Luqaasi 3 - Mataafa Qulqulloota

Kollissa a Yohannisise pishaan orra jaqqinooti

¹ A nuqusase kutta a Roomi Tipariyoosi Qeesaari nuqusumeeyye, para kudanka kennattati, Pentenitase Pilaatoosi piita Yihuta'e mukinni, Herodiisi'iw piita Kelila'e mukinniiw; innaasso Filippoosi'iw piita Ituriyaasi ka piita Tirakontaasi'i mukinniiw; Lissaniyoosi'iw piita a Pileeni'i mukinniiw;

² Haanna isho Qayyaaffa, sitiiyyi saarra qeesewwa. Ayohaannisi innasene a sakkaariyaasi koommaytoppa caaneyye, qaaleta Waaqa ka isha deete.

³ Semmalla Yohaannisi, piitaddasene kirra Yurtaanoosi kapan desa ca pisa oppa pora anni ka orra kollinni ka kiini, “Akka juppootaayshina diissata akkattane'e, juppootaayshin oppa oora ka jaqada”

⁴ Sede nefo, wa malla asse kiddite isase a xuumampaytase Issayyaasi qoota Yohaannisi desa taafe ka kide, “Tin sede nessa a namase koommaytoppa selinno ka kiino, ‘Pora Poqalla harmisha ka saantaadi ishi qajeelsha.

⁵ Naabba piisa a teettaamen. Irroowwa isho kunkunnaawwa piisa a xata shashakkaden, pora a quqquumade a qajeelo. pora a in harmisammin a olmina oorro.

⁶ Nama piisa ka dinissa Waaqa akko.’” Akka dikkatto malla

⁷ Yohaannisi, samaytase kutta jaqatta isha kapopa deeno'e, ikiini “Ishina hellaa a haddoolayta maakaatiiyyi akka miiroose a Waaqa deeno kela qahatane'e, ayno turadesa ishina lele?

⁸ Semmalla, akka juppootayshin oppa oorten kodan akkisha diisheey, ‘Ino an hellaa Aprihaami’ Issi kideetan karitta karan xata issi in jeejjan. Anti in ishina kiinii, Waaqa dakaddosen are ca, hellaa Aprihaami kodeeta i'ettansha.

⁹ Desa amma erkaha qora kela' xaayame; semmalla qoyra delta fayya delli in kinnin piisa alle murama ka apittoppopa katama.”

¹⁰ Samayta ka Yohaannisi kaassanni ka kiini, “Ka asseeyye, maanan koona?”

¹¹ Isha ka ishootta kide, “Nama ohaata lakki qapo, a quda takka nama an qapnini daasho; nama damta qapoow, a quda nama an qapnini qootto.”

¹² Orra qarata qaratino ka, jaqatta isha kapopa de'ew ka isha kaassaden ka kidene, “Kollissampayto, ino maanan koonaaw?”

¹³ Isha ka ishootta kide, “Ishina a seeroppa ishina ajajamte qaropa in kaassadan.”

¹⁴ Xela oranna ka de'ew ka isha kideewe, “Ino maanan koonaaw?” Isha ka ishootta kideewe, “Nama qara kaaja irreetan an saran ka dartan nama an xasasan; ma muushshaaraayshin a ishin kayo.”

¹⁵ Sapanoositiiyyi, samayta piisa Kiristoosi kippeetan asanni ka qoota Yohaannisi desa karittaaysho karanxata dikanni ka kiini, “Hela isha Kiristoosi kodda?”

¹⁶ Yohaannisi xoori i'ishootta piisa kide, “Anti pishaannen ishin jaqini ma, nama ana qara jaallo a pilaa'e de'a. Anti teepa xopaadi nefo fureeta mina an qanne, isha Hapura qulqulloota ka apittanne ishin jaqa.

¹⁷ Isha awtaappa untoppa ukkashsha xayyissa'e, simaata harkoppa qapade. Oto xayyisho kammaayye, miillata unkulaappa'e qa'a ka ukkashsha apitta a libbini in kinninin alle kupa”

¹⁸ Yohaannisi ka asse pora lekaytan orrase dehaammi ka, otootase a fayya torrini.

¹⁹ mukissampaytase a Keliila Heroodisi qoota iskateeta innaasso a Filippoosi Herodiyaada heme ka wa neeqa lekaya kode malla, Yohaannisi ka isha fukke.

²⁰ Heerodiisi ka neequmta qara neequmta padaawaanne Yohaannisi tika hida karopa kalshe.

Yesuusi akkima jaqame

²¹ Ete orra piisa jaqame kammaayye, Yesuusi kuli ka jaqameew. Ete Yesuusi Waaqa qinsannooyye, moonta ka panamte.

²² Hapura Qulqulloota ka elela pahanaade ka isha qara lekkade. Sitiiyyi nessa a kiino, “Atti a innaayyo an jaalanna ka mikta ken xasoonna.” ka moonte xata dakaade.

Meera daloota a Yesuusi Kiristoositi

²³ Yesuusi, a kodaadi a kollissa paayyinooyye, paraadi kunda sessa mina'e ca. samayta idikanni ka kiini, Yesuusi inna Yoosefi. Yoosefi kan inna Eeli,

²⁴ Eeli kan inna Maati, Maati kan inna Lewwi, Lewwi kan inna Milki, Milki kan inna Yoona, Yoona kan inna Yoosefi,

²⁵ Yoosefi kan inna Mataatiya, Mataatiya kan inna Amoosi, Amoosi kan inna Nahoomi, Nahoomi kan inna Esliimi, Esliimi kan inna Naake,

²⁶ Naake kan inna Ma'ati, Ma'ati kan inna Mataatiya, Mataatiya, kan inna Semeyi, Semeyikan inna Yoosefi, Yoosefi kan inna Yoota,

²⁷ Yoota kan inna Yonaani, Yonaani kan inna Reesi, Reesi kan inna Serupaapeli, Serupaapeli kan inna Selatiyaali, Selaatiyaalikan inna Neeri,

²⁸ Neeri kan inna Milki, Milki kan inna Haati, Haati kan inna Qoosami, Qoosami kan inna Elimodaami, Elimodaami kan inna Eeri,

²⁹ Eeri kan inna Yoosei, Yoosei kan inna Eliesaari, Eliesaari kan inna Yoraami, Yoraami kan inna Maatati, Maatati kan inna Lewi,

³⁰ Lewi kan inna Simooni, Simooni kan inna Yihuta, Yihuta kan inna Yoosefi, Yoosefi kan inna Yonaani, Yonaani kan inna Elyaaqiimi,

³¹ Elyaaqiimi kan inna Meeliya, Meeliya kan inna Maynaani, Maynaani kan inna Mataati, Mataati kan inna Naataani, Naataani kan inna Taawwiti,

³² Taawwiti kan inna Issey, Issayi kan inna Iyyopeedi, Iyyopeedi kan inna Poaasi, Poaasi kan inna Salmooni, Salmooni kan inna Na'asooni,

³³ Na'asooni kan inna Aminataapi, Aminataapi kan inna Admin, Admi kan inna Aarni, Aarni kan inna Hesrooni, Hesrooni kan inna Faaresi, Faaresi kan inna Yihuta, Yihuta kan inna Yayqoopi,

³⁴ Yayqoopi kan inna Hisaaqi, Hisaaqi kan inna Aprihaami, Aprihaami kan inna Taara, Taara kan inna Nahoori,

³⁵ Nahoori kan inna Seruuki, Seruuki kan inna Ree'u, Ree'u kan inna Feleki, Feleki kan inna Eperi, Eperi kan inna Shelaahi,

³⁶ Shelaahi kan inna Qaynaani, Qaynaani kan inna Arfakisaati, Arfakisaati kan inna Seemi, Seemikan inna Noohe, Noohe kan inna Laamehi,

³⁷ Laamehi kan inna Matusaala, Matusaala kan inna Henooki, Henooki kan inna Yareti, Yaareti kan inna Malaali'eeli, Malaali'eeli kan inna Qaynaani,

³⁸ Qaynaani kan inna Henoosi, Henoosi kan inna Seeti, Seeti kan inna Attaami, Attaami kan inna Waaqa.