Luqaasi 22 - Mataafa Qulqulloota

Sullaata Yesuusi qara sulamte

¹ Sitiiyyi xayso nessuma a laaqqota, isasene a qaran tarpeeta kidamma kela foolsatte

² Saarra qeesewwa isho kollissampaya a seera, qoota samayta fuuren malla, saanta ishin Yesuusi qapan ka ishshane dekaan dekatti faddanni.

³ Sitiiyyi seetana ka Yihuta Asqorottittase erkamampaya a Yesuusi kudanka lakki oppaayye takka kodde karopa kale.

⁴ Semmalla Yihuta ka saarra qeesewwa isho ajajampaya a tooytampaya a tika qulqulloota kapopa aane ka atta akkima Yesuusi qapsiiso, ishootta olli oorsade.

⁵ Ishootta ka seppa xasooden ka akka kaaja kuli ishi daashane olli kalen.

⁶ Isha ka oppa owsade ka a orra in upnin mali akka Yesuusi qapsiiso aroota ettanto faddanni.

Yesuusi akka eetota a qaran tarrpeeta erkamampayaadi olli dame

⁷ Sekkammaayye xayso nessumasene a laaqqota a oppaayye laahase a qaran tarpeeta qallaane kayte.

⁸ Yesuusi ka Peetiroosi isho Yohaannisi erke ka ishootta kide, “Akkan eetotose a qaran tarpeeta dammo'e aana ka ino' harmisha.”

⁹ Ishootta ka isha kaassaden ka kidene, “Eetotose a qaran tarpeeta akkan aysha ke harminno heenta?”

¹⁰ Yesuusi ka ishootta kide, “Oto katamaappopa kullinittaneeyye, tin nama okkotan pisha haano akkitaneey, isha kamma' aana ka tika a namoose karopa kullo karopa kamma kulla.

¹¹ Ka aappa tikoosetiti kida, ‘Kollissampaytinno ike kiini, tika xaykitta an kela tamaarewwaayyo ollin eetota a qaran tarpeeta dammo a xaame?’

¹² Isha nefo tika kuttayteeta a pafta qara kitto ka fayya harmisamte ishina akkishaay, eyye ino harmisha.”

¹³ Tamaarewwasene lakki ka aanen ka akka Yesuusi ishootta kide mina we piisa ka kodden, ikka akken; ka eetotase a qaran tarpeeta eyye' harmishen.

Taanteta a qulqulloota qurpaana

¹⁴ Ete saatetase kayteeyye Yesuusi, erkamampayasene xaadi olliiyyi damta kuti'e.

¹⁵ Ka ishootta kide, “A rakkoota ana qara in kaynin turanne, akkan ishin olli eetotose a qaran tarpeeta damo'e a kuttatin xajeelli.

¹⁶ In ishina kiini, haka mankisteeta Waaqatiiyyi, dukaata wosseneti a juutamte immakootan laka sooknitto kara'e arepa desa eetotose a qaran tarpeeta an damo.”

¹⁷ Se kammaayye Yesuusi tiwwa qeede ka qara Waaqa kalataysade ka kide, “Hinda ka ollin kaya.”

¹⁸ Dukaatan ishina kiini, “Ammaayye paayyatte haka mankisteese Waaqa deenitto kara'e ikkaytoose a dalta a wayneeta oppa an ikko.”

¹⁹ Kammadesa Yesuusi laaqqoota qeedeew ka qara Waaqa kalataysade ka oppa moosse ka ishootta kide, “Hinda, sede dakintase xayyo ishin malla daasammittooy, sede matte anan oorsatta koda.”

²⁰ Ka eetota kammaayye tiwwa qeedeew ka ishootta daashe ka kide, “Tiwwoose kodeetase haaraya a diikase xayyo ishin malla tuqamon, kodammitto.

²¹ “Ma xoori harka a nama ana qapsiisooti, tin are tomoppa ana olli dammi.

²² Inna a nama, akka turan qootaadi desa muramte mina'e, ito'a. Ma xoori, nama inna a nama toota qapsiiso, oo isha kido!”

²³ Ishootta ka, oli kakaassaden ka kidene, “ino oppaayye ayno asse koda?”

Ayno piisa qara jaalli

²⁴ Se kammaayye ishootta ka oli shiishsha paayyen ka kidene “Ayno ino piisa qara jaalli?”

²⁵ Yesuusi xoori i'ishootta kide, “Nuqussa piisseti, samayta qaraayye hupna ukkumeeta'e qapan; mukissampaya ka, a samayta pa'aarumta koona kidammi.

²⁶ Ishina xoori a xaaysho mina koddeeta ishin faani in kitto; sekapaayye a ishin oppa nama kutta kodde, a nama shakka mina' koddo; a saara koddeew a orxayta mina koddo.

²⁷ Adamta kute'e ka dammo isho a qa'ade ka ishi paata deddehanno oppaayye, a xaame kutti? Akutta kidammo sede damta kute'enne? Anti xoori ishina oppaayye an orxayta mina.

²⁸ Ishina kiseetiyyo a rakkoota pisa oppaayye ana olli japaatten.

²⁹ Semmalla akka Aappinno mankisteetaadi qara ana shuume, mina'e, anti mankisteetiyyo qara'en ishin shuuma.

³⁰ Semmalla mankisteetiyyo oppaayye damta kutiitan ka damtan ka ikkitan; ka sufaana qara kutiitan ka kaffasene a Isira'eeli kudanka lakki qara' farattan.”

Yesuusi akkima Peetiroosi isha marmado turanneew haasawade

³¹ Kamma desa Yesuusi ikide, “Simooni Simooni, tin, akkima qotampayta miillatoppaayye ukkashsha xayyinno mina'e, seetana ishin xayyissa fade.

³² Anti xoori akka amanteetaayti in pannini'in Waaqopa ke' qinsada. Atti oto tiittaawtooyye, hellaassin kokkonnayshe.”

³³ Peetiroosi ka kide, “Poqallaay, kadi punu hida ka toota kodditeeyye, anti ke olli anta in harmisade.”

³⁴ Yesuusi xoori i'ishi kide, “Peetiroosi! in ke kiini awwe a lukkalitta in iyyinin turanne, ‘An isha an upo’ kiita ka sessaan ana marmatta.”

³⁵ Ka sekkammaayye tamaarewwaadi kide, “Hela awtan porsa ka qarateeta isho xopadda maliiyyi, ishin erkeeyye, wa ishina qaje icaane?” Ishootta ka ishi oorshen ka kidene, “we takkan nefo ino in qajine.”

³⁶ Yesuusi ka ishootta kide, “Amma oori nama porsa taaki qarateeta qapo a isquda teyyado. Nama koraateta in qapnin nefo, a mehaddaadi a kalsanna kato ka koraateeta piddado.

³⁷ In ishina kiini, wa turan qootiyyo desa taafame piisa qoota dikkatta ishootta faanitto malla, qaalese a mataafa qulqulloota kiinitto ‘Tiyyoolayaappa'e dikame, ana qara dikkatta isheeta faani.

³⁸ Tamaarewwaadi ka ishi kidene, “Poqallaay, tin koraateta lakki areeyye ca.” Isha ka ishootta kide, “ikoddite.”

Yesuusi akkima Taprasaytiiyyi qinsade

³⁹ Yesuusi katamaappa sooke ka akka kollimaadi mina'e, Taprasaytipa aane. Tamaarewwaadi ka isha olli aanen.

⁴⁰ Ete eeyye kayeneeyye, Yesuusi ka ishootta kide, “Akka ekkaysumaappa a piinini'i, Waaqopa qinsada.”

⁴¹ Ka sekkamma a xaptitta daka mina kitto ishootta kapa desa sekaade ka kilpiippade ka qinsade ka kide,

⁴² “Aappo, oton iheentaayye, tiwwoosene a rakkoota alle ana qara sekayshe. Ma xoori a heennaati qara koddito diisheey, xayyo qara in koddinin.”

⁴³ Sitiiyyi erkampattoota a moonte deete ka isha tura akkaatte ka isha kokkonnasse.

⁴⁴ Ikka karan xata dikke qaapni ka a kuttati qinsanni, ditiita ka a diika mina isha qara piitopa tajtajni.

⁴⁵ Ka qinseetase qara xa'e ka tamaarewwaadi kapopa aane ka nyarrahata qara koopte qaran xaate'e, ishootta muke akke.

⁴⁶ Ka ishootta kide, “Maana'e muknittan? Sekkapaayye akka ekkaysuma oppa a piinini'i, xa'a ka Waaqa qinsada.”

Yesuusi akkima qapame

⁴⁷ Yesuusi ete sede haasawattaappa cooyye, orra lekayta ka eennow de'e. A ishoottan de'e nefo, Yihutase kudanka lakkasene oppa takka kodde. Ka Yesuusi dinkeeta isha kapopa dehaade.

⁴⁸ Yesuusi xoori i'ishi kide, “Yihuta! hela dinkittanne inna a nama qapsiisni?”

⁴⁹ Tamaarewwasene Yesuusi kapa ca, ete wa koddina akkeneeyye, i Yesuusi kidene, “Poqallaay! in koraatetan ishootta qiina?”

⁵⁰ Ishootta oppa nama takka ka orxayta a saara qeesewwa koraatetan dayshe ka qudaayye napahata a akkitta mure.

⁵¹ Yesuusi xoori ikide, “Diishe, ka lammatta asse in kodan.” Ka napahatase a namaseti quda qappade ka dinshe.

⁵² Se kammaayye Yesuusi, saarrasene a qeesewwa ka ajajampaya a tooytampaya a tika qulqulloota isho qimootase a piita isha qapa deete'e kide, “Sede a koraatewwa isho kumaya qapatten ka ana qapa deetene, hela an kera?

⁵³ An awwta piisa tika qulqulloota kelaayye, ishin olliiyyi cooyye, ana a' qapne. ammaa xoori ini etaassin ka eta hupna tukkanta.”

Peetiroosi akka Yesuusi marmade

⁵⁴ Sekkammaayye orrase, Yesuusi qeede ka, tika saara qeesewwa opa ishin aane. Peetiroosi ka lakeedesa isha kamma desa anni.

⁵⁵ Orrase ka tikase kara apitta katade ka kapa ollin qaa'e. Peetiroosi ka de'e ka ishootta oppa kuti'e.

⁵⁶ Ete Peetiroosi apittase kapa kuti'eyye, orxayteeta takka ka la'aytase a apitta karadesa isha akkite ka isha quda ilda koote, ka kiite “Tin namoose turan Yesuusi olli ca.”

⁵⁷ Peetiroosi xoori imarmade ka kide, “Iskatteetayti, anti isha an upo.”

⁵⁸ Eta shakkaya kammaayye, nama pila ka Petiroosi akkeew ka ishi kide, “Atti ishootta oppa a takka.” Peetiroosi ka kideewwe, “Namo! anti ishoottoppa an qapo.”

⁵⁹ Ete saateta takka mina kitto jare kammaayyeew, nama takka a pilaa ka Peetiroosi qara nessa kokkonnayshe ka kideewwe, “namoose qoota Kelelitta kodde malla, dukaatanne Yesuusi olli ca.”

⁶⁰ Peetiroosi xoori ikide, “Namo! wa kiinitta anti an upo.” Ete sede haasawattaappa cooyye, lukkalitta ka eennow iyye.

⁶¹ Sitiiyyi Poqalla Yesuusi ka desa tiitawe ka Peetiroosipa desa tooyyade. Peetiroosi ka qaalese a Poqalla Yesuusi haasawade ka kide, “Awwe a lukkalitta in iyyinin turanne sessan ana marmatta” Matte oorsade.

⁶² Ka lakopa sooke ka a kuttati pooye.

⁶³ Sitiiyyi orrase Yesuusi qape ka isha qara seesni ka ishoppa qiini.

⁶⁴ Ka ilda qara ishi hideew ka ishi kiini, “Ayno ke dayshe? Oton a xuumampaytaayye intoonno upadooy.”

⁶⁵ Ka we lekaya isha qara' haasawanni ka ishoppa onni.

Yesuusi akka firti shoonkota turopa qeedame

⁶⁶ Ete pariteeyye, qimoota piita ka saarra qeesewwa isho kollissampaya a seera ollopa aanen. Ka Yesuusi isi turopa dehayshen.

⁶⁷ Ka ishi kidene, “Oton a Kiristoosiiyyi intoonno ino' leleey?” Isha xoori i'ishootta kide, “Katin ishina lela nefooyye, a ana amantan;

⁶⁸ Umma katin ishin kaassada nefo, a ana'e a oorissan.

⁶⁹ Ma xoori ammaayye paayyatte inna a nama, harka a hupnampaytase a Waaqati'i akkitta kuti'an.”

⁷⁰ Ikka piisani isha kaassaden ka kidene, “Hela kuli atti a inna a Waaqa'e?” Isha ka ishootta kide, “Aa akka ishina kiiten qara.”

⁷¹ Ishootta ka kidene, “Qaaleta afaadippa sookte ino mattinno'e in dakayneey arepa desa maakkitta maana'e ino parpaaccisniiw?”