Luqaasi 23 - Mataafa Qulqulloota

Yesuusi akkima Pilatoosi turopa qeedame

¹ Orrase eyyepa ollopa xoore piisa ka xa'e ka Yesuusi qeede ka Pilatoosi turopa dehayshe.

² Ka isha xasasa paayyen ka kiini, “namoose a orrinno saanta qara maqinnon qara kayne, ‘Ka akka Qeesaari opani kipira in daannini dawrini’ Ka issi kiini, ‘Anti Kiristoosi an nuqusa.’”

³ Pilatoosi ka Yesuusi kaassade ka kide, “Hela atti a nuqusa orra Yihuta'e?” Yesuusi ka ishi oorshe ka kide, “Akka kiiti qara.”

⁴ Sitiiyyi Pilatoosi, saarrasene a qeesewwa isho samaytaseti kide, “Anti namoose qara dapa takka nefo an akkine.”

⁵ Ishootta xoori a kuttati isha xasasen ka kidene, “Namoose are co Kelilaayye paayye ka haka areti, piita Yihuta pisa oppa kollinni ka orra horayta xa'inni.”

Yesuusi akka Herodisi turopa dehaade

⁶ Pilatoosi ete lela Kelila kiino dakayeeyye, ikaassade ka kide, “Hela isha nama piita Kelila'e?”

⁷ Ka ete, akkima Yesuusi piita a Herodiisi mukinnooyye de'e, upnaadeeyye, Herodiisipa kapopa isha erke. Herodisi sitiiyyi Yursaalami kara ca.

⁸ Heroodiisi ete Yesuusi akkeeyye, akata xasoode; maana malla qoota Yesuusi desa dakayni ka a lekatin isha akka xajeelliiy. Ka oto Yesuusi wa orra qawwanna koonooyye akkeeta kippanni.

⁹ Semmalla Herodisi kaassuma lekaya Yesuusi kaassade. Yesuusi xoori we takkan nefo ishi in oorinne.

¹⁰ Saarra a qeesewwa isho kollissampaya a seera eyye qa'aden ka a kuttati ishaaw xasasni.

¹¹ Herodisi ka xelaadi a oranna olliiyyiiw Yesuusi puyade ka qara seese ka ohaata paxaara quda uwwishe ka Pilatoosi qaropaaw isha oorshe ka erke.

¹² Awwse kuyyaasitiiyyi, Herodisi isho Pilatoosi ka olli dinen. Xatta turan olli paarkaalaay.

Yesuusi qara akkima toota faratamti

¹³ Sekkammaayye Pilatoosi, saarra a qeesewwa ka a samayta isho samaytase piisa ollopa hale ka ishootta kide,

¹⁴ “‘Orra horayta xa'inni’ Kiiten ka namoose ana qaropan deeten. Tin anti ka fuulaayshin tura isha qore; umma kisseeta, a ishina qara dehannittanenne, dapa takka nefo namoose qara an teyne.

¹⁵ Herodisi nefoow, qoota dapa takka nefo qara in teynin malla, anopaaw isha oorshe ka erke, namoose dapa a minan to'o takka nefo in koone;

¹⁶ Semmalla in karafa ka isha fura.”

¹⁷ Pilatoosi para paroppa'e, xaysonessuma a qarantarrpeeta oppaayye, nama hidame takka samayta furri.

¹⁸ Samayta piisa ka nessa takkan ullupe ka kiidee, “namoose alle tawshe ka Parpaani ino' fure.”

¹⁹ Parpaani nama katamaappa tiyya xaashe ka nama ishshe ka minan hidame.

²⁰ Pilatoosi Yesuusi fureeta fade ka, a lammattati samayta haasawade.

²¹ Samaytase xoori iullupe ka kide, “Alle fannise! alle fannise!”

²² Pilatoosi ka a sessattati ishootta kideewwe Maana'e, “Xawwa namoose maananne a kata asse dape? Anti wa a minan to'a takkan nefo qara an teyne, semmalla in karafa ka isha fura.”

²³ Ishootta xoori nessaaysho'e kuttushen ka ullupen ka kidene, “Fannise! fannise!” Nessa samayta isho a saarra qeesewwa ka ollin koope.

²⁴ Pilatoosi ka oori wa kaassadene akka ishootta koddane'e ishootta' farate.

²⁵ Ka parpaanese, tiyya xa'issa, ka nama ikassa minan hidame, kaassumaasso qara ishootta' fure; ka akka wa heenane Yesuusi qara kodane'e harkaaysho oppa daashe.

yesuusi akkima fannisame

²⁶ Ikka oori Yesuusi qeeden ka ete ishin annaaneeyye, Simooni Qerenitta, a kantadaayye kallo ka katamaapa kullino akken ka isha qapen ka qara masqalase a Yesuusi xayshen ka Yesuusi kamma isha qattishen.

²⁷ Orra lekayta ka Yesuusi kamma anni. Ishootta oppaayye iskatta a kessoppa tottoomanno ka Yesuusi malla pooyno ka ca.

²⁸ Yesuusi xoori iskattoose opa desa tiitaawe ka ishootta kide, “Ishina iskatta Yursaalamitiiyyi, ana malla in pooyan ma hellaassin isho isi malla pooya.

²⁹ kuyyawwa a oppaayye kidane, ‘Iskatta a hinni in kinnin ka karitta inna xaayni in ka amadda a in luukinnini oo xaaysho sanaya’ de'a.

³⁰ Sitiiyyi orra irrowwa'e ‘Ino qara pi'a!’ ka ‘Kunkunnawwa'e, ino deka!’ Kida paayya.

³¹ Ka kuli, oto sede piisa qoyra qoyya qara kodammittooyye, qoyra koke qara'e, desa atta kodamaaw?”

³² Ka asseew nama a wanjala kode lakki lessaata Yesuusi quda' qeedeneew ka ishin aanen.

³³ Ka ete porase Qaraaniyo taaki. Pukurkura matta nama kidammo kayeneeyye, eyye Yesuusi fannisen. Ka namase wanjala kode lakki, qinda akkitta ka a pittittatin Yesuusi kapa' fannisen.

³⁴ Sekkamma Yesuusi ka kide, “Aappo, wa koonaane in upaneey, ishootta diishe.” Xelase a oranna ka mehaddaadi a kalsanna olli qootte ka qara qoyritta katade.

³⁵ Samayta ka qa'ade ka tooyni; saarra a Yihuta ka isha qara seesni ka kiini, “Orra pila idinsheey, oton keeton isha Kiristoosi, intoonno a isi dinshooy.”

³⁶ Xelase a oranna ka asseew isha qara seese. Ka isha kapopa dehaade ka haddaya isha' qape.

³⁷ Ka asseew ishi kiini, “Atti oton a nuqusa Yihutaatiiyyi, intoonno isi dinsheey.”

³⁸ Ka taafetase kiinitto, “Ini nuqusa a Yihuta” Yesuusi qara xata masqala qara rakken.

Nama dapa kode lakki a Yesuusi olli fannisame

³⁹ Nama dapa kode lakki Yesuusi olli fannisame oppaayye, takka Yesuusi onni ka kiini, “Atti a Kiristoosinni, inntonno isi dinshe ka ino kuli dinsheey.”

⁴⁰ Ataaka xoori isha fukke ka kide, “Atti firrteeta a xaadi pahatoow ke qara kayeey, Waaqa, a fuurto?

⁴¹ Ino ishin dapayta an koone minannen qitaateta a ino parpaaccisnitto akkanne. namoose xoori we takkan nefon in dapne.”

⁴² Ka kamma desa Yesuusi kide, “Poqallaay, oto mankisteetaaytin deenittooyye matte ana oorsado.”

⁴³ Yesuusi ka ishi kide, “Dukaatannen ke kiini, awwe seeyye ana olliiyyi Kenneeti kinnaatta.”

Yesuusi akkima to'e

⁴⁴ Tin a sede kodditeeyye, kuyyaate saateta lehi mina'e kitta, sitiiyyi paayyatteeyye, haka saateta sakaliti'i, piita piisa ka tukkantaawte.

⁴⁵ Piirtota itukkantaawte, kaaranta tika qulqulloota ka otantan xata kaamade ka lakki qite.

⁴⁶ Yesuusi ka nessadi kuttishe ka kide, “Aappo, tin harkaaytippa'en napseetiiyyo diinni” Ka ete asse kide kamma nessa diishe.

⁴⁷ Motolaqitta a eyye co ete wa kodde akkeeyye, ikide “Namoose dukaatannen hanqeelitta” Ka Waaqa ulfeesse.

⁴⁸ Orra wessen tooyeeta eyyepa ollopa de'e piisa, ete wa kodde akkeeyye, nyarrahatanne kessa oppa isi tottoome ka tikkaasso opa kale.

⁴⁹ Orra fayya Yesuusi upo isho iskatta Kelilaayye paayye ka isha kamma anno, piisa lake desa qaade ka wessen tooyni.

Yesuusi akkima hawlame

⁵⁰ Nama takka Yoosefi kidammo Armaatiyasi katamasene a Yihuta kara kala. Isha nefo nama paxaara ka hanqeellitta; ka orra firtishoonkota Yihuta oppa takka.

⁵¹ a koddito ma sullaata isho mura a orra a Yihuta oppa in qapo; isha nama mankisteeta Waaqa kippeetan asanno.

⁵² Ka Pilatoosi kapopa aane; ka akka pukka Yesuusi ishi daasho kaassade.

⁵³ Ka pukkase lekkishe ka ohaata qahanaayteeta a xaynaata qora talpa oppa dawamte quda' mare; Ka hawla a shila karandela qoten, turan a nama takka nefo kara in hawlammin kara isha hawle.

⁵⁴ Kuyyaase nefo, kuyyaata a oppaayye orra sampata Yihuta tura harmisanno; Sampata ka paayyatta dehaanno.

⁵⁵ Iskattase Kelilaayye Yesuusi kamma de'e, Yoosefi kamma'e aanen ka hawlase tooyen ka akkima pukkase nefo hawlame akken.

⁵⁶ Ka tikkaasso opa kalen ka pukkaseti'i qimaameta isho shittoota alaawnitto harmishen ka akka seera qara'e, sampatase a Yihutaatiiyyi nessaden ka nakayen.