Luqaasi 5 - Mataafa Qulqulloota

Yesuusi akkima tamaarewwaadi a paayyota halaade

¹ Kuyyaata takkaayye Yesuusi pakateeta Kensaareti kapa'e qa'ade. Orra lekayta ka isha kapopa ollopa sooke ka qaaletase a Waaqa dakkaysatta'e, oli tuukni.

² Isha ka koonkada lakki, a pakateeteeyye qinda quda qaatishene akke. Orra murkuja qapanno xoori koonkadasene kara lelekkade ka nyupuraasso diipanni.

³ Yesuusi ka koonkadasene oppaayye koonka takkan a Simooni karopa fayyade ka Simooni kide, “Koonkosen piita kapa desa, shakkayteeta pakateeta karopa desa ana heeqqishe.” Ka sekammaayye koonkasene kara kuti'e, ka orra kollissa paayye.

⁴ Ka ete haasaadi dikkishe kammaayye, Simooni kide, “Koonkasene pakateeteeyye, otantoppopa desa heeqqishe ka murkuja qapa'e nyupuraassin pakateetoppopa kata.”

⁵ Simooni ka ishi kide, “Ha Poqallaay, halkeesse kumman ekkanni rafne ka kakkafanne; umma murkuja takka nefo an qapne. Ma xoori oto atti asse kiiteeyye, nyupurasene pakateetoppopa in kata.”

⁶ Ete nyupurasene kateneeyye, haka nyupurasene kaamannaane'e murkuja dikke leka qapen.

⁷ Ka, akka xeliyaasso a koonka pila kara ca de'an ka ishootta qaarqaarane'e, harkaan hamshen ka ishootta halen. Ishootta ka de'en ka haka koonkasene lakki pisha karopa tawa foolsannaane'e, murkujan immaken.

⁸ Simooni Peetiroosi, ete sede akkeeyye, Yesuusi tura'e kilpiippade ka kide, “Poqallaay, anti an juppoolaytay, ana kapopa in dehaadan.”

⁹ Wa malla asse kide nefo, isha isho xeliyyaadi a isha quda ca piisa, lekuma murkuja a qapen minanne qoota harmo oppa qawwaawen malla.

¹⁰ Xeliyyasene a Simooni, hellaasene a Septiyoosi Yayqoopi isho Yohaannisi ka asseew oppa qawwaawen. Yesuusi ka Simooni kide, “in fuuran, arepa desa a orra qindiyyopa haleeno kodditaay.”

¹¹ Ishootta ete koonkadaasso kamkama qudopa heeqqishen kammaayye, we piisa diishen ka a Yesuusi kammaa anna kodden.

Yesuusi akkima qoosholayta takka dinshe

¹² Yesuusi kuyyaata takkaayye katama takkan karaayye ca. Nama takka a dakintaadi piisa tupa qooshootte ka isha kapopa de'e; ka ete Yesuusi akkeeyye, isha tura kilpiippade ka fuula piitan kaye ka isha qinsade ka kide, “Poqallaay, oton iheentaayye, ana dinissa i'ettanissa.”

¹³ Yesuusi ka harkaadi desa derayshe ka isha quda qappade ka kide, “In heenaay dine ka ajaqqame kodde.” Qooshase ka eennow isha quda tawe.

¹⁴ Se kamma Yesuusi ka isha ajaje ka kide, “Nama takka nefo sede an lelan ma, aane ka qeesitta isi akkishe ka akka samayta maakkuma koddito'e, qoota dinaaytiti desa kalisootase a Muuse ajaje dehayshe.”

¹⁵ Kurra Yesuusi xoori, a deyyo qaran qapto'e dakaade. Orra lekayta ka isha dakkaysatta ka paaqaaysho kela dina faani ka ollopa deeni.

¹⁶ Isha xoori kuyyaata piisa xawwaati koommaytoppopa anni. Ka Waaqa qinsanni.

Yesuusi akkima toonnayta takka dinshe

¹⁷ Kuyyaata takkaayye Yesuusi a kollinnooyye, Feresaata isho kollissampaya a seera ka eeyye kuti'en. Ishootta palewwa Kelila isho a Yihuta pisoppa ka katama Yursaalami karaayye ollopa de'en; Yesuusi hupnase a Poqalla, a paaqolayaan dininno qapa.

¹⁸ Tin orra toonnayta takka shabbaan haano ka isha kapopa de'e. Ka tikase a Yesuusi kela co kelopa kullissa ka fuulaadi turan kayeeta faani.

¹⁹ Ma xoori qoota samayta koope malla, toonnaytase tika kelopa kullissa imalaalen. Ka, se malla toonnaytasetin tika qaropa fayyaden ka qaala pooten ka karaxata toonnaytase shabbaan fuula Yesuusi turopa lekkishen.

²⁰ Yesuusi ka amanteetaaysho akke ka toonnayseti kide, “Namo, juppootaayti ike hasse.”

²¹ Kollissampaya a seera isho Feresaata ka oppa dikanni ka kiini, “Namoose Waaqa onno ayno? Waaqa takkayta maliiyyi a juppoota orra diinno a pila ayno?”

²² Yesuusi ka dikattaaysho upnaade ka ishootta kide, “Maana malla isi karan xata sede dikannittan?

²³ “Hela amma ‘Juppootaayti ike hasse’ kideeta ka ‘Xe ka aane’ kideetoppaayye a xaame nukkulli?

²⁴ Ma xoori inna a nama, akkima piita qara juppoota nama diissata hupna ukkumeeta qapan, akka upnaattane'e” Ka toonnaytaseti kide “Namo! xe ka shaabbaatti xaysado ka tikaaytipa kale.”

²⁵ Toonnaytase ka fuula orra tura'e eennow xa'e, ka shabbasene a deyyo qara ca qapade ka Waaqa kalataysattaan tikaadipa kale.

²⁶ Orra eyyeppa co piisa ka oppa qawwaawe ka fuuran kiini, “Ha awwe daxxootan akkine” Ka Waaqa kalataysaden.

Yesuusi akka Lewise Maatiyoosi kidammo hale

²⁷ Sekkammayye Yesuusi ete porositi sooke ka annooyye, nama takka Lewwi kidammo ka qarata qaratino a pora qarata oppa kuti'e akke ka ishi kide, “Ana kamma xooye.”

²⁸ Lewwi ka eennow xa'e ka we piisa diishe ka isha kamma aane.

²⁹ Se kammaayye ulfeena Yesuusi'i, lewi sankulta kuttayteeta tikaadippa harmishe. Orra qarata qaratino isho orra pila lekayta ka sankultase oppa akkaade.

³⁰ Feresaata isho kollissampayasene a seera Feresaata quda kodde, tamaarewwa Yesuusi qara moomooni ka ishootta kiini, “Maana malla orra qarata qaratino isho juppoolaya olli dammittan ka ikkinittan?”

³¹ Yesuusi ka ishootta oorshe ka kide, “Ha orra paaqno'e akimitta parpaaccisni diisheey, orra fayya qapo parpaaccisni in co.

³² Anti akka juppoolaya juppootaaysho oppa oorane'en hala de'e diisheey, hanqeellaya hala'e an deene.”

Kaassuma qoota damta musattaati desa dehaade

³³ Orra demo ka Yesuusi kaassade ka kide, “Tamaarewwa a Yohaannisi isho Feresata lekayteetanne damta musanni ka Waaqa qinsanniiy, tamaarewwaatti maana malla kuyyaata piisa damtaaw dammi ka ikkayta ikni?”

³⁴ Yesuusi ka ishootta oorshe ka kide, “Hela idikannittan ka kiinittane oto hemampayta hemattota olli cooyye, hemattoose damta musatta isheetta faani?

³⁵ Ma xoori eta a hemampayta ishootta kapa qeedamo de'ay, awse damta musadan.”

³⁶ Kamma desaaw Yesuusi pahana takkane ishootta leleew ka kide, “Nama japara haaraya qeenno ka ohaata a kerite qara heddino in co. otoon asse kodaayye, haarayase a japara'e ohaatase kerite xonyolli ka kaa'ini, semmalla qara ettanni in cooy, namase patta'e haarayase a ohaata kaa'ini.

³⁷ Akkimose mina'ew, nama maaddota taadeta wayneeta shawwa xattayta kara qa'anno in co. Oton oppe qa'ayye, maaddotase a taadeta wayneeta shawwase pokkini, taadetase a wayneeta ka alle kara urqini; Shawwase ka patta panni.

³⁸ Semmalla maaddota taadeta wayneeta, shawwa ammaytoppa qa'etta parpaaccisni.

³⁹ Nama a taadeta wayneeta a palite ikke, ‘Taadeta wayneeta a paliteew wayyi’ kiini, umma maaddota taadeta wayneeta ikkeeta in heeno.”