Luqaasi 1 - Mataafa Qulqulloota1 Ke a ulfeessame Tewofiloosi; Qoota wa otantinno oppa koddeeti desa xatta turan orra lekayta torroosen taafe. 2 Orra erkanosen ino tarpishe nefo a paayyote paayyatte a wossen ildaan akke ka qaalese torrina. 3 Anti nefoow paayyote paayyatte eten wessen piisa qanqannissa kara qore kammaayye, akkan olkamma oorsho ka torroosen ke taafo'e i'ana paxaarnaatte. 4 Waan malla asse kode nefo, tamaarese a' xatta turan kollatte, akka dukaata koddite, akka fayya upnaatto malla. Deloota Yohaannisise pishaan orra jaqinooti, erkampattootase Kapreeli turanneew lelte 5 Xelta a Herodisi Yihuta qara nuqusumeeyye, kita a qeesewwa a Apiya oppaayye qeesitta takka Sakkaariyaasi kidammo ca. Maxxa iskatteetaadi Elsapeeti kidammi. ishetta nefo sanynyeeta Aroonippa delatte. 6 Ishootta lamatti fuula Waaqa turaayye hanqeellaya ka ajaja ka taanteta Waaqa qaja mali tooytaanni. 7 Elsapeeti qoota xaayni in kinnin malla, inna in qapan; ka aren piisanti keren. 8 Sitiiyyi kita qeesewwa a Sakkaariyaasi kara ca, koda a tika qulqulloota kara kodammo'e taraysho kayte. Ishakka semmalla fuula Waaqa tura kodase a qeesuma kooni. 9 Akkima aata qeesewwa a kollatame mina'e, akka tikase qulqullaawte a Poqalla kela tankarta qayyaysho'e qoyritta ka isha qa'e. 10 Oto tikase a qulqulloota kela tankarta qayyannaaneeyye, samayta piisa laka tula'e qa'anni ka Waaqa qinsanni. 11 Erkampattoota Poqalla ka porase qara tankarta qayyannaaneeyye qinda akkittatin qa'atte ka Sakkaariyaasi akkaatte. 12 Sakkaariyaasi, ete erkampattootase akkeeyye, itammaqe ka harmo fuure. 13 Erkampattootase xoori i'ishi kiite, “Sakkaariyaasi, in fuuran! qinseetaayti Waaqa idakayeey, iskatteetaayti Elsapeeti inna diirta'e ke xaayta; maxxaadi nefo Yohaannisi kiita ka haleeta. 14 Dalootaadi nefon harmo'e xasootta. orra lekayta ka asseew xasooda. 15 Isha fuula Poqalla tura nama kutta kodda; umma taadeta wayneeta ka wa orra maashshanna takkan nefo in ikko. Ka a karitta aayyaassoti kara cooyyeew Hapura Qulqullootatin immakaada. 16 Isha samayta Isira'eeli oppaayye orra lekayta Waaqa poqallasene xaaysho opa tiitaysha 17 Ka akka a xuumampaytase a Eeliyaasi mina'e, hapura isho hupna qapnaada ka dikatta a appada hellaapa tiitaysha ka dikatta orra Waaqa ajajammi in kinniniti ookumase a ishin Waaqa ajajamanepa tiitaysha ka samayta inpasisha ka akka poqalla tura harmisadane koda.” 18 Sakkaariyaasi xoori i'erkampattootaseti kide, “Anti in kereey, iskatteetiiyyo nefo iqimteey, sede akka dukaata koddite maanannen upnaada?” 19 Erkampattootase ka ishi oorisse ka kiite, “Anti an kapre'eli, a fuula Waaqa tura qa'annitto, akkan otoose a fayya ke lelo'e Waaqa ka ana erke. 20 Atti xoori qaalese xayyo, oto etosen kayto dikkatto a amanneey; semmalla haka wossen an ke lele piisa dikkannaan kara'e, immumta umma haasawatta a ettanisso.” 21 Sitiiyyi samayta Sakkaariyaasiw asni, ka qoota tikase a qulqulloota kela jare malla, oppa qawwaawni. 22 Sakkaariyaasi, ete tikase a qulqulloota kela sookeeyye, orrase olli haasawatta in ettaninne. Semmalla samayta, akka tikase a qulqulloota kelaayye kelashaata isha tura akkaade upnaade. Isha ka harkaan ishootta akkissaanne ishootta la'anni ka asse haasa malaaloose quda jare. 23 Ete kuyyawwaadi a koda dikkaden kammaayye, Sakkaariyaasi tikaadipa kale. 24 Eta shakkaya kammaayye, iskatteetaadi Elsapeeti ka inna hitte; ka leya ken tika kara isi juutte. Ka kiite, 25 “Poqalla ete diissataadin ana tooyyadeeyye, wessen pa'aara ka qaja an samaytoppa qapo ana qara mayshe.” Erkampattootase Kapreeli akkima Yesuusi delado turanneew lelte 26 A Elsapeeti inna hitte leya lehattatiiyyi, erkampattootase Kapreeli Waaqa kapaayye katamasene a Naasireti piita Kelila kara ca opa erkamte. 27 Ka enenta takka issin kitto; sanynyeeta taawitippa nama takka Yoosefi kidammo hemitta qapatamti kapopa erkamte. Maxxa enentooseti nefo Maariyaami kidammi. 28 Erkampattootase ka Enentase kapopa deete ka isheetta kiite, “Enenta! ke a daassata Waaqatin immakaatte, Waaqa ke olli caay, nakayta a ke koddo! [Atti iskattoppaayye a eeppisamte.”] 29 Isheetta ka haasasene a erkampattooseti qara tammaqte ka dikatte ka kiite, “Hela awwe ini nakayta maana?” 30 Erkampattootase ka ishi kiite, “Maariyaami, fuula Waaqa tura ulfeena akkatteey, in fuuran. 31 Tin inna hitta ka inna diirta xaayta ka maxxaadi nefo Yesuusi kiita ka haleeta. 32 Isha a kutta kodda ka inna a Waaqase we piisa qaropa qapo kidama. Waaqa Poqalla ka sufaanase a aappaayshoti a Taawiti ishi daasha. 33 Ikka Isira'eeli qara'e, haka paraparati nuqusuma, umma mankisteetaadi piraampira in qapto.” 34 Maariyaami ka erkampattooseti kiite, “Anti issinnin caay, kuli sede atta asse kodda ettanissa?” 35 Erkampattootase ka ishi oorisse ka kiite, “Hapura Qulqulloota'e ke qara de'a. Hupna Waaqase we piisa qaropa qapo ka ke qara caada. Semmalla inna ke kara dalada qulqullitta; ka inna Waaqa kidaman. 36 Daltayteetase xaayti Elsapeeti; a ‘Maxeena’ Ishi kiinaan quda kallaatte, amma keranta kelaayye inna diirta hitte; tin a hitteeyye ikkan amma leya lehi. 37 Ha wa Waaqan kamma in caan.” 38 Se kammaayye Maariyaami ka erkampattooseti kiite, “Anti an orxayteeta Poqalla'ey, wa kiite, a ana kodden.” Erkampattoose ka ishetta kapa tawte. Akka Maariyaami Elsapeeti tooyya ante 39 Sitiiyyi Maariyaami ixaate ka katamasene piitase a Yihuta irroowwa qapto kara ca opa jarjartan ante. 40 Ka tika a Sakkaariyaasipa kullite ka Elsapeetin paante. 41 Elsapeeti ete nessase a Maariyaami a paanitta dakayteeyye, innasene a karittoppa qapta'e xasan doddo'e, ikka Hapura Qulqullootatin immakaatte 42 ka nessaadi kuttisse ka kiite, “Atti iskattoppaayye a eeppisamte. Inna ke kara dalade nefo, a eeppisame'ew. 43 Sede a aayya opa Poqallaayyo ana tooyya dete, xayyo ana'e, ulfeena atta kutta! 44 Dakaya an nessaayyti a paanitta dakayene, innasene an karittoppa qapa xasoottaan doddo'en. 45 Atti Waaqa wa haasawade akkima kodo qoota amante malla, oo atta eeppisamte.” Qinseeta Maariyaami a kalata 46 Maariyaami ka kiite, “Ati Poqallaan kalataysanni, 47 hapuriyyo ka Waaqiyyo qoraccase xayyon xasoonni. 48 Waaqa, ana orxayteetase xaadi xata shakkatte tooyyadeey, awwe desa paayyatte xelta piisa ana kida ke a eeppisamte. 49 Hupnampaytase a Waaqa'e wa kukutta ana kodeey. maxxaadi nefo qulqullitta. 50 Waaqa orra isha fuurro piisa'e, xelte desa xeltopa diissataadi tuullinni. 51 Harkaadi a kokkokanne hupnaadi akkishe, ka a dikattaayshotin ispeepampaya kodde pasishe. 52 Ka mukissampaya kukutta alkaasso qara lekkishe, ka kapandela a xata shashaka moontopeela kuttishe. 53 ka isasene doxe wa paxaaratin duttanshe, ka teyantoolaya harka luleetin daane. 54-55 Waaqa diissatase a Aprihaami isho sanynyeetaadi haka paraparati akkishe matte oorsade; ka orxaytase xaadi Isira'eeli qaarqaare. Sede nefo qaalese a kippeeta a aappadaanno a xattati daashe dikkissa malla asse kode.” 56 Maariyaami, ete Elsapeeti kapa le'a sessa mina co pirte kammaayye, tikaadipa kalte. Yohannisise pishaan orra jaqno akka dalade 57 Elsapeeti kisetaadi a xaaya'e kayte ka, ikka inna diirta xaayte. 58 Kantaadi isho daltaytaadi piisa ka, akka Waaqa diissata kutta ishetta kode dakaye ka isheetta olli xasoode. 59 A innasene deladene kuyyaata settattatiiyyi, taantetase a dawra qara murreeta oppa akkaatta'e, kantaadi isho daltaytaadi ka ollopa de'e ka allu maxxa aappaayshotitin “Sakkaariyaasi” Kida ka maxxa ishi kodeeta faden. 60 Aayyaasso xoori ikiite, “Assen kidamo ma, maxxaadi Yohaannisi.” 61 Ishootta ka ishi kidene “Daltaytaayshin oppaayye nama maxxosetin halaame takka nefo in co.” 62 Ka se kammaayye milikkitan aappaaysho kaassaden ka kidene, “Maxxa innaatti a ayno kidamo faani?” 63 Sakkariyaasi ka wa taafeeta ishootta qara kaassade; ka “Maxxaadi Yohaannisi” Kide ka taafe. Orra piisa ka oppa qawwaawe. 64 Sitiiyyi afaadi ka panamen, ikka haasawatta ettanshe; ka Waaqa kalataysatta paayye. 65 Se minan kantaadi piisa ka fuure. Otoose piisa ka piitase irroowwa qapto a Yihuta pisa oppa dakaate. 66 Orra wessen dakaye piisa ka oli kakaassanni ka kiini, “Ka kuli innoosen atta koddan?” Sede nefo, qoota hupna Waaqa dukaatan innoosen olli co malla. Xuuma a sakkaariyaasi haasawade 67 Aappa oopa innaseniti Sakkaariyaasi, Hapura Qulqullootatinni immakaade ka xuuma haasawade ka kide, 68 “Qoota samaytaadi diissataadin tooyyade ka ishin pahade malla, Waaqa Isira'eeli Poqalla a kalataysamo. 69 Sanynyeetase a orxaytaadi a Taawwiti oppaayye dinshampayta a hupna qapo ino xaasheey. 70 Akka afa xuumampaya qulqullaawe a xattaw ca oppa haasawade mina'e, 71 harka nyaapaayno ka a paarakaaladdaanno piisa kelaayye i inon pahe. 72 Sede nefo, akka aappadaanno diissata kodo; ka kodayteetase xaadi qulqullaawte dikkisho; qoota dikade malla. 73 Kodayteese nefo, aappinno Aprihaami'i xaxaan daashe. 74 Qaalese a kippeeta nefo, akkan nyaapaayno kela pahano ka fuura mali ishi koda koono malla. 75 Ka hakan kinno'e akkan fuula Waaqa tura'e; qulqulluma ka hanqeellumaan kallaatta ettaninno malla. 76 Semmalla atti innaay! xuumampayta a Waaqase we piisa qara qapo'e kidamta, ka poraadi harmissaa'e, qattita ka Poqalla turan desa anta. 77 Poqalla ka juppootaysho ishootta diissatanne upna a ishin dinane samaytaadi daasha. 78 Waaqinno qoota diissampayta ka suraysattampayta kodde malla; la'ayta dina'e moonte ata ino la'ayysha. 79 La'aytose ka orra tukkanta isho kaatta toota kela co piisa la'aya. ka laabbeetinno nefo, qinda pora nakayta opa qajeelsha.” 80 Inna sene ka kuttaden ka hapuran kokkonnaaden ka haka samayta Isira'eeli tura akkaannaan kara'e koommaytoppa kallaaden. |