Luqaasi 24 - Mataafa Qulqulloota

Yesuusi akkima tootoppa xa'e

¹ Iskattase ka shittootase a harmisade qapade, ka torpaappa kuyyaata paayyotati, sampateeyye paraappan hawlase kapopa aane.

² Ka shilase hawlase tura' dufen, a alle tura sukume akken.

³ Ma xoori ete hawlase karopa kulleneeyye pukka a Poqalla Yesuusin akkine.

⁴ Ete sedeppa qawwaawaappa caaneeyye; tin nama lakki a mehadda warwarra kalsade de'e ka ishootta kapa qa'ade;

⁵ ete iskattase a kata fuure ka piitan xata tooyannooyye; orrase i'ishootta kide “Maana'e caattampayta orra a le'e kara faanittan?

⁶ Isha aree in co! i'e! Akelilaayye cooyye, wa ishina kide matte oorsada.

⁷ Isha i'ishina kide ‘Inna a nama juppoolaya turopa tuukkama ka fannisama, ka kuyyaata sessattati tootoppa xa'a’ Isha parpaaccisni.”

⁸ Iskattase ka qaaletase a Yesuusi matte oorsade.

⁹ Ka hawlase kapa tiitaawe ka tamaarewwasene a Yesuusi kudan ka takka isho a ata haseeti sede lelen.

¹⁰ A sede erkamampaya' lele nefo, Maariyaami Mekdelitteeta ka Yohanna ka Maariyaami aayya opa Yayqoopi ka iskatta pila nefo ishootta qudaayye caaw.

¹¹ Ishootta xoori, qoota sede paapeelta ishootta pahanaatte malla, iskattase qara in teyyanne.

¹² Ma xoori Peetiroosi ixa'e ka hawlase kapopa keere; ete eeyye kaye ka xata kide ka tooynooyye, ohaatase qaaha xaynaata qora talpa oppa dawamte pukkasetin maren a poraadippa kitto akke. Ka wa kodde oppa qawwaawe ka tikopa kale.

Yesuusi akka tamaarewwaadi lakki tura akkaade

¹³ Awwsetiiyyi orra Yesuusi kamma anno oppaayye, nama lakki paleeta Emaahuusi kidammitto ka Yursaalami kapa desa kilomeetireeta kudanka lakki mina' kitto sekitto opa kalli.

¹⁴ Ishootta ka wossen kodde piisa xaashen ka oppa torraanni.

¹⁵ Ishootta ete sede haasawannaan ka oppa torraannaaneeyye, Yesuusi mattaadi'i ishootta kapopa de'e ka ishootta olli anta paayye.

¹⁶ Ma xoori ishootta ildaassotinni eyye isha tooyni diisheey, ayno, akkima kodde upnaatta in ettaninne.

¹⁷ Isha ka ishootta kide, “A anta qara kittaneeyye, wossen a oppa torraannittane maana?” Ishootta ka nyarrahen ka oppa ollin qa'aden.

¹⁸ ishootta oppa nama takka Qeleyoobba kidammo ka ishi kide, “Hela ke pattan piisseti xaykitta ka wa a kuyyawwosen kara Yerusaalami kodde in upnini?”

¹⁹ Yesuusi ka ishootta kide, “Ata wossen maana?” Ishootta ka ishi oorshen ka kidene, “Waasene Yesuusise a Naasirati qara kodde'enne? Isha xuumampayta a fuula Waaqa ka a orra piisa tura qaaleta ka kodaan kokkooka.

²⁰ Saarra a qeesewwa isho saarraanno ka firteeta tootati isha tuukken ka fannisen.

²¹ Ino allu in kippanninna ka kiininna ‘Isha Isira'eeli furada.’ a koddito ma, a se piisa kodditeeyye, awwe kuyyaata sessatta.

²² Amma laadi iskatta demo a inoppa co ino qawwayshe, ishootta awwe parappanne hawla kapopa aanen.

²³ Ma xoori pukkaadi in teyne ma i'oren ka kiini, “Erkampattowwa kiina'e, ‘Isha icaade!’ en kelashaatoppan akkine.

²⁴ Ino oppaayye orra demo ka hawwlase kapopa aane, ikka akka iskattase kide qara koddite, ma xoori Yesuusi in akkine.”

²⁵ Yesuusi ka ishootta kide, “Ishina a matte paata qapnaani in kinnini, karittaayshin ka wa xuumampaya haasawadene piisa amana kapa sekaade!

²⁶ Kiristoosi rakkoose piisa teyyatta ka ulfeenaadippopa kalta isha parpaaccisni in kittoo?”

²⁷ Ka se kammaayye mataaffa Muuse isho a xuumampayaati paayye ka wa qootaadi desa mataaffa qulqulloota oppa lelame piisa takka takka ishootta la'ayshe.

²⁸ Ishootta ete paleetase a opa annaan kapa dehaadeneeyye, Yesuusi a tarpo ka aano pahanaade.

²⁹ Ishootta xoori a kuttati isha naappaden ka kidene, “Amma letta nefo idumte ka ishishshipte qara kittaay, are ino kapa muke.” Semmalla isha ka oori ishootta kapa' mukitta'e tika kelopa kulle.

³⁰ Ka ishootta olli damta kute'e. Ka laaqqoota qeede ka qara Waaqa kalataysade ka oppa moosse ka ishootta daashe.

³¹ Sitiiyyi ildaasso ka panamen, ikka akka Yesuusi kodde upaden. Isha xoori eennow ildaasso tura dapade.

³² Ishootta ka olli kidene, “An poroppa kinnooyye, ikka ino lellooyye ka mataaffase a qulqulloota ino taqqasnoo ka ino la'annooyye, karittinno a apitta mina kupani in co?”

³³ Ishootta ka saatese oppaayyeew xa'en ka Yursaalamipa tiitaawen ka eeyyeeyye tamaarewwasene kudanka takka isho orra a ishootta quda co a pora takkopa ollopa oore akken.

³⁴ Ishootta ka ishootta kiini “Poqalla Yesuusi dukaatanne tootoppa xa'e ka Simooni tura akkaade!”

³⁵ Tamaarewwasene lakki ka xaayshoti desa wa poroppa kodde ka ete Poqalla Yesuusi laaqqoota moosseeyye akka isha upaden ishootta torren.

Yesuusi akkima tamaarewwaadi tura akkaade

³⁶ Ete ishootta sede haasawattaappa caaneeyye, Yesuusi mattaadi'i otantaaysho oppa qa'ade ka ishootta kide, “Nakayta a ishina koddo!”

³⁷ Ishootta xoori a kaarayya akkinaane ishootta pahanaate ikka tatammaqen ka harmo fuuren.

³⁸ Yesuusi xoori i'ishootta kide, “Maana malla tammaqnittan ka karittaayshin karan xata dikatta lakki qapnaannittan?

³⁹ Harkaayyo isho loqqaayyo tooyya ka akkan ana upnaada; ka ana quda qappada ka ana tooyya. Akka ana akkinittan mina'e, kaarayya dakinta ka lafta in qapaneey.”

⁴⁰ Ka ete asse kide kammaayye, harkaadi isho loqqaadi ishootta akkishe.

⁴¹ Ishootta xoori, xasootta ka oppa qawwaawa a koope qaran xaate'e, ikki isha in amannin; Yesuusi ka ishootta kaassade ka kide, “Wa a dammaane iqaptane?”

⁴² Ishootta ka murkuja a waaten shakkayta ishi daashen.

⁴³ Isha ka teyyade ka fuulaaysho tura' dame.

⁴⁴ Yesuusi ka ishootta kide, “Eta an ishin olli cooyye, isase an ishina kide “Wa qootiyyo desa seera a Muuse daasame oppa taafame ka mataaffa xuumampaya isho a masmuureta oppa taafame piisa dikkatta parpaaccisni tooy sede.”

⁴⁵ Ka se kammaayye, akka mataaffasene a qulqulloota matte qapnaatta ettanshane'e, matta ishootta' pane.

⁴⁶ Ka ishootta kide, “Kiristoosi akkima rakkado ka kuyyaata sessattatiiyyi tootoppa xa'o, xattaaw taafamte.

⁴⁷ Akkimse mina'ew, maxxaadin, juppootoppa ooreta ka haseenta juppoota akkatta, Yursaalami paayyatte piitaddaappa samayta piisa torramto ilelamte.

⁴⁸ Sede piisa'e ishina kan a maakkiyya.

⁴⁹ Tin anti, kippeetase a Aappinno ishina daashen, ishina erka; ishna haka moonte xata hupna akka ohaata mina uwwisannittan kara'e, katama Yursaalami kara jara.”

Yesuusi akka moontopa fayyade

⁵⁰ Se kamma Yesuusi katama Yursaalami karaayye tamaarewwaadin sooke ka haka Pittaaniyaati ishoottan aane; ka, eyye harkaadi xaashe ka ishootta sake.

⁵¹ Ka ete ishootta saknooyye, ishootta kapa xa'e ka moontopa fayyade.

⁵² Ishootta ka ishi sakataden ka xasootta kuttan Yursaalamipa tiitaawen.

⁵³ Ka Waaqaaw kalataysanni, umma kuyyaata piisa tika qulqulloota kelaayye dapni in caan.