Luqaasi 16 - Mataafa Qulqulloota

Ilattaytase a mukissampayta

¹ Kamma desaaw Yesuusi itamaarewwaadi kide, “teyantoolayta takka, mukissampayyta a tikaadi ishi mukinno qapa. Orra ka mukissampaytase xaadi isha qara xasase ka kide, ‘Ha namoose teyantaayti alle ke tura nyapalinni’

² Teyantoolaytase ka mukissampaytase xaadi hale ka ishi kide, ‘Ata qootaayti desa maanan dakayni? Arepa desa mukissampaytiyyo koddeeta a ettanissooy, kaajaayyo a mukissampayta koddeetaytin a ishin koda koonitta ana dike’

³ Mukissampaytase ka iskaranxata dikade ka kide, ‘Amma oori poqallaayyo kodiyyo qaraayye alle ana daanaay, an maana kodo ana wayyi? Piita qota'e, hupna an qapo; umma an ettansho; Oton poran paata qinsanniiyyiiw, in jeera;

⁴ lakko assen kodaay; in qeeda ka oton daanamo kammaayye, moottada ana teyyada iskela harmisada.’

⁵ “Ka oori orra a qaraayye kuura a poqallaadi co piisa takka takka hale ka a paayyota kaassade ka kide, ‘Kuura poqallaayyo meeqa ke qara ca?’

⁶ Namase ka ishi oorshe ka kide, ‘Sayteeta okkota dippa ana qaraayye kuura ca’ Ikka namooseti kide, ‘Tin are, firmaayti, jarjartan xata kute'e ka “Sayteeta okkota kunda keniw;” kide ka taafe.’

⁷ “Ka a lammatta haleew ka ishi kideewwe, ‘Kuura a poqallaayyo meeqa ke qaraa ca?’ namase ka ishi oorshe ka kide, ‘Kappa akala dippa ana qaraayye kuura ca’ Ikka ishi kide, ‘Tin are, firmaayti, “Akala kunda sette” kide ka taafe’

⁸ Poqallaadi ka mukissampaytase amanteeta in qapnin ilattayta koddeetaadi peepe. Sede nefo orra Waaqa kapaayye orra piita akkima kallaataaysho a piitatin ilattaya koddene akkinni.”

⁹ Semmalla in ishina kiini, “Kaaja a qaptaneetin moottada kodada, oton i'asse kooteneeyye, oto kaaja piisiti piramaneeyye, tikkasene a parapara karopa teyyatamtan.

¹⁰ Nama wa shakkaatin amanammo, wa kuttatin kuli amanammi; nama wa shakkaatin amanammin kinnin, asseew wa kuttaatin amanammin kinnin.

¹¹ Ka kuli oto teyaanta piisseti mukissaan a amanammi a kinniniiyi, teyanta dukaata desa ayno ishin amana ka ishina daasha?

¹² Oto teyanta nama pila qara a amanammi a kinniniiyi, ayno teyantaayshin ishina daasha?

¹³ “Nama takka, eta takkan oppa'e poqalladda lakki kela orxuma ettaninni in co. Se kapaayye poqalla takkane jaalanni ka takkan needdini ka takkan ulfeessini ka takkan puyanni. Akkimose mina'ew ishina nefo Waaqa isho kaaja kela orxumeeta a ettanissan.”

¹⁴ Feresaata, qoota kaaja jaalannito malla, waasene a Yesuusi haasawade piisa dakayte ka isha qara seeste.

¹⁵ Isha xoori i'ishootta kide, “Ishina mattaayshina'e, fuula orra tura'e hanqeellaya isipahanannittan, Waaqa xoori karittaayshin i'upa. Wa fuula nama turaayye ulfeena qapa paha ka akkaanna, fuula Waaqa turaayye, wa jippame.”

Qoota seera isho a hemittati desa

¹⁶ Yesuusi haasaadi kammaaw caade ka kide, “Mataffa seera isho a xuumampaya haka xelta Yohannisise pishaan orra jaqno kaynitto kara'ew torraamen. Arepa desa xoori, qaaletase a otootase a fayya a mankisteeta Waaqa'e torraammi; nama piisa ka mankisteese oppopa kalta kokkonsanni.

¹⁷ a kodditoma, a seeroppaayye uqqinteeta takka patto kapaayye, a piita isho moonta tarpane nukkulli.

¹⁸ “Nama iskatteetaadi alle diinno ka a pila hemino piisa dahalmayta koddini; nama iskatteetase a diirtaadi alle diishe hemino piisa dahalmayta koddiniiw.”

Teyantoolaytase a nama isho Alasaari teekolaytase

¹⁹ Kamma desaaw Yesuusi ikide, “teyantoolayta takka mehadda pa'aara kalsanno ka kuyyaata piisa naalan kallaanno ca.

²⁰ Teekolayta takka Alasaari kidammo, a dakintaadi piisa faykaan immakaatte ka xarraadippa mukni.

²¹ Ka toma teyantoolaytaseti kelaayye, pusaasa sehena dameta xajeelli. Kutta kuli ka deeni ka fayka qara ishi hayni.

²² “Sekkammayye teekolaytose ka to'e; erkampattowwa ka Aprihaami kapopa ishan aanen. teyantoolaytase ka to'ew ka hawlame.

²³ Ka ete si'oli kara rakkootoppa cooyye, moontandela tooyyade ka, pora seka'e Aprihaami sho Alasaari a isha kapa co akke.

²⁴ Ka nessaadi kuttishe ka kide, ‘Aappo Aprihaami! Atara ana suraysado! Hapulpuloose a apittose oppa'en akata miiddammiiy, akka qupittaadi pishaappan qappado ka arrapa qara ana puulaysho'e Alasaari ana erke.’

²⁵ “Aprihaami xoori i'ishi kide, ‘Innaayyo, atti a piita qara kittooyye, akkima wa pa'aara akkatte ka xasootte, matte oorsado. Alaasaari xoori rakkootoppa caade; semmalla amma isha areeyye xasoonni, atti ka rakkanni.

²⁶ Se maliiyyiw, ino isho ishin otantinno oppaayye takeela kuttayta ca. Semmalla qindinno desa qindaayshin opa nama takka nefo tuulla in ettansho; umma qindaayshinaayye desa qindinnopa nama tuulla in ettansho.’

²⁷ “Teyantoolaytose ka kideewwe, ‘Asseeyye, aappo akka Alasaari tika aappinno opa erkiton ke naappanni.

²⁸ Hellaanno nama keni eyye caay, ishootta akka porose a rakkoota oppopa in deenini'i ikka aano ka tura desaaw ishootta lelo.’

²⁹ “Aprihaami ka ishi kide, ‘Ishootta mataafa Muuse isho a xuumampaya'e iskapa qapaneey, a ishootta dakayen’

³⁰ teyantoolaytase ka kideewwe, ‘Aappo Aprihaami, katii nama takka tootoppa kala ka ishootta lelaayye, juppootaaysho oppa i'ooran.’

³¹ “Aprihaami ka ishi kideewwe, ‘Oto wa mataaffa Muuse isho a xuumampaya kiinaane dakayni in kinniniiyi, kadi punu nama takka tootoppa kala ka ishootta lellaayye, in dakayan.’”