Luqaasi 9 - Mataafa Qulqulloota

Erkamampayasene kudanka lakki akka kollissa erkamen

¹ Yesuusi erkamampayasene kudanka lakki iskapopa hale ka hupna isho ukkumeeta a ishin orriyya sookshan ka deesa piisa dinshan, ishootta daashe.

² Ka akka mankisteeta Waaqa deete orra piisa torran ka paaqolaya dinshane ishootta erke.

³ Ka ishootta kide, “Oto annittaneeyye, we takkan nefo an teyyadan; uleeta koddite, qarateeta koddite, kalaata koddite, kaaja koddite, mehadda a kalsannaane a pila nefo koddite, isquda an teyyadan.

⁴ Tika a xaykuma karopa kullinitan piisa, haka paleese kara sooknittan ka annittan kara'e, eeyye'ew tawa.

⁵ Oton orrase'e ishin teyyanni in kinnin xoori, oto katamoosen kara sooknittaneeyye, kuyyaalayta loqqaassin quda dawdawada; sede maakkitta ishootta qara kodditaay.”

⁶ Erkamampayasene ka eyye xa'en ka porra piisoppa paaqolaya dininni. Ka palewwaappa anni ka otootase a fayya kollinni.

Herodisi akka kurra Yesuusi dakaye

⁷ Qoota orra demo torrino ka kiino “Ha Yohannisise pishaan orra jaqno tootoppa xa'e” Malla, Herodiisise piita kelila mukinno, wa Yesuusi kode piisa dakaye ka ikka tura ollin patte.

⁸ Akkimose mina'ew orra demo ikiiniwwi, “Ha xuumampaytase Eliyaasi oore.” Ademo ka kiiniwwi, “Ha xuumampaya xatta oppaayye takka tootoppa xa'e.”

⁹ Herodisi ka mattaadi kiini, “Yohaannisi qaraayye ana matta mursiiseey, kuli ini peepammo opan ka kiinaane wossen piisa kooni aynoow?” Ka mattaadi Yesuusi akka faani.

Yesuusi akkima nama kuma ken damshe

¹⁰ Erkamampayasene ka pora a opa erkameneeye kalen. Ka wa kodene piisa Yesuusi torren. Isha ka ishootta patta qeede ka pora takka katama Peetesayda kapa xawwi desa co opa ishoottan aane.

¹¹ Samayta ete Yesuusi ayysha akka co upnaadeeyye, isha kamma'e aane. Isha ka ishootta teyyade ka qoota mankisteeta Waaqati desa ishootta kollishe ka orra paaqa kela dina fade ka de'e piisa dinshe.

¹² Ete letta poornaannittooyye, tamaarewwasene kudanka lakki ka isha kapopa dehaaden ka ishi kidene, “Amma are koommaytoppan kinnaay, samaytose akka katamadda isho palewwa are kapandesa ca oppopa aano ka damta isho pora mukitta faddado'e, ishootta isi qara xaashe.”

¹³ Yesuusi xoori i'ishootta kide, “Ishina mattaayshina wa damane ishootta daasha.” Ishootta ka ishi kidene, “Ino laaqqoota ken ka murkuja lakki pattan qapnaay, hakan anno ka damta quda piddino maliiyyi, sede samayse piisa in kayto”

¹⁴ Samayse lekuma'e nama kuma ken mina'e ca. Yesuusi ka tamaarewwaadi kide, “Samayse akka nama kunda ken ken koddo ka ollin kuti'o koda.”

¹⁵ Tamaarewwasene xaadi ka akkima isha kide mina samaytase kutiishen.

¹⁶ Se kammaayye Yesuusi laaqqootase ken isho murkuujase lakki qeede ka moontandela tooyyade ka qara Waaqa kalataysade ka oppa moosse ka akka samaytaseti qootane'e tamaarewwaadi daashe.

¹⁷ Ikka piisani damen ka duttanen, tamaarewwaadi ka moossowwa orra kela hase satara kudanka lakki immakkoota pohen.

Peetiroosi akkima Yesuusi Kiristoosi kodde upnayshe

¹⁸ Kuyyaata takkaayye Yesuusi ete xawwaati Waaqa qinsannooyye, tamaarewwaadi isha kapopa de'en, ikka ishootta kaassade ka kide “Ata orra ayno ana kiini?”

¹⁹ Ishootta ka ishi oorshen ka kidene, “Orra demo ike kiinii, ‘Ha Yohannisise pishaan orra jaqno.’ A demo ka kiiniwi, ‘Ha Eeliyaasi.’ Orra pila ka kiiniiwi ‘Ha xuumampaya xatta oppaayye takka tootoppaayye xa'e.’”

²⁰ Ikka ishootta kaassade ka kideewe, “Ishina ayno ana kiinittaneew?” Peetiroosi ka ishi oorshe ka kide, “Atti a Kiristoosi.”

²¹ Yesuusi ka ishootta kokkonnayshe ka kide, “Sede nama takka nefo kapa an lelan.”

Yesuusi kamma anta wa kassannitta

²² Kamma desa Yesuusi itamaarewwaadi kide, “Inna a nama rakkoota kutta akkatta ishotta faani. Qimoota piita ka saarra qeesewwa isho kollissampaya a seera ka isha tuffadan ka ishshan. Ma kuyyaata sessattatiiyyi tootoppa ixa'a.”

²³ Ka ishootta piisa kideewwe, “Nama ana kamma deena heeno a isi qara karitta kutado ka kuyyaata piisa masqalaadi haadado ka ana kamma ishin de'o.

²⁴ Nama ana qaropeela issi suraysanno piisa, isi patinni. Nama ana malla kiino ka toota isi daanno xoori, issinni pahani.

²⁵ “Nama kati teyaanta piita piisa akkada ka kapan isi pashshaayye, maana isha qara nessissa?

²⁶ Nama ana ka qaaletiyyon jeerro piisa; inna a nama awta ulfeenaadi ka ulfeena Aappaayshoti isho ulfeena qulqullowwa erkampattowwaatin deenooyye, awwse ishan jeera.

²⁷ Anti dukaatannen ishina kiini, orrose amma are co oppaayye, a mankisteeta Waaqa in deenitto in akkinnin malli in toonini takka takka ca.”

Piissa Yesuusi akkima pursame

²⁸ Yesuusi a sede haasawade kuyyaata sette kammaayye, Peetiroosi ka Yohaannisi isho Yayqoopi isi quda qeede ka, irroota takka qaropa qinseeta fayyade.

²⁹ Ete qinsannooyye, pissaadi ka pursame; mehaddaadi a kalsade ka attaaden ka warwarri.

³⁰ Tin a ishootta isi qara in upnin mali, nama lakki ka de'e ka isha olli haasawanni. Ishootta nefo Muuse isho Eliyaasi.

³¹ Sede a ulfeenan akkaadeneeyye wa haasawannaane, akkima Yesuusi Yursaalami kara rakkado ka to'o.

³² Sitiiyyi Peetiroosi isho xeliyyaadi, mukitta ishootta pirri, ikka muken. Ete impaseneeyye, ulfeena Yesuusi isho namase lakki isha olli co akken.

³³ Ete namase lakki Yesuusi kapa annooyye, Peetiroosi i Yesuusi kide, “Kollissampayto, are taweeta i'ino paxaariiy, shaakka sessan qupna; takkan xaayti koddan, takkan ka a Muuse koddan, takkan ka a Eeliyaasi koddan.” Peetiroosi a sede haasawannooyye, wa a kiina in upo.

³⁴ Apeetiroosi sede haasawannooyye, urrattaaw de'e ka ishootta qara uwwishe. Ete urratta ishootta qara uwwisheeyye, ikka fuuren.

³⁵ Urrattase kara desa nessa kiino, “Ini innaayyo an reexade'ey, ishi dakaya” Ka dakaade.

³⁶ Ete nessase dakaade kammaayye Yesuusi xawwaati caade ikka akken. Tamaarewwasene xaadi ka wa siti akkene piisa, a nama takka nefo in lellin mali, jaw kiden.

Yesuusi akkima innasene hapura neeqan qapame dinshe

³⁷ Parraytaadiiyyi, ete Yesuusi isho tamaarewwasene sessa irrootase qara lekkadeneeyye, samayta kuttayta Yesuusi mina de'e.

³⁸ Nama takka ka samayse oppadesa ullupe ka kide, “Kollissampayto, innoosen takkanewwen qapaay, akka ana dinisso'en ke qinsanni.

³⁹ Tin a isi qara in upnin mali hapura neeqa isha qapni. Ka ullupni ka piita isha kanni ka rumpaya puufacciisni ka akka feqado kooni ka dakintaadi luluuqqinni. Umma isha diini in kitto.

⁴⁰ Akka hapurase neeqa isha kara sookshane'e, anka tamaarewwaatti qinsade ikka malaalen.”

⁴¹ Yesuusi ka kide, “Ishina a amanteetan qapnini quumaara xeltatiiyyi, haka aytamiti'in ishin olliiyyi kallaada ka ishin kela duupada? intoonno innoosen xaaytin xooyeey.”

⁴² Ete innasene Yesuusi kapopa dehaadeneeyye, orrittase piitopa innasene kate ka isha feqaccisee. Yesuusi xoori, hapurase neeqa fukke ka innasene dinnshe ka aappaayshoti daashe.

⁴³ Samytase piisa ka, hupnase a Waaqa kutta akke ka oppa ollin qawwaawe. Ete orrase piisa wa Yesuusi kode oppa qawwaaweeyye; Yesuusi itamaarewwaadi kide,

yesuusi akkima qoota tootaaditi desa alammatta haasawade

⁴⁴ “Qaalese an ishina lello qanqannissa isi kara qapada; tin inna a nama harka orra oppopa tuukkaman.”

⁴⁵ Ishootta xoori wa ishootta kiina in upnaanne; wa kapa asse kide nefo ka ishootta tura juutamen; ikka isha kaassatta kuli fuuren.

Ayno piisa qara jaalli?

⁴⁶ Tamaarewwa Yesuusi olli shiisha paayyen ka oli kiini, “Ino oppaayye ayno piisa qara jaalli?”

⁴⁷ Yesuusi xoori wa isi karan xata dikannaane upnaade ka, inna takkan shakka qeede ka isi kapa qaatishe

⁴⁸ ka tamaarewwaadi kide, “Nama innoosen maxxiyyon teyyanno piisa, ana teyyanni; a ana teyyannow, isase ana erke kuli teyyanniiw. Ishin oppaayye a pisa kelopa xata shakka, a pisa qara jaallo kodda.”

Nama ishin toorri in kinnin piisa ishin qudaaw

⁴⁹ Se kammaayye Yohaannisi ka Yesuusi kide, “Kollissampayto, ha a nama takka maxxaaytin orriyya sookinnon akkine ka qoota inoppa in qapnin malla, isha dawrine.”

⁵⁰ Yesuusi ka kide, “Nama ishin toorri in kinnin piisa, ishin qudaawweey, in dawran.”

Orra samaariya akkima yesuusi teyyatta tiiten

⁵¹ Ete kuyyaata a oppaayye moontopa fayyado dehannittoyye, Yesuusi Yursaalamipa anta' piisade ka pora xa'e,

⁵² Ka itturan desa erkampattowaadi a isha turandesa aana erke. Ishootta ka we piisa harmissa'e paleeta takka piita Samaariya kara kitto opa aanen.

⁵³ Orra paleesiti xoori, akkima Yesuusi piitaaysho oppan tarpo ka katama Yursaalami opa anno upnaaden ka isha teyyatta tiiten.

⁵⁴ Tamaarewwasene xaadi Yayqoopi isho Yohaannisi, ete sede akkeneeyye, i'ishi kidene, “Poqallaay akka apitta moonte lekkado ka orrose kupo'e akkan ajajino iheenta?”

⁵⁵ Yesuusi xoori ishoottopa desa tiitaawe ka ishootta fukke ka kide “Hapuroose ayysha akkima ishina de'e a uptan. Inna nama, caatta nama dinissa'e de'en diisheey, patissa in deene.”

⁵⁶ Ka eeyyeppa xa'en ka paleeta pila opa aanen.

Rakkoota orra a Yesuusin kallaanno qara kaynitto

⁵⁷ Yesuusi isho tamaarewwaadi ete pora xa'en ka annaaneeyye, nama takka i Yesuusi kide, “Anti pora a opa annitto pisopan ke kamma deena heena.”

⁵⁸ Yesuusi ka ishi oorshe ka kide, “Ka'ala qaawwa qapan, xampira moonta nefo ka saatta qapan; inna a nama xoori pora a kela dela matta qapan nefo in qapan.”

⁵⁹ Ka nama pilaati kideewe, “Ana kamma xooye.” Namase ka ishi kide, “Poqallaay, akkan paayyota aano ka aappinno hawlo'e ana' faqqate.”

⁶⁰ Yesuusi ka oorshe ka ishi kide, “Orra le'e, alle diishe ikka oorraaysho ale'e hawlado. Atti xoori aane ka qoota mankisteeta Waaqati desa kollishe.”

⁶¹ Nama pilaa ka Yesuusi kideewwe, “Poqallaay, ha anti ke kamma deena in heena ma, akkan paayyota aano ka toolinno'e, kido ‘Qaaina.’ ana' faqqate;”

⁶² Yesuusi ka ishi oorshe ka kideewwe, “Nama xormadaan qota qota'e harkoppa irfeeta qapade ka qara iskamman desa tooyno, mankisteeta Waaqati parpaaccisni in co.”