Luqaasi 6 - Mataafa Qulqulloota

Kaassuma qoota sampata orra Yihutaati desa dehaade

¹ Kuyyaata takka a sampata a orra Yihutaatiiyyi, Yesuusi duloppa desa tarpini. Tamaarewwaadi ka maanqa akappa me'atta ka harka kara riitatta ka qomeeta paayyen.

² Feresaatoppaayye orra demo ka tamaarewwasene xaadi kiini, “Maana malla wa sampatan kodama parpaaccisni in kinnini koonittan?”

³ Yesuusi ka ishootta oorshe ka kide, “Taawwiti, isho orra isha quda co, ete doxeneeyye, Taawwiti wa kode ishina a nappapne?

⁴ Ha tika Waaqa kelopa kulle ka laaqqootase kalisoota Waaqati daasamte ka qulqullaawte ka qeesewwa maliiyyi akka nama pila damo'e in faqqatammin qeede ka dame ka orra isha quda co kuli daashe.”

⁵ Ka kamma kideewwe, “Ha inna a nama sampata kuli qaraayye Poqalla.”

Yesuusi akkima nama takka harkan toonnaawe dinshe

⁶ Kuyyaata sampata a orra Yihuta a pilaatiiyyi, Yesuusi tikase a qinseeta a orra Yihuta kelopa aane ka kollinni. Nama takka a harkaadi a akkitta tupa toonnaawe ka eyye ca.

⁷ Kollissampayasene a seera isho Feresaata ka wanjala a ishin Yesuusi xasasan faddanni ka qara tooyni ka kiini, “Oton, isampatan isha dininni, intoonno tooynaay.”

⁸ Yesuusi xoori dikkattaaysho'e upnaade ka namase harkan toonnaawe kide, “Xa'e ka otantoppa qa'ado!” Namase ka xa'e ka otantoppa qa'ade.

⁹ Yesuusi ka ishootta kide, “Intoonno ana ishin kaassadooy, hela kuyyaata sampatatiiyyi, wa pa'aara kodeeta faqqatamem mon wa neeqa? Hela nama dinissam, moon patissa?”

¹⁰ Ka ete orra isha kapan desa co pisopa tooyyade kammaayye, namase harkan toonnaawe kide, “Harkaayti derayshe!” Namase ka harkaadi derayshe. Harkase xaadi ka dine ka a taakaaw pahanaade.

¹¹ Kollissampayasene a seera isho Feresata xoori, harmo'e miiroden ka maana akka Yesuusi qara kodan suladen.

Yesuusi akkima erkamampayasene kudanka lakki reexade

¹² Kuyyaata takkaayye, Yesuusi qinseeta'e irroota qaropa fayyade ka halkeettose kumma eeyyeeyye Waaqa qinsatta quda parishe.

¹³ Ka ete pariteeyye, tamaarewwaadi isi kapopa hale ka ishoottoppaayye nama kudanka lakki reexe, ka ishootta maxxa kode ka kide “Erkamampaya”

¹⁴ Ishootta nefo, sene are kammopa xata ca; Simoonise a Yesuusi Peetiroosi kide ka ishi maxxa kode ka Innaasso intiriyaasi ka Yayqoopi isho Yohaannisi ka Filippoosi ka Pertelemewoosi

¹⁵ ka Maatiyoosi ka Toomaasi ka Yayqoopi innasene a Ilfiyoosi ka Simoonise ishi kiinaane Piitaayshoti'i yoota qapa.

¹⁶ ka Yihuta inna Yayqoopi isho Asqorottittase Yihuta isase Yesuusi qapsiise.

Yesuusi akkima samayta kuttayta dinshe ka kollishe

¹⁷ Yesuusi erkamampayasene xaadi olliiyyi irrootase qara lekkade ka lakoppa qa'ade. Tamaarewwasene xaadi oppaayye lekaya ka eeyye caan; samayta a qaaletaadi dakkaysatta ka paaqaaysho kela dina faano a akata kutta ka eeyye caaw ishootta nefo piita Yihuta ka katama Yursaalami ka katamaddasene pakateeta kapa ca a Tiroosi isho a Sidoonaati de'en.

¹⁸ Orra hapurra nenneeqaatin qapame ka rakkanno ka deeni ka dinni.

¹⁹ Qoota hupna dinissa isha kara sookno ka orra piisa dininno malla, orrase ollopa de'e, piisa Yesuusi quda qappattaaw faani.

Xasa isho nyarrahata wa minan deenaane

²⁰ Yesuusi ela kide ka tamaarewwaadin desa tooyyade ka ishootta kide “Mankisteeta Waaqa xaayshinaay, ishina teekolayaay, i'eeppisamten!

²¹ Ishina a amma doxnaatiiyyi; kuli iduttantaneey i'eeppisamten! Ishina amma pooynaatiiyyi; kuli ixosaltaneey i'eeppisamten!

²² “Ana inna nama minanne oto orra ishin needdannooyye ka issippa ishin seerrooyye ka ishin kojeessinooyye ka maxxaayshin patinnooyye, i'eeppisamten.

²³ Oto sede piisa ishin qara kaynittooyye, harmo xasooda ka xasan siikada; wa sede kapa moonte akkattane ikuttiiyyi; xasooda; aappadaasso a xatta asseew xuumampaya xatta qara rakkoota asse pahato qeedineey.

²⁴ Ishina teyantoolayaayye xoori, wa ishin xasanna piisa ammawe akkatteneey oo ishin kidoo!

²⁵ Ishina a amma duttane, kuli idoxtaneey oo ishin kidoo! Ishina a amma xosalla, kuli inynyarrahatan ka pooytaneey oo ishin kidoo!

²⁶ “Oto orra qootaayshinaayye desa a paxaara'ew haasawannooyye oo ishin kido! aappadaasso a xatta asseew xuumampaya dartati kodeneey.”

Paarkaala jaalatta

²⁷ “Ishina ana dakaynaatiiyyi xoori, in ishina kiinii, paarkaalaassin jaalada ka a ishin needdannaati wa paxaara koda.

²⁸ Ka a ishin jiijnaati saka ka a ishina ishin dapnaati qinsada.

²⁹ “Nama dapna ke tupa kandisho'e, a pila ishi tiitayshe; nama xootetaayti ke quda qeedade'e, kaappaatti kuli qara ishi daasheew.

³⁰ Nama ke qara qinsanno piisa daashe, Nama wa qapta ke qara teyyado akka ke oorsho'e isha in kaassadan.

³¹ Wa orra akka ishina kodo faanittane, ishina asseew ishootta kodaaw.

³² “Oto orra a ishin jaalannoow jaalannittaneeyye, maananne jaallittan? Juppoolaya kuli asseew orra ishootta jaalannoow jaalanniiy.

³³ Oto orra wa pa'aara ishina koono'ew wa pa'aara koonittaneeyye, maananne jaallittan? Juppoolaya kuli asseew kooniiyyi

³⁴ Oto orra a dikannittan ka kiinittane ‘i'ino oorshane'ew’ leqeessinittaneeyye, maananne jaallittan? Wossen a leqeessene oorsatta ka teyyatta'e, juppoolaya juppoolaya'ew leqeessiniiy.

³⁵ Ishina xoori, paarkaalaassin jaalada ka wa paxaara ishootta koda ka a kippannin ka a kiinini ‘namoose leqaanno ino oorsha maliiyyi, leqeessa’ Oton asse kootaneeyye, wa se kapa akkattane ikutti. Akka hellaa Waaqase we piisa qaropa kuttuma qapooti kidamtaneey. Isha orra kalata in qapnin ka ukkuttowwa kuli'i xoonampaytaay

³⁶ Semmalla, akka Aappaayshin a moonta dissampayta kodde mina'e, ishina assew diissampaya kodda.”

Akka orra pila qara farata parpaaccisni in kinnin

³⁷ “Nama takka nefo qara an faratan; ishin qare in faratamtooy; umma orra pila'en jippan a jippamtaneey. Orra juppootaaysho diisha; juppootaayshin i'ishina diisamtaay.

³⁸ Nama daasha; i'ishina daasamtaay; taara ishin kurrittanenneew ishina kuramta ka laaddi kura paxaara oppa tolamta ka qannita ka qaran xata urqita ka ishina daasamta.”

³⁹ Kamma desa Yesuusi pahanoosene ishootta lele ka kide, “Hela nama takka a ilda in qapnin, inama pila a ilda in qapnin tura qanni ka ishi pora akkinni? Oton asse kodaayye, lamatti oli qapadan ka qaawa karopa seehan.

⁴⁰ Nama kollanno kollissampaytaadi qaran jaali in co; a koddito ma nama kollanno oto fayya kolladooyye, akka kollissampaytaadi mina'e koddini.

⁴¹ “Maana'e kurpana a iltaytippa co a akkini a kinnin mali, miissa a ilta innaassina oppa co tooyni?

⁴² Ka kuli, a' kurpana a iltaytippa co a issi a akkinnin mali, atta innaassina kiita ‘Innaanno, intoonnooy ana miissa iltaaytippa ke qeedooy?’ Atti pappahanassampayto, paayyota qattishe ka kurpanose iltaaytippa co mayshe ka kulii miissase ilta innaassina oppa co qeeda'e fayya akkitaay.”

Qoyra daltaadinni upnaysammi

⁴³ “Qoyra a paxaara dalta a neeqa dalli in co; umma qoyra a neeqa, dalta a paxaara dalli in co.

⁴⁴ Qoyra piisa daltaadinni upnaysammi; qe'eyya qaraayye, opani dalta hilteeta pohoni in caan; umma qassatta qaraayye, opani dalta wayneeta pohoni in caan.

⁴⁵ Semmalla nama paxaara karittaadi a paxaara kareela wa paxaara'e sookinni; nama neeqaaw, karittaadi a neeqa kareela wa neeqa'e sookinni. Nama wa karittaadippa immakaade ka qara hase'e afaadin haasawanniiyi.”

Pahana a orrase tikka qupanno lakki

⁴⁶ “Waan ishina kiina a kooni a kittaneey, maana'e ‘Poqallaay, Poqallaay’ ana kiinittan ka ana pora haleenittan?

⁴⁷ Nama anopa deeno ka qaaletiyyo dakkaysanno ka ishin kallaanno, ayyno akka paho ana ishina lelo.

⁴⁸ Isha nama fayya qaawa qote ka qapaya qa'e ka qara tikaadi qupade paha. Malxa ka de'e ka tikase tuukke. Ma xoori qoota qapaya kokkoka qara qupamte malla, leehissa in ettaninne.

⁴⁹ Nama qaaletiyyo dakayo ka ishin kallaanni in kinnin xoori, nama fayya qaawa in qonnin ka fayya qapaya in qaynini paha. Malxa ka de'e ka tikase tuukke, ikka eennow pi'ite; pi'ittaadi nefo ka akata neeqnaade.”