Luqaasi 10 - Mataafa Qulqulloota

Akka otoose a fayya kollishane'e Yesuusi tamaarewwaadi kunda tappa lakki erke

¹ Se kammaayye Poqalla, orra pila nama kunda tappa lakki reexadeew ka katamadda isho porra a oppopa isha anta dikade pisa opa akka isha turan desa aanane'e, nama lakki lakki ollin qape ka erke.

² Ka ishootta kide, “Fera ikutti, ferampaya xoori shakkayaawweey, semmalla aappa dula, akka ferooseneti ferampaya padaawo ka erko'e, isha qinsada.

³ Oori aana, tin anti akkima kaharra mina'en yooytoppopa ishin erkini.

⁴ Oto annittaneeyye, we takkan nefo an teyyadan; porsa kaaja koddite, qarateeta koddite, xoopa koddite in teyyadan. Umma poroppa qa'atta ka nakayta kaassattan eta an piran.

⁵ Tika a karopa kullitan piisa'e turan qattisha ka kida, ‘Toolaayti, nakayta a ishina koddo.’

⁶ Oton tikoose karaayye nama a nakayta jaalanno cayye, nakaytaayshin i'ishi kodda. Ataakkiti nakaytaayshin i'ishina oora.

⁷ Kodampayta'e, mushaara iparpaaccisni; semalla tika a karopa kullitan karaayye, wa ishina dehaade dama ka ikka ka eyye' tawa diisheey, tika takka desa tika pila opa in tittiitaawan.

⁸ Oto katama takkan karopa kullinittaneeyye, orra ka ishin teyyadooyye, wa ishina dehaade dama,

⁹ ka paaqolaya katamoosen kara ca dinsha ka samayta torra ka kida, ‘Mankisteeta Waaqa ishin kapopa idehaatte.’

¹⁰ “Ma xoori, oto katama takkan karopa kullinittaneeyye, orra ka ishin teyyanni in kinniniiyyi, mooraasso oppopa sooka ka ishootta kida.

¹¹ ‘Tin kuyyaalayta katamaassina a loqqaanno quda co kulin ishina dawdawaninna. Ma xoori akka mankisteeta Waaqa ishin kapopa dehaatte upnaada.’

¹² Anti in ishina kiini, kuyyaata firteetati katamoosen kapaayye, katama Sotoomiti'i qitaateta shakkatta.”

Katamadda amanteeta tiiteeta minan qootisame

¹³ Kamma'ew Yesuusi ikide, “Oo ke kido Korasini! Oo ke kido Peete sayda! Katin daxxowwosene ishin kara kodame'e, Tiroosi isho Sidoona kara kodame kiiteeyye, orra siti ishootta kara kalo, helani esse xattaaw ohawwa dapteeta uwwisanni heenen ka tarappa kutiini heenen, ka juppootaaysho oppa oorri heenen.

¹⁴ Semmalla kuyyaata firteetati, ishin kapaayye katama a Tiroosi isho a Sidoonaati'i qitaateta shakkatta.

¹⁵ Atti Qifirnahoomi, hela moontandela kuttatta faate? Si'oli karopa lekkatta.”

¹⁶ Yesuusi ka tamaarewwaadi kideewwe, “Nama ishina dakayno ana'e dakayni; nama ishin teyyanni in kinnin ana teyyanni in kinnin; nama ana teyyanni in kinniniiw, a ana erke teyyanni in kinnin.”

Tamaarewwasene kunda tappa lakki akka pora opa erkameneeye kalen

¹⁷ Tamaarewwasene kunda tappa lakki, pora opa erkameneeyye xasan kalen ka Yesuusi kapopa dehaaden ka ishi kidene, “Poqallaay, maxxaaytin orriyya kuli ino ajajame.”

¹⁸ Yesuusi ka ishootta kide, “Ha a seetana, a hankaada mina shuulame ka moonte pi'inon akke.

¹⁹ Tin akka maaka isho kitatta qara diitan ka hupna paarakaala piisa puttane'e, hupna ukkumeeta in ishina daashe, umma wa ishin miidda takkan nefo in caan.

²⁰ Ma xoori, qoota orriyya ishina ajajamen malla in xasoodan ma, qoota maxxaayshin maskapa moonta oppa taafame malla xasooda.”

Yesuusi akka xasoottaadi upnayshe

²¹ Sitiiyyi Yesuusi Hapura Qulqullootatinni xasoode ka kide, “Poqalla a piita isho a moonta Aappo xanno, qoota orra ookuma isho upna qapo tura sede juutte ka a sene in qapniniti upnasse malla, in ke kalataysanni. Aa, Aappo xanno, sede kodeeta heennaati a paxaara.”

²² “We piisa Aappinno kapa ana daasame. Inna, ayno akkima kodde Waaqa Aappa maliiyyi nama upo takka nefo in co. Umma Waaqa Aappa ayno akkima kodde, inna maliiyyi, taaki nama a inna isha la'assa, heenan maliiyyi nama upo takka nefo in co.”

²³ Kamma desa Yesuusi tamaarewwaadipa desa tiitaawe ka ishootta patta kide, “Orra wa ishina akkitene akkino, eeppisame.

²⁴ Dukaatan xuumampaya isho nuqussa lekaya, wa ishina akkinittane akkeeta xajeele, umma in akkine; ka wa ishina dakaynittane dakaya xajeele, umma in dakayne.”

Suraysattampaytase a piita Samaariya

²⁵ Kuyyaata takkaayye kollissampayta takka a seera'e Yesuusi kapopa de'e ka isha ekkaysatta fade. Ka isha kaassade ka kide, “Kollissampayto, caatta parapara akkatta'e maana kodeeta ana faani?”

²⁶ Yesuusi ka ishi kide, “Seeroppa maana taafame? Oto nappapnittooyye, ikka atta ke kalli?”

²⁷ Namase ka ishi kide, “Seera ikiini, ‘Waaqa Poqallaatti, karittaayti piisan ka isi piisan ka hupnaayti piisan ka dikattaayti piisan, jaalado; ka akkima isi jaalannitto mina'e, kantittaayti jaalado.’”

²⁸ Yesuusi ka ishi kide, “Dukaata lelte, atti kuli asseew kode; caatta parapara'e akkattaay.”

²⁹ Kollissampaytase a seera xoori hanqeellayta isi koda fade ka Yesuusi kaassade ka kide, “Hela amma kantittiyyo ayno?”

³⁰ Yesuusi ka ishi orshe ka kide, “Nama takka Yursaalami xata Iyyaarkopa lekkanni. Aporoppa cooyye, xolma tooma ka isha akken ka mehaddaadi a kalsade quda sookshen ka ete oppa qiden kammaayye, nessa patta oppa diishen ka kapa tawen.

³¹ Qeesitta takka xaadi anno ka porose oppa xata anni; ka ete namase qidame ka eyye katame akkeyye, a we takkan nefo isha in koonin maliiyyi, qinda pilaatin maqe ka kapa tawe.

³² Asseew Lewitta takka ka porose oppan anniw. Ka ete namoose akkeyye, a we takkan nefo ishi in koonin maliiyyi, qinda pilaatin maqe ka kapa taweew.

³³ Samaaritta takka 'xoori, ete eyyen tarpinooyye, namase kapopa de'e. Ka ete isha akkeyye isha suraysade.

³⁴ Ka isha kapopa dehaade ka faykaadi qara'e sayteeta isho taadeta wayneeta ishi tuqe ka japaran qara ishi mare; ka harreetaadi qara isha kutiishe ka tika takka a xaykitta opa ishin aane; ka eyye qanqannissa isha ade.

³⁵ Ka parraytaadi tinaareta lakki qeede ka aappa tikase a xaykittati daashe ka kide, ‘Qanqannissa namoose ana ade; ka oton ikaaja a se qaropa ca'e kamma pirteyye, oton oorrooyyen ke oorshaay.’

³⁶ “Kuliyya namoose sessaappaayye, namoose a xolma tooma oppa qiden ikka eyye pi'e, ayno kantittaadi a paxaara kodde ke pahata?”

³⁷ Kollissampaytase a seera ka ishi oorshe ka kide, “namoose isha suraysade ka isha qaarqaare.” Yesuusi ka kide, “Asseeyye atti kuli aane ka asseew kodeew.”

Yesuusi Maariyaami isho Maarta kapopa aane

³⁸ Yesuusi tamaarewwaadi olli anta kammaaw caade ka paleeta takka kaye. Eeyyeeyye iskatteeta takka Maarta kidammitto ka tikaadipa xaykuma isha teyyatte.

³⁹ Enentaaysho nefo Maariyaami kidammi; Maariyaami loqqa Yesuusi kela'e kutiite ka kollissaadi dakkaysanni.

⁴⁰ Maarta xoori, damta harmissaanne a kuttati payyahani ka semmalla Yesuusi kapopa de'ete ka ishi kiite, “Poqallaay, sede a enentinno koda piisa ana qara diisse, anti ka xawwaati payyahano. i'akkiniiy atta jaw kiini? Akka ana qaarqaarto ishi lele”

⁴¹ Poqalla Yesuusi ka ishi oorshe ka kide, “Maarta, maarta, atti we lekaya qaapni ka dikattan kupanni.

⁴² Ma xoori wa fadamma takkaneew, Maariyaami wa fayya'e reexatte; umma nama takka nefo isheetta qara in qeedo.”