Luqaasi 18 - Mataafa Qulqulloota

Teekolayteeta takka a hiyyeetteta isho tiiyyoolayta ataanynya

¹ Se kammaayye, Yesuusi akka a in kafannin mali, kuyyaata piisa qinsatta ishootta parpaaccisnitto kollissa'e pahanoosen ishootta' lele ka kide,

² “Katama takkan oppaayye taanynya takkan Waaqa fuuri in kinnini ka nama nefo fokkisanni in kinnini'i ca.

³ Hiyyeetteta takka ka katamoosen kara kalta ka taanynyosene kapopa anta quda' tawni ka isha kiini, ‘Deexase an paarkaalaayyo olli qapo desa ana' farate’

⁴ Isha ka deexose mura mali a kuttati jare. Ka kammaayye, isi karan xata dikade ka kide, ‘Kaan punu Waaqa an fuuri an kinnin ka nama nefo an fokkisanni an kinniniiy,

⁵ hiyyeettese qoota ana payyahisse malla, in ishi dee'aadi farata. Ataakkati deena quda'e tawta ka ana payyahissaay;’”

⁶ Kamma desa Poqalla Yesuusi ikide, “Wa ukkuttootase a taanynya haasawade matte qapnaada.

⁷ Ka kuli Waaqa, samaytase xaadi halkeetta ka kuyyaata ishopaaw ullupno ka isha qinsanno'e, dukaata in farato? Ka tuffattaanne qaarqaarsaadi ishootta qara jarsha?

⁸ Anti in ishina kiini, Waaqa irra qara ishootta dukaata farata. Ma xoori, inna a nama awta deenaaneeyye, hela ipiita qara amanteeta teya?”

Feresittase isi peepno isho naalaytase a nama qarata qaratno

⁹ Kamma desaaw Yesuusi, orra issi kiino, “Ino an hanqeellaya” Ka orra pila puyanno'e pahanoosen lele ka kide,

¹⁰ “Nama lakki tika qulqulloota kelopa qinseeta aane; takka Feresitta, takka'ew nama qarata qaratino.

¹¹ “Feresitta iqaade ka isi karan xata qinsade ka kide, ‘Waaqqo, anti qootan a orra pila mina saramayta ka ukkuttoota isho dahalampayta an koddinin malla in ke kalataysanni; ka qootan namoose qarata qaratno nefo an pahanin malla ke kalataysanni.

¹² Anti torpaappa kuyyaata lakkin damta musanni ka waan akkanna piisa qaraayye, kuma kundatta sookinni ka kalinni.’

¹³ “namoose qarata qaratino xoori, laka desa qa'ade, umma opeela kideeta ka moontandela tooyyatta nefo in heennaanne ma, harkaadinni kessoppa issi tottoommi ka qinsanni ka kiini, ‘Waaqqo, ana juppolayta maare.’

¹⁴ “In ishina kiini, a hanqeelluma akkade ka tikaadipa kale, namoose qarata qaratno diisheey, Feresittan. Nama a moontopeela isi kuttinno piisa, xata shakkanni; nama xata isi shakkinno xoori, opeela kuttanni.”

Yesuusi akkima hellaa' sake

¹⁵ Akka Yesuusi hellaa shashakka qara harkaadi qapado'e, orra Yesuusi kapopa hellaan de. Tamaarewwa Yesuusi ka sede akken ka orra peeqen.

¹⁶ Yesuusi xoori hellaasene shashakka'e isi kapopa halaade ka kide, “Mankisteeta Waaqa a sene asse pappahaati'iy, hella an dawran, a ana kapopa de'en.

¹⁷ Dukaatannen ishina kiini, nama mankisteeta Waaqa akkima hellaa shakshakka mina in teyyannini, isheetoppopa in kalo.”

Teyaanta piita ka mankisteeta moonta

¹⁸ Saarra Yihutaata oppa takka ka Yesuusi kaassade ka kide, “Atti kollissampayta, a paxaara, akkan caatta parpara akkado'e, maana kodeeta ana faani?”

¹⁹ Yesuusi ka kide, “Maana'e a paxaara ana kiini? Waaqa takkayta mali a paxaara in cooy.

²⁰ Ajajjasene kiina'e ‘In dahalan/ in dahalsadan in ishshan, in hatan, darta in maakkuman, aappaayshin ka aayyaassin ulfeesse’ i'upta.”

²¹ namase ka ishi oorshe ka kide, “Ajajaddosene an shakkiiwwin paayye ka tooyte.”

²² Yesuusi ete sede dakayeeyye, inamaseti kide, “Asseeyye we takkan kodeetaaw ke hase; wa a qapta piisa kate ka kaajosen teekolaya qoote, moonteeyye teyanta ollopa tuulamte akkattaay ka de'e ka ana kamma xooye.”

²³ Namase xoori qoota teyanta kutta qapo malla, ete sede dakayeeyye, a kuttaati nyarrahe.

²⁴ Yesuusi ka akka namase nyarrahe akke ka kide, “Teyantoolaya'e, mankisteeta Waaqa oppopa kalaa'e, oo attan rakkoota!

²⁵ A teyantoolayta mankisteeta Waaqa oppopa kalo kapaayye, a kaala qaawa marfeeta karan kullo sholla'i.”

²⁶ Orra sede dakaye ka kide, “Ka kuli asseeyye, ayno dina ettansha?”

²⁷ Yesuusi xoori ikide, “Wa nama ettansammi in kinnini Waaqa'e i'ettansammi.”

²⁸ Peetiroosi ka ishi kide, “Tin ino wa an qapna piisan alle diinne ka ke kamma deene, xanno attaaw?”

²⁹ Yesuusi ka ishootta kide, “Dukaatannen ishina kiini, nama mankisteeta Waaqa malla kide ka tikaadi taakki, iskatteetaadi taakki, helaasso taakki, toolaaysho a isha xaaye taakki, hellaadi diinno,

³⁰ amma piisse qaraayye harka lekayta akkada; ka piita itturopa deenittooyye caatta parapara akkada.”

Yesuusi qoota tootaaditi ka a xaanaaditi desa a sessattati' haasawade

³¹ Yesuusi tamaarewwasene xaadi kudanka lakki xawwi desa hale ka ishootta kide, “Tin Yursaalami opan anna; qoota inna namati desa wa xuumampaya taafene piisa ka dikkadan.

³² Isha, harka orra a Yihutaata in koddinini oppopa tuukkama ikka isha qara seesan ka oppa otan ka qara tufadan.

³³ Ka oto isha karafan kammaayye, isha ishshanema xoori kuyyaata sessattati tootoppaayye i'aa.”

³⁴ Tamaarewwaadi xoori sepiisa oppaayye we takkan nefo ishootta in kalle; umma maana kapa akka asse kide qoota ishootta tura juutamte malla maana akka haasawade in upnaanne.

Yesuusi akkima katama Iyyaarko kara joolta dinshe

³⁵ Yesuusi ete katama Iyyaarko kapa dehaadeeyye, nama takka joole pora kapa kute'e ka eyye qinsanni.

³⁶ Ete nessa orra lekayta a isha kapan tarpino dakayeeyye, ikaassade ka kide, “Ata sene maana?”

³⁷ Orra ka ishi' lele ka kide, “Ha Yesuusise Anaasirati'i, areppa desa tarpini.”

³⁸ Sitiiyyi namase joole ka ullupe ka kide, “Yesuusi inna a Taawwiti, atara ana maare!”

³⁹ Orra fuula tura qate ka turandesa anno ka isha fukke ka isha kide “Jaw kide!” Isha xoori a qaran qapto'e nessaadi kuttishe ka ullupni ka kiini, “Yesuusi inna a Taawwiti, atara ana maare!”

⁴⁰ Semmalla Yesuusi iqa'ade ka ajaje ka kide “An kapopan xooya; namase joole ete isha kapopan de'eneyye, Yesuusi ka isha kaassade ka kide,

⁴¹ “Akkan maana ke kodo' faani?” Namase joole ka kide, “Poqallaay, paata akkaan faani.”

⁴² Yesuusi ka ishi kide “Akke, amanteetaayti ke dinsheey.”

⁴³ Namase joole ka eennew paata akkeeta ettanshe. Ka Waaqa kalataysattan Yesuusi kamma annta paayye. Samaytase piisa ete sede akkeeyye Waaqa kalataysade.