Luqaasi 8 - Mataafa Qulqulloota

Iskattase Yesuusi kamma anno

¹ Se kammaayye Yesuusi katamadda isho palewwaappanne tarpini ka mankisteeta Waaqa torrini ka otootase a fayya salinni. Tamaarewwasene xaadi kudanka lakki nefo isha olliiyyiiw caan.

² Akkimose mina'ew iskatta akaraayye hapurra nenneeqa sooken isho a paaqaaysho kela dine isha kamma anni. Ishootta nefo Maariyaamise Mektelitteeta kidammitto, a Yesuusi karaayye orritta tappa sookshe isho

³ Yohanna iskatteetase a Kuusa a toola Heerodiisi mukinnooti ka Soosinna isho iskatta pila lekayta kuli ishootta quda caaw. Iskattose ishootta kaajaassotin Yesuusi isho tamaarewwaadi qaarqaarri.

Pahanasene a xotta qupampayta

⁴ Ete orra lekayta katamaddaappaayye isha kapopa ollopa sookeeyye, Yesuusi pahanoosene ishootta lele ka kide,

⁵ “Qotampayta takka ayla'e sookade. Ete xotta qupnooyye, xotta demo pora kapa'e seehen ka qara diddiitamen xampira ka damen.

⁶ Xotta demoow, kookohota qara'e seehen ka ete sakkattaneeyye, qoota qoyyinta kela in kinnin malla, koken.

⁷ Demoow, qe'eyya kara'e seehen, qeeyya sene ka olli jifen ka qara piren, ikka eenxataaw hasen.

⁸ Xotta a taakane xoori, piita fayya oppa'e seehen ka sakkatten; sakkattase ka jife ka matta mina miillata harka dippa pale.” Kammadesa Yesuusi ikide “Nama napahata a dakaynitto qapo a dakayo.”

Yesuusi wa malla pahanaan haasawade

⁹ Tamaarewwa Yesuusi ka Yesuusi kaassaden ka kidene, “Ata kuli pahanoosen maana kideeta?”

¹⁰ Yesuusi ka ishootta oorshe ka kide, “Ishina, akka haasa a juutame a mankisteeta Waaqa upnaattane'e i'ishina daasamte; orra pilaati xoori, we piisa pahanaanne ishootta lelammi. Sede nefo, ishootta a eyye tooynaan kapa akka in akkinnini ka a eeyye dakaynaan kapa akka matte in qapnaannin malla.”

Yesuusi pahanasene a xotta qupampayta'e olkela la'ayshe

¹¹ “pahanoosen wa kapa lelamene: xottasene qaaleta Waaqa.

¹² Xottasene pora kapa seehe, orra a eta desa qaaletase a Waaqa dakkaysanno lelli. Ma xoori ishootta akka in amannin ka in dinnini'i, taaploosi ideeni ka qaalese karittaaysho karaayye qeenni.

¹³ Xottasene kookohota qara seehe'ew, orrase qaalese dakkaysanno ka xasan teyyanno lelli. Ma xoori ishootta eta desaaw amanni ka qoota hittinna in qapnin malla, oto rakkoota ishootta qara kaynittooyye, eennow marmanni.

¹⁴ Xottasene qe'eyya kara seehe'ew, orra eta desa qaalese dakkaysanno lelli. Ma xoori, dikatta piisseti ka teyanta isho ettana kallaata piisseti'i ishootta niikni ka dalta mali ishootta hattini.

¹⁵ Xottasene piita fayya oppa seehe xoori, orra karitta fayya ka taantetan qaaletase dakayno ka tooytino lelli. Ishootta orra qaaleseetin japaanno ka dalta dallo.”

Ipsa akka la'ayan malla opanni

¹⁶ Kamma desa Yesuusi ikide, “Nama ipsa opanno ka qara toma qupaapno taaki looshsha kelan desa xaayno, takka nefo in co. Se kapaayye, akka nama alleeta kelopa kullino piisa la'ayse akko'e, pora a qaraa desa akkaadan qara'e xaayni.

¹⁷ Akkamose mina'ew; wa juutame a lakopa in sooknin mali ka wa a dekade'ew a in upnaysammin mali in hasan.

¹⁸ Semmalla, atta akkima qaalese dakkaysannittan tooytaada. Aqapo, qara'ew ishi daasamta a in qapnin xoori, sede a dikanno ka kiino ‘In qapa’ kuli qara qeedama.”

Aayya opa Yesuusi isho hellaasso

¹⁹ Aayya a opa Yesuusi isho hellaasso Yesuusi kapopa de'en ka qoota samayta koope malla, isha kapa kaya malaalen.

²⁰ Orra ka ishi lele ka kide, “Ha aayyaassin isho hellaassin lakoppa'e qa'aden ka ke akkeeta faani”

²¹ Yesuusi ka kide, “Orra qaaleta Waaqa dakkaysanno ka koono, ishoottan aayyaanno ka hellaanno.”

Yesuusi akka puppeeta pakateeta jaw kiishe

²² Kuyyaata takkaayye Yesuusi tamaarewwaadi olliiyyi koonka karopa fayyade ka ishootta kide, “Pakateeteeyye afa disi opa tuullina!” Ka anta' xa'en;

²³ ete pakateetase qaran desa pisha pullannaan ka annaaneeyye, Yesuusi koonka sene kara'e muke. Sitiiyyi puppeeta a kokkoka ka pakateese qara xaate. Qoota koonkasene karopa pisha immakaatta paayyen malla, rakkoose ka ishootta fuurisse.

²⁴ Tamaarewwasene xaadi ka Yesuusi xaashen ka kidene, “Kollissampayto! kollissampayto! Ha in piramminna!” Isha ka, xa'e ka puppeetase isho pishasene pajaqjaqna fukke ikka eennow jaw kiden; pakateetase ka ollin kiite “Di'i”

²⁵ Sekkammaaye Yesuusi ka tamaarewwaadi kide, “Amanteetaayshin aysha kitta?” Ishootta xoori harmo'e oppa qawwaawen ka fuuren ka olli kidene, “Puppeeta isho pishasene pajaqjaqna'e ajajni ishootta nefo ka ishi ajajammiiy; ata ini ayno?”

Yesuusi akka nama a kara orriyya caan dinshe

²⁶ Ikka pakateetase tuullen ka piitase a Kerkesenooni, piita Kelila minan desa kitto opa kayen.

²⁷ Yesuusi ete koonkasene kara xata piitopa lekkadeeyye, nama takka a orriyya kara caane katama kara sooke ka isha mina de'e. namoose, amehadda kalsatta alle diisheeyye, iseki; umma tikoppa kallaanni in co, ma hawlallaappa'e kallaani.

²⁸ Ka ete Yesuusi akkeeyye, ullupe ka Yesuusi tura pi'e, ka nessaadi kuttishe ka kide, “Atti Yesuusi, inna Waaqase we piisa qara qapoti, maana ana qara qapta? Atara anan nyoorayshan!”

²⁹ Sede nefo wa malla asse kide, qoota Yesuusi akka hapurase neeqa namoose kara sooko ajaje malla. Se turanne hapuroose neeqa, a lekatinni namoose qara xaani opan ka sansalaata isho siplallaan isha hiini ka isha tooytini. Isha xoori, sansalaatase meeni ka siplallasene qeqqepinni; orrittase ka koommaytoppa pora ishin anni.

³⁰ Yesuusi ka isha kaassade ka kide, “Maxxaayti ayno?” Qoota orriyya lekaya isha kara safaren malla, ikka oorshe ka kide, “Maxxiyyo lekno”

³¹ Orriyyasene ka eennow Yesuusi qinsaden ka kidene, “Atara, hiwwalosen kelopa ino an daanan”

³² Porose oppa kunkunnaata qudaayye, xelloota tuuyyota kuttayteeta dawwade ka eyye ca. Orriyyasene ka, Yesuusi qinsaden ka kidene “Akkan tuuyyowwasen karopa kalo'e, ino faqqate” Ikka ishootta faqqate.

³³ Orriyyasene ka namase kara sooken ka tuuyyowwasene karopa kalen; tuuyyawwasene ka takeelase quda xata hiren ka pakateetase karopa sehen ka jimmen.

³⁴ Sikmaya tuuyyowwaseneti, ete wa kodde akkeneeyye, iqahen ka aanen ka katamadda isho palewwa kara otootase fiden.

³⁵ Orra ka wa kodde tooyya tikkaasso karaayye ollopa sooke ka Yesuusi kapopa de'e ka ete namase a kara orriyya sooken, a qalpeetaadi oorsade ka mehaddaadi kalsade ka loqqa Yesuusi kela kuti'e akken ka fuuren.

³⁶ Orra wossen kodde ildaassotin akke, namase a karaa orriyya caan atta akkima dine ishootta torren.

³⁷ Orra piitase a Kerkesenooni kapandesa kalo piisa ka qoota akata fuure malla; akka Yesuusi piitaaysho oppa alle aano'e, isha naappaden. Yesuusi ka koonkaappa fayyade ka piita a ishi de'epa alle tiitawe.

³⁸ Namase akaraayye orriyya sooken, Yesuusi qinsade ka kide, “Atara, ana ke olli de'o” Yesuusi xoori isi qara isha xaashe ka isha kide.

³⁹ “Tikaayshin opa kale ka wa a Waaqa ke kode piisa torre” Namase ka oori katamaappa pora anni ka wa kutta a Yesuusi ishi kode torrini.

Enentase a Iyya'iroosi isho iskatteetase ohaata Yesuusi qappatte

⁴⁰ Samayta qoota Yesuusiiw asanno malla, ete tiitaweeyye, xasanne isha teyyade

⁴¹ Sitiiyyi nama takka iyya'iroosi kidammo saara a tika qinseeta a orra Yihuta kodde ka de'e ka loqqa Yesuusi kela pie ka isha qinsade ka kide, “Atara tikiyyo opa xooye”

⁴² Wa malla asse isha qinsade nefo, qoota enentaadi takkayteeta aparaadi kudanka lakki kaye, paaqinitto ka toota foolsatte malla. Ete Yesuusi isha olli annooyye, orrase leka isha kamma anno oli tuukni ka arta kara Yesuusi qannishe.

⁴³ Iskatteeta takka para kudanka lakki piisa diika urqissaan payyahate ka eyye kitta. Ka kaaja a qapta piisa akimewwa kela piratte; umma nama takkan nefo isheetta dinissa in ettaninne.

⁴⁴ Iskatteese oori, Yesuusi kapopa desa dehaatte ka isha kamma desa kaamaara ohaataadi qappatte diikase 'xaadi urrqino ka eennow qa'ade.

⁴⁵ Yesuusi ka kaassade ka kide, “Ayno ana quda qappade?” Orra piisa ka qinda piisaayye desa kide, “ino an ke quda an qappanne.” Peetiroosi ka ishi kide, “Kollissampayto, orra oli tuukni ka ke kamma deeni, akka akkiniiy; atta kiini ‘ayno ana quda qappade?’”

⁴⁶ Yesuusi xoori ikide, “Akkima hupna anoppa sooke in upaay, dukaatanne nama takka ana quda qappade”

⁴⁷ Iskatteetase ka ete akka in dekannin upnaatteeyye, xarri ka deete ka loqqa Yesuusi kela pi'ite ka sekkammaayye, maana malla akkima isha qappatte ka akkima eennow dinte, fuula orra piisa tura torrite.

⁴⁸ Yesuusi ka ishetta kide, “Enentiyyo, amanteetaayti ke dinsheey, nakaytan kale.”

⁴⁹ A Yesuusi sede afaappa in dikkinniniiyyi, nama takka ka tikase a Iya'iroosi a motoloqaati desa de'e ka ishi kide, “Enentaayti itooteey, patta kollissampayta an yaalshan.”

⁵⁰ Yesuusi xoori, sede dakaye ka, Iyya'iroosi kide, “In fuuran, amanteeta pattaaw amane, enentaayti idintaay.”

⁵¹ Yesuusi ete tikase a Iyya'iroosi kayeeyye, Peetiroosi ka Yohaannisi ka Yayqoopi ka aappa opa enentaseti isho aayyaasso maliiyyi akka nama takka nefo isha olli tikase kelopa kullo in faqqanne.

⁵² Orra eyye co piisa olloppe qite ka qoota enentaseti desa pooyni. Yesuusi xoori i'ishootta kide, “In pooyan, enentoose imukte diisheey in tooneey.”

⁵³ Ishootta xoori, akkima enentase toote qoota upan malla, isha qara seesen ka qara xosalli.

⁵⁴ Yesuusi ka enentase tupa harka qape ka isheetta kide, “Enenta, xa'e!”

⁵⁵ Qoota nessa isheetta kara oore malla, ikka eennow ela xaate. Yesuusi ka ajaje ka kide, “Wa damta ishi daasha”

⁵⁶ Aappaaysho isho aayyaasso ka oppa ollin qawwaawen. Isha xoori i'ishootta ajaje ka kide, “Wessen kodde nama takka nefo an lelan.”