Luqaasi 14 - Mataafa Qulqulloota

Yesuusi sampata orra yihutaatiiyyi nama pila dinshew

¹ Kuyyaata takka a sampatatiiyyi, Yesuusi, saarra Feresata oppaayye tika saara takka opa piifa kulle. Feresaata ka wa isha koda tooya kapa asatte.

² Sitiiyyi, nama takka a paaqa minan dakintaadi tupa qappaajte ka fuula Yesuusi tura ca.

³ Yesuusi ka kollissampayasene a seera isho Feresaata kaassade ka kide, “Hela sampatan nama dinissa seeroppaayye ifaqqatamem moon faqqatammin kitto?”

⁴ Ishootta xoori we ishi in oorinne ma, asseew jaw kiden Yesuusi ka namase paaqno qeede ka dinshe ka isha kalshe.

⁵ Sekkamma desa Yesuusi ka ishootta kaassade ka kide, “Ishin oppaayye nama sampatan innaadi taakki xormaadi qaawa karopa tura pi'o, ikka eennowwen fayyinnin ayno?”

⁶ Ishootta xoori malseeta takka nefo isha mina oorissa in ettaninne.

Qoota naaluma ka a xaykitta teyyatta

⁷ Yesuusi, akkima orrase damta halaame pora ulfeena qaqattisanno akke ka pahanoosen ishootta lele ka kide,

⁸ “Nama takka oto sankulta sarkeetati ke halooyye, pora ulfeena oppa an kute'an. Takka punu, nama ulfeenan ke qara qapo halaame kodditaay.

⁹ “Namase ishin piisa damta hale ka de'a ka ke kida, ‘Poroose a oppa kutiite oppa xa'e ka namooseti pora diishe. Sitiiyyi oori a kuttaati ijjeerta ka pora shakka opa xata lekkatta ka eyye kutiita.

¹⁰ Semmalla, oto damta halaamtooyye, aane ka pora a shakka oppa kute'e. Sitiiyyi namase damta ke hale ide'a ka ke kida, ‘Mootta! pora ulfeena oppopeela fayyado ka eeyye kute'e’ Sitiiyyi oori fuula orrase damta halaame piisa tura'e ulfeena akkattaay.

¹¹ “Nama mattaadi opeela kuttinno, ijeera; a mattaadi xata shakkinno ka ulfeessama”

¹² Yesuusi namase damta orra hale'e kideewwe, “Oto piifa, taaki eetota orra haleenittooyye, ‘A kuli kapa ke hala ka ke damsha’ Moottadaatti ka hellaassin, daltayaatti isho kantiyyaatti a teyantoode in halan.

¹³ Ma xoori oto damta harmisso ka orra haleenittooyye, teekolaya ka toobaya ka totoonnaya isho orra ilda in qapnin hale.

¹⁴ “Oto asse kootooyye, ishootta qoota kapa ke we kodeeta in ettaninnin malla, a eepisame koddita, awta qulqullowwa tootoppa xaanaaneeyye Waaqa ka kapa ke oorsha.”

Pahana sankuultase kuttati

¹⁵ Orrase damta kute'e oppaayye, takka ka, wa Yesuusi haasawade dakaye ka kide, “Nama mankisteeta Waaqatiiyyi damta kuti'itta ettansho oo atta oloode!”

¹⁶ Yesuusi xoori i'ishi kide, “Nama takka eetota kuttayteeta harmishe ka orra lekayta hale.

¹⁷ Ete etasene adamta kayteeyye, akka aano ka orraseti kido ‘Tin we piisa harmisameey, dammtaseti xooya'e’ Aappaase damta harrmishe orxaytaadi erke.

¹⁸ Ma xoori orrase halaame damtase oppa hasa'e matta mattan wa minan hasnaane dehassa paayyen. Takka ikidee, ‘Anti piitan piddadeey anta ka tooyya ka ana faaniy, semmalla deena an ettanshooy, ana diissata kode’

¹⁹ Takka ka kideewwe, ‘Anti xormada qota kinteeta kenin piddadeey, semmalla anta ka ishootta leenjisa ana faaniy, an deena an ettanshooy, ana diissata kode’

²⁰ Takka ka kideewwe, ‘Iskatteetan heme ka haantoppa caay, deena an ettansho.’

²¹ “Orxaytase ka tikopa kale ka se piisa poqallaadi' torre. Aappase a tika ka miirode ka orxaytase xaadi kide, ‘Katamaappa porra pappallda isho a kikilla'a oppopa jarjartan aane ka teekolaya ka toobaya ka totoonnaya isho orra ilda in qapnin hale ka ishin ana xooye.’

²² “Orxaytase ka tiitaaweew ka de'e ka poqallaadi kide, ‘Poqallaay, tin wa ana ajajte piisan kode; ma pora ammikki'i caaw.’

²³ “Semalla aappase a tika ka orxaytaadi kideewwe, ‘Tikiyyo akka immakaatto'e porra pappalda ka a kikilla'a a paleewwappopa anna oppopa aaneew ka akka orra pila de'o kodeew.

²⁴ Anti in ishina kiini, orrose halaame oppaayye, nama takka nefo sankulse xayyo harmisamte afaappa in immado.’”

Yesuusi kamma anta minan rakkoota a duupannaan

²⁵ Samayta kuttayta ka Yesuusi olli anni. Isha ka ishoottopa desa tiitaawe ka ishootta kide,

²⁶ “Nama anopa deeno piisa, oton a ana qaran qapto'e aappaaysho ka aayyaasso ka iskatteetaadi ka hellaadi ka hellaasso ka tuparraasso, taaki isi mikka jaalanniyyi, tamaarittiiyyo kodda in ettansho.

²⁷ Nama masqalaadi haadanni in kinnin ka ana kamma deeni in kinnin tamaarittiyyo kodda in ettansho.

²⁸ “Ishin oppaayye nama a tika qupatta heeno, a turan qattini in kinnin ka kaaja a isha qara pirta dikani in kinnin ayno?

²⁹ Oto kirittaaw kela' kato ka qupeeta a ata hasse dikkissa malaalooyye, orra tikase paayyatte ka in dikkannin akkino piisa, isha qara seesa.

³⁰ ka isha qara lelada ka kida, ‘Tin namoose tika qupatta paayye ka dikkisa malaale.’

³¹ “Nuqusa takka a torpampaya kuma kudan qapo, kati nuqusa pila a torpampaya kuma kunda lakki qapo isha torpeeta deenaayye, sede torpampaya kuma kudan qapo akka nuqusoose isha torpa deeno mina oorissa ettansho, ka in ettaninnin turanne kutiini ka oppa oorsanni.

³² Oto in ettaninniniiyyi, a nuqusase isha torpa deeno pora seka cooyyeewwe, mina desa qepayta erkada ka araara kaassada.

³³ Akkimose mina'ew, ishin oppaayye nama wa a qapa piisa ana malla in diinnin, tamaarittiyyo kodda in ettansho.”

Sookittase we nakanni in kinnin

³⁴ Kamma desaaw Yesuusi ikide, “Sookitta ipaxaari ma, kati marmaddaawni in kinniniiyi, maanaanne marmaddaawa?

³⁵ Sookitta asse paho, kuufa nefo in koddo; umma dula in palayshooy, eennow alle katan nama napahata a dakaynitto qapo a dakayo.”