Luqaasi 15 - Mataafa Qulqulloota

Pahana a laahase pate ka kuli teyadeeti

¹ Orra qarata qaratno isho juppoolaya piisa ka kollissa Yesuusi dakkaysatta, isha kapopa ollopa de'en.

² Feresaata isho kollissampaya a seera ka sede akken ka qoota Yesuusi desa qoojqoojin ka kiini, “Isha juppoolaya teyyanni ka ishootta olliiyyi damta dammi”

³ Yesuusi ka pahanoosen ishootta haasawade ka kide,

⁴ “Ishin oppaayye nama kaharra dippa qapo, kaharroseni oppa takka ka pattooyye, a kaharrasene ata hase kunda sakali sakal kappina oppa in diinnin ka haka takkase pate akkino kara'en in faanini ayno?

⁵ oto akkooyye i'asooda ka xashshittan haada, ka ishin kala.

⁶ ka oto tika kayooyye, moottadaadi isho kantiyyaadi ollopa halaa ka ishootta kida, ‘laahase xayyo pate in akke ka xasoodeey ishina kuli xasooda’

⁷ Semmalla in ishina' kiini, hanqeellaya kunda sakali' sakal a juppootoppa tiitawa ishootta parpaaccisni in kinnini kapaayye, juppolayta takka a juppootaadi oppa tiitaawno minanne moonteeyye asseew xasa koddini.”

Dakarase a pirreeta pate ka kuli teyade

⁸ Kammadesaaw Yesuusi ikide “Iskatteeta a dakara pirreeta kudan qapto, kati oppaayye takka pattaayye, ipsa opaysanni in kitto ka tikaadi kela sahannin kitto ka haka dakaroose a pirreeta teynitto kara'e qanqannissa faani in kitto?

⁹ Oto teytooyye moottadaadi isho kanttiyyaadi ollopa haleeta ka ishootta kiita, ‘Dakarase xayyo a pirreeta pate in teye ka xasoodeey ana olliiyyi xasooda!’

¹⁰ In ishina kiini, juppoolayta takka a juppootaadi oppa tiitaawno minanne moonte erkampattowwa a Waaqa asseew xasoonni.”

Innasene pate ka kuli teyade

¹¹ Kamma desaaw Yesuusi ikide, “Aappa takka hellaa lakki qapa.

¹² Kussitta ka aappaayshoti kide, ‘Aappo, teyantaayti quda ana qootte ka qeraytiyyo ana daashe’ Aappaase xaaysho ka teyantase xaadi hellaadi lakki oppa qoote.

¹³ Kuyyawwa lamaya kammaayye, kussittase ka kaajaadi piisa ollopa oorsade ka piita seka opa aane ka piisseti'i, kaajasene xaadin kahade ka piisa pire.

¹⁴ “Ete kaajasene xaadi piisa pire kammaayye, piisse oppa loota kokkoka ka deete. Ikka rakkoota qara pi'e.

¹⁵ Ka semmalla orra piitoseti oppa takka kelopa oore. Ikka sikmayta tuuyyowwaati isha kode.

¹⁶ Isha ka ukkashshase a tuuyyowwasene dammaane mattaadi dameeta xajeelli; umma nama sede nefo ishi daasho in co.

¹⁷ Sitiiyyi oori innasene ishin dapayytaade upnaade ka issi kide, ‘Orxaya aappinno kela kira koona a damta duttanna ikka ishootta kela hasnitta meeqa! Anti ka are do'an tooni.

¹⁸ In xa ka aappinno kapopa aana ka aappinno kida: aappo fuula Waaqa ka fuulaayti ture'en ishin dape.

¹⁹ Umma arepa desa innaatti kidama ana parpaaccisni in kittooy; orrose ke kela kira koono oppaayye a nama takka kapa ana dike’

²⁰ Ka semmalla xa'e ka aappaaysho kapopa aane. Aappaaysho ka laka desa isha akke ka isha suraysade ka turopa keere ka isiqudopa qapade ka isha dinke.

²¹ Innasene ka aappaayshoti kidene, ‘aappo, fuula Waaqa isho fuulaayti tura'en ishin dape, umma arepa desa innaatti kidama ana parpaaccisni in kitto’

²² Aappaaysho xoori orxayaadi hale ka ishootta kide, ‘Jarjara ka mehadda akata paxaara qeeda ka isha quda kalsha ka qupittaadi quda jifeeta ka loqqa kela xopa kuli ishi kalsha.

²³ Ka meerta qeeda ka qalla ka damma ka xasoonna.

²⁴ innoosen xayyo paayyota ito'en ka amma caadeneey; ipaten ka amma akkaadeneey’ Ka oori xasootta paayyen.

²⁵ “Sitiiyyi qaarta dulopa sookade ka ete kallooyye ka tika kapa foolsadeeyye, nessa Kehayta a dawammo ka a kirpa dakaye.

²⁶ “Ka orxayaappaayye takka hale ka kaassade ka kide, ‘Ata wossen maana?’

²⁷ Orxaytase ka ishi kide, ‘Qoota innassin kalen; aappaayshin ka nakaytan isha akke malla meerta ishi qale.’

²⁸ “Qaartase xaaysho ka harmo miirode ka kide, ‘Tika karopa an kullo’ Aappase xaaysho ka xarroppopa sooke ka akka kullo isha naappade.

²⁹ Innasene xoori i'appaayshoti kide, ‘Tin parroosen piisan ke kela yaale, umma apariiyyi ajajaayti antiinne. Ma xoori akkan moottadaayyo olli ishin xasoodo'e nyalqitta qolpayta nefo ana'e a daanne.

³⁰ Innasene xaayti xoori, ete almaleeta iskatta kela teyantaayti pire, ka kaleeyye, meerta ishi qalte’

³¹ Aappaaysho ka ishi kide, ‘Innaayyo, atti awta piisa ana olli kitta; wa an qapa piisa kan xaaytiiw.

³² Innoosen xaayshin xoori, ito'en ka amma caaden; ka paten ka amma teyadeneey, xasootta ino faani.’”