Luqaasi 20 - Mataafa Qulqulloota

Yesuusi hupna ukkumeeta a maanaatin akka koda koono kaassuma a ishi dehaadee

¹ Kuyyaata takkaayye a Yesuusi tika qulqulloota kela co ka samaytase kollinno ka otootase a fayya torrinooyye, saarra qeesewwa ka kollissampaya a seera isho qimoota piita, isha kapopa de'en.

² Ka isha kaassaden ka kidene, “Intoonno, ino' leleey wossen a koonitta hupna ukkumeeta a maanaatinni kooni? Taaki akka wossen kooto'e a hupna a ukkumeeta ke' daashe ayno?”

³ Yesuusi ka ishootta kide, “Anti nefo kaassuma takkanen ishin kaassadaaw, intoonno ana oorshaay:

⁴ Sede a Yohaannisi pishaan orra jaqno, hela Waaqa kapa deetem, moon nama kapa deete?”

⁵ Ishootta ka olli oorsaden ka kidene, “Oton in kiina ‘Waaqa kapa deeteeyye’ i'ino kida, ‘maana malla isha a amannin?’

⁶ Oton in kiinaawwe ‘Nama kapa deeteeyye’ qoota samayta piisa akkima Yohaannisi xuumampayta kodde amanno malla, samayta dakaanne ino dakka”

⁷ Ka semmalla ishi orshen ka kidene, “Pora ishi deete ino an upno”

⁸ Yesuusi ka ishootta kideewwe, “Anti nefo hupna a ukkumeeta a maanaatin akkiman kodaddoosen koono, ishina an lelo.”

Pahanasene a qotampaya dula wayneeta

⁹ Kamma desa Yesuusi pahanoosene samayta haasawatta paayye ka kide, “Nama takka, dishima wayneeta'e dishade ka olturatta daashe ka, piita pila opa aane ka a in tiitaawnin mali a kuttaati a jare

¹⁰ Ete wayneetase paliteeyye; aappaase a dula wayneeta, akka qeeraytaadi ishi qeedo'e, orxayta takka qotampayasene kapopa erke. Qotampayasene xoori orxaytase oppa qiden ka a we ishi in daannin maliiyyi harka lulen kalshen.

¹¹ Ete orxayta pila erkeew, ikka oppa qideneew ka jeershen ka a we ishi in daannin maliiyyi, harka lulen kalsheenew

¹² Ikka orxayta a sessatta erkeew. Ikka qideneew ka matayshen ka alle lakopa katen.

¹³ Se kammaayye aappaase a dula ka kide, ‘Amma oori maanan kodaaw? Innaayyo an jaalanna'en erka; takka punu i'isha ulfeessane kodditaay!’

¹⁴ Qotampayasene xoori, ete isha akkeneeyye, i'olli kidene, ‘Ini lehampaytase ishaay, xooya ka ikanna; lehandaadi ka xanno kodden!’

¹⁵ Ka semmalla dulase a wayneeta oppaayye innasene lakopa titen ka ishshen. Ka kuliyya, aappoose a dula wayneeta, maana qotampayosen qara koda ishina pahata?

¹⁶ Aappaase a dula wayneeta isha mattaadi de'a ka qotampayasene leysha; ka dulase a wayneeta qotampaya pilaati daasha.” Orrase ete sede dakayeeyye, ikide, “Sede pakkanna in koddinin.”

¹⁷ Yesuusi xoori ishoottopa desa tooyyade ka kide, “Ka kuli sede taafamte ka kiinitto, ‘Dakase a orra qupeeta qupno puyade, isha qeppeelitta qara' kale;’ ka matta tika kodde, maana akkinni?

¹⁸ Nama dakose qara pi'o, piisa qeqqepa; nama a dakose isha qara pi'o xoori inyalxattaawa.”

Kaassuma qoota kipira daassatati desa dehaade

¹⁹ Kollissampaya a seera isho saarra qeesewwa, akkima pahanoosen ishootta qara haasawade upnaaden ka saateta oppaayye isha qapan faden. Ma xoori samayta fuuren.

²⁰ Ka semmalla Yesuusi qapa'e, eta a ishootta ettana faddanni ka qaaleta wanjala a ishin hupna ukkumeeta isho firteeta a mukissampayta turopa isha dehayshan faddanni. Ka lettissampaya a orra taanteta pahanaada ka afa talafan isha qapa isha kapopa erken.

²¹ Lettissampayasene ka Yesuusi kapopa dehaaden ka kiini, “Kollissampayto, wa atti haasawannitta ka orra kollinnitta akkiman dukaata in upna. Atti dukaatanne saanta Waaqa kollinni; umma nama takka nefo olqaran a jaalinni a kitto.

²² intoonno ino' leleey hela seerinno oppaayye nuqusase kutta a piita Roomiti kipira daassata ifaqqatamem mon, in faqqatamme?”

²³ Yesuusi xoori falqaaysho'e upnaade ka ishootta kide,

²⁴ “Intoonno, shilinka takka ana akkishaay, pahanoosen are qara pojame isho maxxose are qara' taafame, a ayno?” Ishootta ka ishi oorshen ka kidene, “Anuqusase kutta a piita Roomiti.”

²⁵ Yesuusi ka kide, “Asseeyye, a nuqusa nuqusa daasha ka a Waaqa Waaqa daasha.”

²⁶ Ishootta oori, fuula samayta tura haasaan isha qapsiissa in ettaninnine; Ka semmalla afa ishootta oorshe oppa qawwaawen ka jaw kiden.

Kaassuma qoota tootoppa xaanaati desa dehaade

²⁷ Saatuqaata a kiinitto, “Tootoppa xaana in caan” Ka Yesuusi kapopa dete ka isha kaassatte ka kiite.

²⁸ “Kollissampayto, Muuse i'ino taafe ka kide, ‘Nama takka oton a inna in xaayannin mali iskatteetaadi qara to'ayye, innaasso a iskatteetaadi quda' ooren ka oppaayye ishi hellaa xaayen’

²⁹ Hellaa toola takkati tappa ka caan; qaarta a ishootta piisa tura qatte ka heme ka a inna in xaaynin mali to'e.

³⁰ kussitta a isha kamma qato ka iskatteetase quda' oore.

³¹ Asessatta ka asseew isheetta quda ooreew. Ka piisanti tappantiiyyi asse iskatteese quda' ooren ka a hella in xaaynin mali le'en.

³² Ishootta piisa kammaayye iskatteese ka toote.

³³ Ishootta tappa piisa taran isheetta hemeneey, awta orra a le'e tootoppa xaanooyye, iskatteese a ayno koddita?”

³⁴ Yesuusi ka ishootta oorshe ka kide, “Orra piisseti ihemini ka hemammi,

³⁵ orra tootoppa xaana ka piita itturopa deeto oppa kallaatta ishootta daasamte, xoori in heman umma in hemaman.

³⁶ Qoota a erkampattowwa Waaqa mina koddan malla, in le'an, qoota tootoppaayye xa'an malla, ishootta hellaa a Waaqa.

³⁷ Qoota tootoppa xaanaati desa xoori, Muuse, torraasene xaadi a qoota apittase a hujjittoppatidesa haasawade oppaayye, iPoqalla hale ka kide, ‘Waaqa Aprihaami! Waaqa Hisaaqi! Waaqa Yayqoopi!’

³⁸ Sene piisa qoota Waaqan qoota sene piisa caatta qapan malla, Waaqa a orra co diisheey, Waaqa orra le'eti'in.”

³⁹ Kollissampaya a seera oppaayye a demo ka kidene, “Kollissampayto, a paxaara'e haasawatte”

⁴⁰ Se kammaayye oori, nama Yesuusi kaassuma dehassa maxanyume in co.

Kaassuma qoota Kiristoosi desa kaassatame

⁴¹ Se kammaayye Yesuusi i'ishootta kide, “Ata orra atta Kiristoosi kiini ‘Inna Taawwiti?’

^42-43 Ha Taawwiti mataafa masmuureta kara mattaadi i kide, ‘Ha Waaqa iPoqallaayyoo kide: hakan nyaapaayti hupnaayti a ukkumeeta kelopa ke oorinno kara'e, harkiyyo a akkittaati kuti'e’

⁴⁴ Ka kuli oto Taawwiti mattaadi'i Kiristoosi ‘Poqalla’ kiinooyye, ayshanne isha inna Taawwiti koddaaw?”

Yesuusi akka kide kollissampaya a seera kapa sekaada

⁴⁵ A samaytase piisa isha dakkaysattaappa cooyye, Yesuusi itamaarewwaadi kide,

⁴⁶ “Kollissampayasene a seera, mehadda deddera kalsanna ka arepa ka arepa pora tittiitaawna ka urmaladdaappa akka orra kaareeta ishootta oorshoow heena ka tikase a qinseeta a orra Yihuta tikka a sankultatiyyi, pora kutiitta a ulfeena'ew faana kapa isi tooytaada.

⁴⁷ Ka isi akkissa malla qinseetaaysho deranni, ishootta tikka a hiyyettewwa a diirraasso qara le'eneti saranni. Ka isi akkissa malla qinseetaaysho deranni. Semmalla ishootta firteeta a kutta'e ishootta qara kaya.”