Maatiyoosi 1 - Mataafa Qulqulloota

Meera deloota Yesuusi Kiristoosi

¹ Isase sanynyeeta Taawwiti isho a Aprihaami koddeeti.

² Aprihaami Hisaaqi xaaye. Hisaaqi ka Yayqoopi xaaye. Yayqoopi ka Yihuta isho hella opa Yihuta xaaye.

³ Yihuta ka iskatteeta takka Ti'imaari kidammittoppaayye faaresi isho saara xaaye. Faaresikka Hesrooni xaaye. Hesrooni ka Araami xaaye.

⁴ Araami ka Aminataapi xaaye. Aminataapi ka Na'asooni xaaye. Na'asooni ka Selemooni xaaye.

⁵ Selmooni ka iskatteeta takka Re'aapi kidammittoppaayye Po'eesi xaaye. Pooesi ka iskatteeta takka Ruutti kidammitto oppaayye Iyyopeeti xaaye. Iyoopeeti ka Issey xaaye.

⁶ Isseyi ka Nuqusase Taawwiti xaaye. Nuqusase Taawwiti ka iskatteeta a orriyyo oppaayye Selomooni xaaye.

⁷ Selomooni ka Roopi'aami xaaye. Roopi'aami ka Apiya xaaye. Apiya ka Asaafi xaaye.

⁸ Asaafi ka Iyyoosafiiti xaaye. Iyyoosafiiti ka Iyyoorami xaaye. Iyyoorami ka Oosiya xaaye.

⁹ Oosiya ka Iyyo'ataami xaaye. Iyyo'ataami ka Akaasi xaaye. Akaasi ka Hisqiyaasi xaaye.

¹⁰ Hisqiyaasi ka Minaase xaaye. Minaase ka Amoosi xaaye. Amoosi ka Iyyoosiyaasi xaaye.

¹¹ Iyyoosiyaasi ka xeltase a oppa samayta Isira'eeli piita Paapilooni opa poojameeyye, yo'akiini isho hellaasso xaaye.

¹² Piita Paapilooni opa poojameeta kammaayye, Yo'akiini Selatiyaali xaaye. Selatiyaali ka Serupaapeli xaaye.

¹³ Serupaapeli ka Apiyuuti xaaye. Apiyuuti ka Eliyaaqeemi xaaye. Eliyaaqeemi ka Asoori xaaye

¹⁴ Asoori ka Sattooqi xaaye. Sattooqi ka Akiimi xaaye. Akiimi ka Eliyuuti xaaye.

¹⁵ Eliyuutti ka Ali'asaari xaaye. Ali'asaari ka Maattaani xaaye. Mattaani ka Yayqoopi xaaye.

¹⁶ Yayqoopi ka Yoosefise a Maariyaamise Yesuusise xaayte hemitta ishi qapatamte xaaye. Yesuusi nefo Kiristoosi.

¹⁷ Semmalla xelta Aprihaami paayyatte haka xelta Taawwititi'i, xelta kudanka afuri. Xelta Taawwiti paayyatteew haka piita Paapilooni opa poojameetati'i, xelta kudanka afuri. Piita Paapilooni opa poojamaayye paayyatte haka xelta Kiristoosi xelta kudanka afuri.

Akka Yesuusi Kiristoosi delade

¹⁸ Yesuusi Kiristoosi saanta ishin dalade; Aayyaasso Maariyaami ete Yoosefi hemitta qapatamteeyye, a ollinin muknin turanne Hapura Qulqullootatin inna hitte.

¹⁹ Yoosefise a ishi hemitta qapatamte xoori, qoota nama fayya kodde malla, orra tura Maariyaami laka sookissa in faane, ma dekoottan alle isheetta diissata dikade.

²⁰ Ma xoori isha a sede dikattappa cooyye, erkampattoota a Poqalla olsaan ishi akkaatte ka ishi kiite, “Yoosefi ke a sanynyeeta Taawwiti kodde, Maariyaamise hemitta ke qapatamte, qoota Hapura Qulqullootatinni inna hitte malla, tikaaytipa isheeta teyyatta in fuuran.

²¹ Isheetta inna diirta'e xaayta; isha qoota juppootoppa samaytaadi dinsho malla, maxxaadi Yesuusi kiita ka haleeta.”

²² Sede piisa wa malla asse koddite, isaase a Poqalla xuumampayta qudan haasawade ka kide,

²³ “Tin enenta issin kitto hita ka inna diirta xaayta. maxxaadi nefo Amaanu'eeli kidama.” Ka halaama akka dikkatto malla. Amanueeli kideeta, Waaqa ino olli ca kideeta.

²⁴ Yoosefi ete mukittaappa impaseeyye, akka erkampattoota poqalla isha ajajite qara'e, Maariyaamise hemitta ishi qapatamte tikaadipa teyyade.

²⁵ A koddito ma haka innaadi xaaynitto kara'e ollini in mukne. Ka maxxaadi Yesuusi kide ka hale.