayno'e, leyma a qepa foolsade nefo in qepsho, umma ipsa libba foolsade nefo in libbisho.

²¹ Lekna ka isha kippada.”

Yesuusi isho pe'elesepuli

²² Sekkammaayye orra ka nama takka joole ka haasa ettaninni in kinnin a orritta kara con isha kapopa de'e. Yesuusi ka isha dinshe, ikka paata akke ka haasawatta ettanshe.

²³ Orra piisa ka oppa qawwaawe ka kiini, “Hela kati isha innasene a Taawwiti kodda?”

²⁴ Feresaata xoori ikiite “Ha namoose pe'elesepuli saarase a orrittatinni orriyya sookinni.”

²⁵ Yesuusi ka dikattaaysho upnaade ka ishootta kide, “Mankisteeta lakki qinnitto ka oli torpinitto piisa ipanni; paleeta taaki toola a lakki qinno piisa kallaanni in co.

²⁶ Oto seetana seetana sookinnooyye, isha lakki olli qiteey mankisteetaadi atta kallaata ettanissa?

²⁷ Oton anti pe'elesepulin orriyya sookinnooyye, hellaassin aynonne orriyya sookinniiw? Semmalla hellaassinaaw ishin qara farata.

²⁸ Ma xoori, oton anti Hapura Waaqatin orriyya sookinnooyye, oori mankisteeta Waaqa i'ishin kapopa deete kideeta.

²⁹ Nama takka a paayyota nama kokkoka in punnin ka in hiinin mali, atta tika namoose kokkoka opa kulla ka meehaadi poota ettansha? Oto namase kokkoka puto ka hido kammaayye, meehaadi pootatta ettansha diisheey

³⁰ Nama ana quda in koddinin ana toorri; a ana olli qapsanni in kinnin alle'e fiini.

³¹ Semmalla in ishina kiini: juppoota isho otitta piisa i'orra diisama. Ma xoori nama Hapura Qulqulloota onno, ishi in diisamto.

³² Nama inna a nama qara afa neeqa haasawanno piisa, i'ishi diisamta; ma xoori, nama Hapura Qulqulloota qara afa neeqa haasawanno, kallaata amma ka itturopa oppa'e ishi in diisamto.”

Qoyra deltaadinni upnaysammi

³³ Kammadesa Yesuusi ikide, “Qoyra deltaadinni upnaysammiiy, qoyra paxaara qapnaada; deltaadi ipaxaarnaattaay oton qoyra neeqiiyi, deltaadi ineeqnaattaay.

³⁴ Ishina hella puutotati, a orra neeqaay! Atta wa paxaara haasawatta ettanissan? Nama wa karittaadi kara immakaade ka qara hase'e afaan haasawanni.

³⁵ “Nama paxaara wa paxaara a karittaadi kara immakaade oppeela wa paxaara'e sookinni; nama neeqaaw wa neeqa a karittaadi kara immakaade oppeela wa neeqa sookinni.

³⁶ Anti in ishina kiini, orra, afa a tupadesa haasawade piisa kapa'e kuyyaata firteetatiiyyi kaassatama.

³⁷ Afaatti a haasawatta minanne ke faratamta ka afaatti a haasawatte minanew ke qara faratamta.”

Kaassuma wa orra qawwanna akkeeta malla dehaade

³⁸ Sitiiyyi kollissampaya a seera isho Feresaatoppaayye orra demo ka Yesuusi kaassade ka kide, “Kollissampayto, oto wa orra qawwanna koonittooyye akkeetan faaninna.”

³⁹ Isha xoori i'ishootta oorshe ka kide, “Ukkuttoota xelta a Waaqa amanni in kinnin wa orra qawwanna akkaaw faani wa a orra qawwanna a xuumampaytase a Yoonaasi mali, wa orra qawwanna a pila xeltoseti in daasaman

⁴⁰ Yoonaasi akkima karitta naacca kara kuyyaata sessa ka halkeetta sessa pire mina'e, inna a nama akkamose mina'ew, hawla kara kuyyaata sessa ka halkeetta sessa piran.

⁴¹ Orra Nenewwe qoota qaaleta Yoonaasi torre dakaye ka juppootaysho oppa ooren malla, kuyyaata firteetati orra xeltooseti olli xa'an ka xeltose qara faratan ma ha a Yoonaasi qara qapo areeyye ca.

⁴² Nuqusitteetase a piita tupatta qoota ookuma Selomooni dakaya pora sekaayye deete malla, kuyyaata firteetatiiyyi orra xeltooseti olli xaata ka xeltose qara faratta ma ha a Selomooni qara qapo areeyye ca.”

Hapura neeqa akkima nama karopa oorro

⁴³ Kamma desaaw Yesuusi ikide, “Hapura neeqa oto nama kara sookooyye, pora oppa nessado faddatta'e, pora a oppa pisha in kinnini oppa pora anni, umma teyni in co.

⁴⁴ Ka issi kiini, ‘Tikase an kara sooke opan oora.’ Ka oto oorooyye tikase a xatta a lulle kitto a kela sahamte ka harmisamte akkini.

⁴⁵ Ka oori anni ka hapurra a nenneequma isha qara qapa, tappa isiquda qeenni ka namoose karopa kalli ka kara kallaanni. Rakkoota namooseti a kamma oorisse ka a paayyota qaran qapto isha qara koopni; xeltose are neeqa qara'e tooy, asseew koddita.”

Aayya opa Yesuusi isho hellaasso

⁴⁶ A Yesuusi sede samayta haasawattaappa cooyye; aayyaasso isho hellaasso isha olli haasawatta faden ka lakoppa qa'aden.

⁴⁷ Nama takka ka ishi kide, “Ha aayyaassin isho hellaassin lakoppa'e qa'aden ka ke olli haasawatta faani.”

⁴⁸ Yesuusi xoori i'ishi oorshe ka kide, “Ata aayyaanno ayno? Hellaanno kan opa ayno?”

⁴⁹ Ka harkaadin tamaarewwaadipa akkishe ka kide, “Hellaanno ka aayyaanno tin sene.

⁵⁰ Nama fiqaata aappinno a moonta koono piisa, ishan innaanno ka enentinno ka aayyaanno.”