Luqaasi 19 - Mataafa Qulqulloota

Yesuusi isho Sakkiyoosi

¹ Yesuusi katama Iyyaarko karopa kule ka oppan tarpini,

² Eyyeyye teyantoolayta takka a nama Sakkiyoosi kidammo ka saara a orra qarata qaratnooti kodde ca.

³ Isha Yesuusi a xaame akkima kodde akkeeta faani; ma xoori qoota kumma'i malla, lekuma a samayta qaran xaate'e isha akkeeta in ettaninne.

⁴ Yesuusi qoota eeppa desa tarpino malla, Sakkiyoosi isha akkeeta'e samayta tura qatte ka keere ka qoyra takka a leya qaropa fayyade.

⁵ Yesuusi ete porase oppa kayeeyye, moontandela tooyyade ka Sakkiyoosi kide, “Sakkiyoosi, awwe tikaayti nakaya ana faaniy, jarjarrtan qoyroose qara lekkado.”

⁶ Sakkiyoosi ka jarjartan lekkade ka xasan tikaadipa Yesuusi teyyade.

⁷ Orra sede akke piisa ka Yesuusi qara qoojqooje ka kide “namoose ha tika juppoolayta opa damta kulle.”

⁸ Sakkiyoosi xoori iqa'ade ka Poqalla Yesuusi kide, “Poqallaay! tin teyanta an qapo piisa qaraayye, paka takkan teekolaya daasha. Oton sassapannen nama qara kuura qeede nefooyye, harka afuri'in oorsha.”

⁹ Yesuusi ka kide, “namoose kuli sanynyeeta Aprihaamiiwwiiy, awwe dina tikooseti kodde.

¹⁰ Inna anama isase patte fadeeta ka dinissae de'e.”

Pahanasene a orxaya kudani

¹¹ Ete orra sede dakkaysattaappa cooyye, Yesuusi ka pahana takkan ishootta leleew; wa malla lele nefo isha qoota katama Yursaalami kapa dehaade malla, a mankisteeta Waaqa ennow deeto qoota orra pahanaate malla.

¹² Semmalla Yesuusi ka kide, “Nama takka sanynyeeta nuqusa kodde nuqusuma akkatta ka tiitaawa'e piita seka oppa aane.

¹³ Ka a in annin turan, orxayaadi oppa nama kudan hale ka matta matta mina ishootta miinaana kudan kudan daashe ka kide, ‘Hakan oorro kara ishin nakata.’

¹⁴ Orra piitaayshoti xoori qoota isha needdan malla, a isha' tawe kammaayye nama isha kamma erken ka kidene, “namoose akka ino qara nuqusa koddo, ino an henno!”

¹⁵ “A kodditoma isha nuqusa kodde ka kale. Ka orxayaasene xaadi a ishootta kaaja daashe, kaajasene a ishootta daasheetin akka nakaten ka tookta a kela qeeden upnaatta'e, orxayaadi ollopa halacciise.

¹⁶ Orxayta paayyota ka dehaade ka kide, ‘Poqallaay, tin miinaanase kudan a ana daasse kelaayye, miinaana pila kudan in tookta de'e.’

¹⁷ Poqallaadi ka ishi kide, ‘Atti a orxayta fayya, wa paxaara'e koote; wa shakkaatinni amanamteey, anti katama kudan qara'en hupna ukkumeeta ke daashe.’

¹⁸ Orxayta lammatta ka dehaadeew ka kide, ‘Poqallaay, tin miinaanase a ana daasse kelaayye, miinaana pila keni tookta de'e.’

¹⁹ Poqallaadi ka ishi kideewwe, ‘Atti katama ken qara'en ke kuli shuumeew.’

²⁰ “Orxayta pila ka dehaadew ka kide, ‘Poqallaay, tin are kaajaatti, japaroppa'en sukke. Ka eyye xaaye.

²¹ Wan malla, asse kode nefo qoota atti hupnampayta koddite ka wa a xaayannini teyyannitto ka a iyyaalli ini ferannitto upnaade ka ke fuurey malla.’

²² Poqallaadi ka ishi kide, ‘Atti a orxayta a neeqa! Afoosen a haasawatteetinniiwwin ke qara farata! Akkiman karpampayta kodde ka wa an xaaynini teyyanno ka wa an aylaannin feranno, i''uptaay;

²³ ka kuli maana'e kaajaayyo paanketa an kara tookta teyo kara ana'e a xaaynin? Eten kaleeyye, helani pirrewwaayyo tookta ollinnin teyyanni heeneey.’

²⁴ Se kammaayye poqallasene oori orra eyyeppa qa'anno'e kide ‘Miinaaniyyo kudan isha qara qeeda ka orxaytose miinaana kudan qapo' daasha.’

²⁵ Ishootta ka ishi kidene ‘Poqallaay, isha akku miinaana kudani qapa.’

²⁶ poqallasene ka ishootta oorshe ka kide, ‘In ishina kiini, a qapo qara'ew ishi daasamta; a in qapnin xoori sede a qapo nefo qara qeedama.

²⁷ Ma xoori paarkaaladdosene xayyo, akkan ishootta qara nuqusumo in heenini arepa dehaysha ka fuuliyyo tura leysha.’”

²⁸ Yesuusi ete pahanoosene haasawade kammaayye, Yursaalamipa anta kammaaw caade ka tamaarewwaadi tura desa anni.

Yesuusi akkima ulfeena kuttan Yursaalamipa kale

²⁹ Yesuusi ete katama Peete faake isho a Pittaaniya a irroota Taprasayti kapa ca kapa kayeeyye, tamaarewwaadi oppaayye nama lakki erke ka kide,

³⁰ “Paleese ishin tura kitto karopa aana ka, oto eyye kaytaneeyye, innayya harreeta, a nama takka nefo turan qara in kutiinini, a eyye hiddame'e akkitaney, fura ka ishin xooya.

³¹ Oton nama ishin kaassanni ka kiini, ‘Maana malla' furrittaneeyye?’ Ishi oorsha ka kida, ‘Poqalla'e parpaaccisni.’”

³² Isaasene erkame ka aanen ka, we piisa akka Yesuusi ishootta kide qara a kodde akken.

³³ Ete innayyasene a harreeta furraaneeyye, toolase a innayya harreeta ka ishootta kide, “Maana malla' furrittan?”

³⁴ Ishootta ka oorshen ka kidene, “Poqalla faani.”

³⁵ Ka innayyasene a harreeta Yesuusi kapopan de'en ka ohawwaasso innayyasene a harreeta qara afen; ka akka Yesuusi qara kuti'o koden.

³⁶ Yesuusi ete annooyye, orra ohawwaasso'e poroppan desa isha turan desa afni.

³⁷ Yesuusi ete katama Yursaalami kapa dehaadeeyye, irrootase Taprasaytitiiyyi opaxata lekkanni; sitiiyyi orrase Yesuusi kamma anno piisa, qoota koda orra qawwanno akke ka xasan immakaade malla, nessaaysho'e kuttishen ka Waaqa kalataysatta paayyen

³⁸ ka kidene, “Nuqusa maxxa Waaqan deeno, a eeppisame! Nakayta a moonta koddo, ulfeena a moonte, Waaqa koddo!”

³⁹ Feresaatase samaytoppa kitto takka takka xoori, i Yesuusi kiite, “Kollissampayto, tamaarewwaatti jaw kiishe.”

⁴⁰ Yesuusi ka ishootta oorshe ka kide, “In ishina kiini ‘Kadi punu ishootta jaw kidaneeyye, dakadda ullupa.”

Yesuusi akka katama Yursaalami malla pooye

⁴¹ Yesuusi ete katama Yursaalami kapa' dehaade ka akkeeyye, ishootta malla pooye.

⁴² Ka kide, “Atti wa nakaytaayti parpaaccisna katin awwe nefo upnaatte maana in kinnin; amma xoori wossen ildaatti tura ijuutamen.

⁴³ Kuyyaata a oppaayye nyaapaayti de'o ka ke kapa muro ka ke kapa kawatta dawo ka qinda piisaayye desa ke qaatqaato de'a.

⁴⁴ Ka ke isho hellaatti a ke kara ca piitan dakka ka pira, umma an qinnin mali daka takka nefo poraadi oppa ke in hatisho, sede nefo wa malla asse koddita qooota a eta a oppa Waaqa ke dinissa de'e a upnaannin malla.”

Yesuusi akka tika qulqulloota kelaayye orra urmala heranno daane

⁴⁵ Yesuusi tika qulqulloota karopa kulle ka orra tika qulqulloota kelaayye urmala heranno alle daana paayye.

⁴⁶ Ka ishootta kide, “Itaafamte ka kiini, ‘Tikiyyo tika qinseeta'e koddita.’ Ishina xoori rahana a sarampayaati'i kooten.”

⁴⁷ Yesuusi, kuyyaata piisa tika qulqulloota kela orra kollinni. Saarra qeesewwa ka kollissampaya a seera isho saarra samayta xoori, isha ikassa faani.

⁴⁸ Ma xoori qoota karitta orra piisa Yesuusi dakkaysatta jaalanno malla, kola isha ikassa faana, we takkan nefo koda in ettaninne.