Luqaasi 11 - Mataafa Qulqulloota

Yesuusi akkima qinseeta tamaarewwaadi kollishe

¹ Kuyyaata takkaayye Yesuusi pora takka oppaayye qinsanni, ete qinseetase dikkisheeyye, tamaarewwaadippaayye nama takka ka isha kide, “Poqallaay, akkima Yohaannisi tamaarewwaadi qinseeta kollishe mina'e, atti nefo qinseeta ino kollisheew.”

² Yesuusi ka ishootta kide, “Oto qinsannittaneeyye, kida, ‘[Aappo xanno ke a moonteeyye kalo maxxaayti a qulqullaawo, mankisteetaayti a deeto,

³ kuyyaata kuyyaatan waan damma ino daashe.

⁴ Akkiman orra ino ishin dape diinninno mina'e, atti juppootinno ino diisheew, umma ekkaysuma oppopa ino in kalshan neequmta kela inon pahe diisheey.’”]

⁵ Kamma desaaw Yesuusi itamaarewwaadi kide, “Ishin oppaayye nama takka kati mootta qapaayye, moottase xaadi ka halkeetta kuttatiiyyi tikaadipa deaayye ka ishi kida ‘Mootta! laaqqota sessa pirta' ana daashe.

⁶ Ha mootta takka xayyo, pora sekaayye ana qara' de'e, anka waan ishi daasha dapeey.’

⁷ Hela moottase xaadi, itikaadi kela xata ishi kida, ‘Innayti, anan payyahashan anti xarra in dufadeey, hellaayyo nefo ana olliiyyi loshsha qara mukeneey, semmalla xaana ka laaqqose a'faanitto ke daassatta an ettansho?’

⁸ Anti in'ishina kiini, kadi punu qoota moottumaadi kodde malla xaana ka ishi daassata in henniniiyyi, qoota isha payyahashe malla, ixa'a ka wa faana piisa ishi daasha.

⁹ “Semalla anti nefo asseewwen ishina kiini: qinsada i'ishina daasamtaay; fada i'akkattaneey; xarroppa kookoosha i'ishin tura panamaay.

¹⁰ “Aqinsanno piisa teyni; a faano piisa ka akkanni; a xarroppa kooko'inno piisa turaayye, ikka panammiiy.

¹¹ Ishin oppaayye ayyno aappa kodde innaadi ka isha qaraayye [laaqqota qinsanni ikka ishi daka daanni?] Hela oto murkuja qinsannaaneeyye, imaaka ishi daanni?

¹² Moon oto hukuukka qinsannooyye, kitatta ishi daanni?

¹³ Oto ishina a ukkuttowwa kodde kuli hellaassina wa paxaara daassata uptaneeyye, Aappaase xaayshin moonte kalo desa, atta qarannen jaalinnin ka orra isha qinsanno Hapura Qulqulloota in daannin?”

Yesuusi isho pe'elsapuuli

¹⁴ Kuyyaata takkayye Yesuusi, orritta a haasa dawrino nama takka kara sookinni. Ete orittase kara sookeeyye, namase haasa malaale ka haasawatta paayye. Seden samayta ka a kuttati oppa qawwaawe.

¹⁵ Orra demo xoori ikide, “Ha pe'elsapuuli saarase a orrittatinni orriyya sookinni.”

¹⁶ Orra demoow isha ekkaysatta fadeew ka akka moontexata milikkita takka ishootta akkisho isha kaassade.

¹⁷ Yesuusi xoori, dikattaaysho'e upnaade ka ishootta kide, “Mankisteeta takka oton issippa qootta ka xawwa xawwa oortaayye, mankisteese ipatta. Akkimose mina'ew, toola takka oton issippa qootaayye, ipasa.

¹⁸ Semmalla seetana oto issippa qoonnooyye mankisteetaadi atta kokkonnaatta ka kallaatta ettanissa? Ishina xoori i'ana kiinittane, ‘Isha pe'elsapuulinni orriyya sookinni’

¹⁹ Ka kuli, oton anti pe'elsapuulin orriyya sookinnooyye, hellaassin aynonne orriyya sookinniiw? Semmalla hellaassin a mattaayshina kuli ishin qara' farata.

²⁰ Semmalla oton anti hupna Waaqan orriyya sookinnooyye, mankisteeta Waaqa akkima ishin kapopa deete, upnaada.

²¹ “Hupnoolayta takka a nama, oto meeha oranna hidado ka tikaadi tooytannooyye, wa kodatteetaadi qappanna in caan.

²² Ma xoori, oto hupnolayta a isha qara qapo a pila de'o, ka isha putooyye, meehase xaadi a oranna a kippanno piisa qara qeeda ka teyantaadi piisa sara ka oppa qoota.

²³ “Nama ana quda in koddinin piisa, ana toorri; nama ana olli qapsanni in ikinnin piisa ka alle fiini.”

Hapura neeqa akkima nama karopa oorro

²⁴ “Hapura neeqa oto nama kara sookooyye, pora oppa nessado faddatta'e, piita kokte a oppa pisha in kinnini oppa pora anni ka oto pora oppa nessado dapooyye, issi kiini, ‘Ana tikase xayyo an kara sooke opa tiitaawo’

²⁵ Ka oto tiitawooyye a kara sahamte ka harmisamte akkini.

²⁶ Ka sekkammayye anni ka hapurra neequmta isha qara qapa tappa isi quda qeenni ka tikase a turan isha kara kallaade karopa kalli ka kara kallaani piraampira namooseti ka a paayyota qara neequmta jaalli.”

Eeppisama dukaata

²⁷ A Yesuusi sede haasawannooyye, iskatteeta takka orroppeela nessaadi kuttisse ka kiite, “Aayya ke xaayte ka ke luukisse, i'eeppisamte!”

²⁸ Yesuusi ka ishetta kide, “A qaaleta Waaqa dakayna ka ishin kallaanna, ishootta eepisame.”

Yoonaasi akkima milikkita kodde

²⁹ Ete samayta kuttayta isha kapopa ollopa de'eyye, Yesuusi ikide, “Xeltoose are kitto xelta a neeqa; milikkita akkaaw faani; ma xoori milikkita a Yoonaasi mali milikkita a pila ishi in daasamo.

³⁰ “Xuumampaytase Yoonaasi akkima orra katama Nenewweeti milikkita kodde mina'e, inna a nama akkimoose mina'ew orra xeltoosetiti milikkita koddan.

³¹ Nuqustitteeta a piita tupatta, kuyyaata firteetatiiyyi xeltoose olli xaatta ka ishootta qara faratta. Isheetta ookuma Selemooni dakaya'e pora sekaayye deeteey; ma xoori tin ha a selemooni qara qapo are ca.

³² Akkimoose mina'ew kuyyaata firteetatiiyyi, orra katama Nenewe xeltoose olli xa'a ka ishootta qara' farata; orra Nenewwe ete qaalese a Yoonaasi torrino dakayeeyye juppootaaysho oppa maraarfade ka oppa ooreey ma xoori, tin a Yoonaasi qara qapo areeyye ca.”

Qoota la'ayta dakintati desa

³³ Kamma desa Yesuusi ikide, “Nama ipsa opanno ka pora akkaani in kinnini oppa xaayno, taaki qara toma qupaapno takka nefo in co. Sekkapaayye, oto orra tika kelopa kullinooyye, akka ishootta akkaatto'e pora qara ipsa xaaynaan qaara'e xaayni diisheey.

³⁴ Ipsa a dakintaayti, iltaayti. Oton iltaayti fayya qapaayye, dakintaayti piisa la'aytan immakaani. Oton xoori iltaayti fayya in qapniniiyyi, dakintaayti piisa tukkanni

³⁵ Semmalla, la'aytose xaayti ke quda co, akka in tukkannini tooytaado.

³⁶ Oton dakintaayti piisa la'aytan immakaada, tukkanta shakkayteeta nefo ka ke kapa in kinniniiyi, akkima la'ayta pohopohono ke la'aye, mina'e dakintaayti piisa a la'aynitto koddita.”

Feresaata isho kollissampaya a seera akkima waqasamen

³⁷ A Yesuusi sede haasawannooyye, Feresitta takka piifa isha hale; isha ka tikase a Feresitta opa kulle ka damta kute'e.

³⁸ Yesuusi qoota a harka in jaqannin mali damta kuti'e malla, Feresittase oppe qawwaawe.

³⁹ Semmalla Poqalla Yesuusi ka ishi kide, “Ishina Feresaateeyye, kuppaayyaddaassin isho tomaddaassin laka tulan fayya'e jaqnittan, ishina xoori karan xata sara isho neequmtanne immakaatten.

⁴⁰ Ishina eeppaay, hela Waaqase wa laka tulan ca uume, a karan xata ca in uumme?

⁴¹ Wa kuppaayyaassin ka tomaddaassin kara ca teekolaya daasha; se kamma we piisa ishina qanqannaawaay.

⁴² “Ishina Feresaate, oo ishin kido! Qinda takkan iffayya ka jalataata isho qora shashakka piisa qaraayye, harka kudanippa takka daannittan; qinda pilaatin xoori, firteeta dukaata isho jaalala a Waaqa'e alle diinnittan; oto a taakka koonittaneeyye, allu sede diissata ishin parpaaccisni in kitto.

⁴³ “Ishina Feresaate oo ishin kido! Tikkasene a qinseeta a orra Yihuta kelaayye pora ulfeena oppa kukkutiittaawwe jaalannittan ka mooradda isho urmaladdaappaayyeew akka orra ishina kaareeta oorshoow heentan.

⁴⁴ Qoota hawla a qaraayye milikita in qapnin, a orra an upnin maliiyyi qaran anno pahatan malla, oo ishin kido!”

⁴⁵ Kollissampayasene a seera oppaayye takka ka Yesuusi kide, “Kollissampayyto oto asse kiinittooyye, ino kuli onni.”

⁴⁶ Yesuusi ka kide “Ishina kollissampaya a seera kuli, oo ishin kido! Haadeta kutta'e nama qara qapnittan; ishina xoori qupiyyaassin nefon quda a kayni a kittan.

⁴⁷ Qoota hawlalla xuumampayasene a aappadaassin leyshene quda sirrittan malla, oo ishin kido!

⁴⁸ Qoota hawlalla a xuumampayasene a aappadaassin leysheneti, kawwattan dawsiisnittan malla, ishina ishootta olliiyyiiwwi kodaaysho a neeqa kooten ka maakkiyya kodditen.

⁴⁹ Semmalla ookuma Waaqa ikiini, ‘Xuumampaya isho erkamampayaan ishootta oppopa erka, ikka demo leyshan ka demo kamma daanan’

⁵⁰ Haka piita uumamte paayyatte, diika xuumampaya a tuqame piisa kapa'e xeltoose'e kaassatama.

⁵¹ Dukaatannen ishina kiini, Apeele desa paayyatte haka Sakkaariyaasise tika qulqulloota isho pora kalisootatiiyyi otantoppa ishshameeti'i, diika a tuqame kapa'e xeltoose'e kassatama.

⁵² “Ishina kollissampaya a seerati, oo ishin kido! Furasene a dukaata a xarra upnaatin pannaane'e qapatten, ma xoori ishina karopa a kulline ka orra kulla faano kuli dawrinitan.”

⁵³ Yesuusi ete porose oppa anta xa'eyye, kollissampaya a seera isho Feresaata isha shiisha ka kaassuma lekaya isha' dehassa paayyen.

⁵⁴ Wa malla asse kodene nefo, akka afa talafan isha qapan malla.