Kodampaya 9 - Mataafa Qulqulloota

Sawuli akka Kiristoosi amane

¹ Sitiiyyi Sawuli orra Poqalla amanno lessaata'e ikki nyarri ka qeesittase kutta kapopa aane

² ka oto orra asaanta poqalla kamma anno, diira isho iskatta, akkooyye, akka hido ka Yursaalamipan deena ettansho'e, akka taptapeta, tikka qinseeta a orra a Yihuta a Tamaasqo kara caati taafamto ka ishi daasamto'e qeesitta kutta kaassade.

³ Ete anno ka katama Tamaasqo kapa dehaadeeyye, a isi qara in upnin mali, moonte xata la'ayta isha kapan desa la'aye.

⁴ Sitiiyyi ikka piitopa pi'e ka nessa a kiino “Sawuli! Sawuli! maana'e pora ana kamma daanni?” dakaye.

⁵ Sawuli ka kide, “Poqallaay, ata atti a ayno?” Isha ka ishi kide, “Anti an Yesuusise a atti pora daannitto.

⁶ Ammaa xoori xa'e ka katama karopa kale, wa koda ke parpaaccisnitta eyyeeyye ke lelamaneey.”

⁷ Orra Sawuli olli anno qoota nessaaw dakayen ka nama takka nefo in akkinnin malla, wa kidane'e dapen ka di'i kiden ka qa'aden.

⁸ Sawuli ka piite xa'e ka ildaadi olikela paqqishe; Ma we takkan nefo akka in ettaninne. Orra ka isha tupa harka qape ka katama Tamaasqo opan kale.

⁹ Ikka kuyyaata sessa kumma paata akka malaale; umma we takkan nefo in damme ka in ikkine.

¹⁰ Sitiiyyi katama Tamaasqo karaayye nama takka Yesuusi amane Hanaaniya kidammo ca. Poqalla ka kelashaata oppan “Hanaaniya” kide ka isha hale; isha ka ehade ka kide, “poqallaay.”

¹¹ Poqalla ka ishi kide, “Saantase jib kiite” Kidammitton desa aane ka eyyeeyye tika Yihutaaye, nama takka a Terseesi Sawuli kidammo fade, isha amma qinseeta qara ca.

¹² Sawuli ka nefo akka ildaadi paata akka ettanshane'e, a nama takka Hanaaniya kidammo isha kapopa kulle ka a isha qara harkaadi qapanno keleshaatoppan akke.”

¹³ Hanaaniya xoori i'orshe ka kide, “Poqallaay, namoose akkima orra a ke amanno a Yursaalami kara kalo qara nequmta kutta kode, orra lekayta qaraayyen dakaye.

¹⁴ Ka are karaayye akka orra a maxxaayti haleeno piisa hido'e, saarra qeesewwa qara hupna ukkumeeta teyyade.”

¹⁵ Poqalla ka Hanaaniya kide, “Isha akka orra ana amani in kinnin ka nuqussaasso isho samayta Isira'eeli tura maxxiyyo upnaysho'e qoota meehiyyo a reexxame kodde malla isha kapopa aane.

¹⁶ Qootiyyo malla rakkoota kutta a atta kitto akka isha qara kayto ana isha akkishaay.”

¹⁷ Semmalla Hanaaniya ka eyyepa aane ka tikase a isha kara co kelopa kulle ka harkaadi isha qara qapade ka isha kide, “Innaanno sawuli, a arepa deenittooyye Poqalla Yesuusi a poroppa ke tura akkaade, akka lammatta paata akka ettanisso ka Hapura Qulqulloota immakaatto'e ke kapopa ana erke.”

¹⁸ Eennow wa qoffolla paha ka ildaappa ishi seehen. Ikka paata akka ettanshe. ka xa'e, ka jaqqame.

¹⁹ Ka damta dame ka kokkonnaade. Ka orrase Yesuusi amanno katama Tamaasqo kara co kapa'e kuyyawwa lamaya pire.

Sawuli akka Tamaasqo karaayye kollishe

²⁰ Sawuli ka eennow Tamaasqo karaayye tikkasene a qinseeta a orra a Yihuta kara kollissa paayye ka kide, “Yesuusi inna Waaqa.”

²¹ Orra isha dakaye piisa ka oppa qawwaawe ka kiini, “namoose isha a Yursaalami kara orra maxxose haleeno piisa patinnenne? Wa malla arepa de'e nefo, ishootta hideeta ka saarra qeesewwa turopa qeedeeta mallanne?”

²² Sawuli xoori qara'ew kokkonnaattaan aane ka akkima Yesuusi Kiristoosi kodde oli kela la'assaanne Yihutaata a Tamaasqo kara kalto' torre. Ishootta ka wa isha mina kidane dapen.

²³ Kuyyawwa lekaya kammaayye Yihutaata ka Sawuli ikassa sulatte.”

²⁴ Isha xoori isulaataaysho upnaade. Ishootta ka isha ikassa'e halkeetta ka kuyyaata xarrada a isha karan sookna tooytini.

²⁵ Ma xoori halkeetti orra a isha quda kodde isha qeede ka satara kara xaaye ka maskooteta oxinta kawwatta karan lakopa isha lekkishe.

Sawuli akka Yursaalamipa aane

²⁶ Sawuli ete Yursaalamipa aaneeyye, orra a Yesuusi amanno a eyye co quda koddeeta ekkayshe, ishootta xoori a isha Kiristoosi amane qoota dukaata ishootta in pahanaannin malla, piisani isha fuuren.

²⁷ Parnaapaasi ka erkamampaya kapopa Sawulin aane ka akka poroppa Poqalla isha tura akkaade ka isha' haasawsiise isha ka Tamaasqo karaayye maxxa Yesuusin maxanyumaan kollishe ishootta' lele.

²⁸ Semmalla Sawuli ka ishootta quda caade ka ishootta olli Yursaalami kara pora anni ka maxxa Poqallaatin maxanyumaan kollinni.

²⁹ Ka Yihutaata a afa Kirikki haasawannitto olli haasawanni ka ishootta shiishni. Ishootta xoori isha ikassa faden.

³⁰ Hellaasene xaaysho a Kiristaana ete sede upnaadeneeyye, katama Qesaariya opa ishan aanen ka akka eyye desa katama Terseesi opa aano koden.

³¹ Tikase a kiristaana piita Yihuta ka a Kelila isho a Samaariya pisa oppa kitto ka nakayta akkatte ka japaatte ka Poqalla ulfeessaanne ka Hapura Qulqullootatinni xasa oorsattaanne, lekumaan kuttatte.

Wa Peetiroosi katama Liida isho a Iyyoobbe kara kode

³² Peetiroosi ete piitaddaappa annooyye, orra amanno a Liida kara kalo kapopa aane.

³³ Ka eeyyeeye, toonnayta takka Eeniyya kidammo a para sette qoolla qara kalo akke.

³⁴ Ka ishi kide, “Atti Eeniyya! Yesuusi Kiristoosi ike dinshaay, xa'e ka qoolaayyti marrado.” Isha ka eennow xa'e.

³⁵ Orra Liida ka a Saroona kara kalo piisa ka isha akke ka Poqallaapa tiitaawe.

³⁶ Iyyoobbe karaayyew, iskatteeta takka Taabita kidammitto a Waaqa amannitto ca; maxxaadi nefo afa Kirikkitin Torqa kidammi. Se kideese nefo kuumanta kideeta. Isheetta iskatteeta awta piisa koda paxaara koonitto ka hiyyeesadda nefo qaarqaarritto.

³⁷ Sitiiyyi ishetta ka paaqte ka toote. Ikka jaqen ka alleeta tula qara kitto kela' xaayen.

³⁸ Liida qoota Iyyoobbe kapa dehi malla, orra a Yesuusi amanno a Iyyoobbe kara co, ka akka Peetiroosi Liidaayye co dakaye ka nama lakki isha kamma erke ka kide, “Atara a jarrin mali jarjartan ino qaqqaapsado!”

³⁹ Semmalla Peetiroosi ka xa'e ka orrase erkame olli aane. Ete desa kayeeyye, ikka alleetase tula qara kitto karopa ishan aanen. Iskatta a diiraasso qara le'en piisa ka isha kapan desa qaqqaade ka pooyni ka qamisewwa isho ohawwasene a torqa kittooyye koote piisa ishi akkinni.

⁴⁰ Peetiroosi xoori ishootta piisa alle lakopa sookshe ka kilpiippade ka qinsade ka pukkase opa desa tiitaawe ka kide, “Taapita, xa'e!” Isheetta ka ildaadi paqqisse ka peetiroosi akkite ka xaate ka ela kutiite.

⁴¹ Isha ka harkaadi desa derayshe ka isheetta qape ka ishetta xaashe ka iskattase a diirasso qara le'en isho orra a amanno ollopa hale ka isheetta a caatte ishootta daashe.

⁴² Sede ka Iyyoobbe piisa kara upnaysamte. Orra lekayta ka Poqalla amane.

⁴³ Peetiroosi ka a Iyyoobbe kara'e nama takka kollaya tuuqno Simooni kidammo kapa'e, kuyyawwa lekaya pire.