Luqaasi 17 - Mataafa Qulqulloota

Juppootoppopa nama kateeta tooytatta

¹ Yesuusi itamaarewwaadi kide, “Wa orra kehaytisha ka juppootoppopa kata deenaasso in hasan. ma xoori, nama a minan kehaysadan ka juppootoppopa pi'an, oo isha kido!

² Nama, a sene shashakka oppaayye takka kehaytisho kapaayye, kadi yomatta kuttayta xolmaappa ishi hiddan ka pakateeta karopa alle katane ishi wayyi.

³ Semmalla mattaayshina isi tooytaada innaassin oto ke ishin dapaneenyye, isha fuke; oton i'ishin dapaytaadi oppa issi maraarfadeeyye, ishi diishe.

⁴ Kadi kuyyaatoppa tappaan ishin ke dapaayye ka tappaan ke kapopa deena ka ke kiina, ‘Ishin dapaytiyyo oppa in maraarfadeeyye’ ishi diishe!”

Qoota amanteetati desa

⁵ Erkamampayasene a Yesuusi ka Poqalla Yesuusi kidene, “Poqallaay, amanteeta ino padaawe”

⁶ Poqalla Yesuusi ka ishootta kide, “Kadi amanteeta uqqinteeta leya mina kitto qaptaneeyye ka leyoositi kiinittane, ‘Areppaayye putame ka pakateetoppa dishameeyye’ i'ishina ajajama.”

Koda orxayta qara fadammo

⁷ Kamma desaaw Yesuusi ikide, “Ishin oppaayye nama takka kadi, orxayta a dula ishi qonno, taaki kaharra ishi sikinno qapaayye, orxaytose oto koda kela kalooyye, hela i'ennow ishi kiini, ‘xooye ka damta kute'e?’

⁸ Sekkapaayye ishi kiini in coo, ‘Eetotiyyo ana kode, ka harmisado ka hakan dammo ka ikkino kara'e, ana paata deddehayshe xaayti kuli damtaay?’

⁹ Ka kuliyya, orxaytose qoota wa ajajme kode malla a poqallaadi isha kalataysado ishina pahata?

¹⁰ Ishina nefoow, oto wa ajajamtene kootaneeyye kida, ‘Ino orxaya a we nakanni in kinnini kodinno a ino kidameewwen koone,’”

Yesuusi akka qoosholaya kudani dinshe

¹¹ Yesuusi ete katama Yursaalami opa annooyye, arrta piita Samaariya isho a Kelila karanne tarpini;

¹² ete paleeta takka karopa kulleeyye, qoosholaya kudani isha kapopa de'e ka laka desa qa'ade.

¹³ Ka nessaaysho kuttishe ka ullupe ka kidene, “Yesuusi; kollissampayto; atara ino maare!”

¹⁴ Yesuusi ka ishoottopa tooyyade ka ishootta kide, “Aana ka dakintaayshin qeesewwa akkisha” Ishootta ka ete annaaneeyyew, poroppa dinen.

¹⁵ Ishootta oppaayye takka akka qooshaadi kela dine akke ka nessaadi kuttishe ka Waaqa kalataysattan qinda Yesuusi opa tiitaawe.

¹⁶ Ka Yesuusi kalataysattanne loqqaadi kela pi'e. Isha nefo nama piita Samaariya.

¹⁷ Yesuusi ka kide, “A qoosha kela dine nama kudaninne? Ka kuli sakali ayysha caan?

¹⁸ A Waaqa kalataysatta tiitaawe, namoose a hapta mali hela takka nefo in co?”

¹⁹ Ka sekkammaayye namooseti kide, “xa'e ka kale amanteetaayti ke dinsheey.”

Deena mankisteeta Waaqa

²⁰ Feresata ka Yesuusi kaassatte ka kiite, “Ata mankisteeta Waaqa aytami deeta?” Isha ka ishootta oorshe ka kide, “Ha mankisteeta Waaqa isheetta asattaan deeni in kitto,

²¹ Umma opa isheeta kiinincaane; ‘Tin are kitta, taaki disi kitta!’ Tin mankisteeta Waaqa otantaayshin oppa kitta.”

²² Kamma desaaw Yesuusi itamaarewwaadi kide, “Kuyyaata oppaayye kuyyawwa inna a nama oppaayye, takka akkeeta yaatattane de'a. Ma xoori a akkitan.

²³ Orra i'ishina kida, ‘Tin Kiristoosi are ca, taaki disi ca,’ Ma ishina, in aanan ka ishootta kamma pora in hiran.

²⁴ Hankaada oto moonta quda hankaadooyye, akka qinda takkaayye desa qinda pilaati akkaanno mina'e, deena inna a nama asseew koddan;

²⁵ ma xoori inna a nama, se turanne, rakkoota, kuttayteeta teyyatta ka xeltoosetin needdatama isha parpaaccisni.

²⁶ “Akkimose a xelta Nooheeyye koddite mina'e, awta inna a nama deenaaneeyye, asseew koddita.

²⁷ Haka kuyyaatase a oppaayye Noohe markapa karopa kale kaynitto kara'e, orra idammi ka ikkini ka oli hemini ka ollopa hemammi. Pisha pateeta ka de'en ka piita qara we piisa pashshen.

²⁸ Akkimoose minae'ew, akkima xelta Lootee koddite mina'e koddita. Sitiiyyi orra mina desa dammi ka ikkini ka olqara paata herini ka olli kanni ka dullaaw aylanni, ka tikkaaw qupanni.

²⁹ Ma xoori, kuyyaata a oppaayye Looti katamoosen a Sotoomi kara sookeeyye, apitta isho daka apitta'e moonte xata roope ka ishootta piisa pashshe.

³⁰ Kuyyaata inna a nama deenaaneeyye, asseew koddita.

³¹ “Sitiiyyi, nama paftaayye tula qara co, mehadda paftose kela ca teyyatta in lekkannin, nama dullaappa coow, tikopa in tiitaawnin

³² Iskatteeta Looti matte oorsada.

³³ Nama a issin paha heeno piisa, isi patinni. Nama toota isi daanno xoori, issinni pahani.

³⁴ Anti in ishina kiini: halkeessetiiyyi nama lakki loosha takkan qara'e muka; takka kapaayye iqeedama, takka ka eyye hasa.

³⁵ Iskatta lakkiiw pora takkaayye ollin yooqayooqa; takka kapaayye qeedamta, takka ka eyye hasta

³⁶ [Nama lakki dula takkoppopa ollin sookada, takka kapaayye iqeedama, takka ka eyye hasa.”]

³⁷ Tamaarewwaadi ka isha kaassaden ka kidene, “Poqallaay, orrose ayshopa asse qeedama?” Isha ka ishootta oorshe ka kide, “Allitta, pora oppaayye pukka co qaropa ollopa tiitaawni.”