Kodampaya 8 - Mataafa Qulqulloota

Sawuli akka orra amanno kamma daane

¹ Sawuli ishshama Istifaanosi oppa'e sale. Kuyyaata a oppa Istifaanoosi to'eyye tika kiristaana a Yursaalami kara kitto qara'e pora daanama a kutta xa'e. Erkamampaya maliiyyi orra amanno piisa ka piita Yihuta isho a Samaariya opa pase.

² Orra amanteetan japaanno demo ka Istifaanosi hawle; ka a kuttati isha pooye.

³ Sawuuli xoori tika Kiristaana patissa'e xa'e ka tikka kara kullini ka diira isho iskatta a amanno tinni ka sookinni ka tika hida karopa ishootta kalinni.

Otoota fayya akka piita Samaariya kara torraamte

⁴ Orrase amanno pase, pora oppopa aanen pisa oppa'e qaaleta Waaqa kollinni.

⁵ Filippoosi ka katama Samaariya opa aane ka qoota Kiristoosi desa ishootta kollishe.

⁶ Orrase, ete qaaletase a Filippoosi dakaye ka kodaddaasene orra qawwanna a isha koona akkeeyye, takka'e isha kela napahata kate ka wa isha kiina dakkaysade.

⁷ Hapurra nenneeqa ka nessa kuttan ullupni ka orra lekayta kara sookni; totoonnaya isho a hekkella lekaya ka dinni.

⁸ Se minan katamoosen kara xasa kutta ka dakaade.

⁹ Katamoosen kara, nama takka Simooni kidammo ka ca. Ka katamoosen kara suuma sooni ka orra Samaariya qawwanni. Ka kiini, “Anti in kutti kutta.”

¹⁰ A kutta ka a shakka piisa ka ishi kiini, “Ha namoose hupnase a Waaqa kiinaane ikutti.” Ka qanqannissa ishopa dakkaysanni.

¹¹ Wa malla qanqannissa ishopa dakkaysannaane nefo, qoota etaa a sekati paayyatte suuman ishootta qawwanno malla.

¹² Ma xoori ete otootase a fayya a Filippoosi qoota mankisteeta Waaqa isho qoota Yesuusi Kiristoosi desa haasawade dakayeneeyye diira isho iskattanne amanen ka jaqqamen.

¹³ Simooni nefo ka mattaadi amane ka jaqqame ka Filippoosi qudaaw kodde ka kodaddasene kukutta isho daxxowwasene orra qawwanna akke ka oppa qawwaawe.

¹⁴ Erkamampayasene Yursaalami kara ca, akkima orra Samaariya qaaleta Waaqa teyyade ete dakayeneeyye Peetiroosi isho Yohaannisi ishootta erken.

¹⁵ Peetiroosi isho Yohaannisi ka aanen ka akka orra Samaariya Hapura Qulqulloota teyyado'e, ishootta Waaqa qinsaden.

¹⁶ Maana malla orra samaariya maxxa Poqalla Yesuusinni jaqqame diisheey, Hapura Qulqulloota ishootta oppa nama takka nefo qara in lekkanneey.

¹⁷ Ete Peetiroosi isho Yohaannisi ishootta qara harkaasso qapadeneeyye; Hapura Qulqulloota'e teyyaden.

¹⁸ Simooni, ete erkamampayasene harkaasso orra qara qapaden, orra ka Hapura Qulqulloota teyyade ikka akkeeyye, kaajaanne ishootta de'e ka kide,

¹⁹ “Nama an anti qara harkaayyo qapado akka Hapura Qulqulloota teyyado'e, hupnose a ukkumeeta ana daasha.”

²⁰ Peetiroosi xoori i'ishi kide, “Qoota daassata Waaqa kaajan akkatta dikatte malla, ke isho kaajaatti ollin pata!

²¹ Karittaayti qoota fuula Waaqa turaayye, taanteta qara in kinnin malla, atti seppaayye qoottota taaki qoyritta a' qapto.

²² Semmalla neequmtose xaaytippa mararfado ka oppaayye oore ka akka takka punu Waaqa dikattoose a karittaayti neeqa ke diisho'e isha qinsado.

²³ Anti akkima atti yoota a haddaawnitton immakaatte ka juppootan hidamte in akkiniiy.”

²⁴ Simooni ka ishootta kide, “Wessen a amma haasawattene oppa akkima we takkan nefo ana qare in kaynini'i, ishina'ew ana Poqalla qinsada.”

²⁵ Peetiroosi isho Yohaannisi ete maakkumen ka qaaleta Poqalla haasawaden kammaayye, palewwa a samaariya lekaya oppa otootase a fayya torreetanne Yursaalamipa tiitaawen.

Filippoosi aappa takka a Toobbiya jaqqe

²⁶ Erkampattoota Waaqa ka Filippoosi kiite, “xa'e ka porase Yursaalami xata kaasaapa annonne qinda tupatta opa aane. Porose nefo pora koommayta;”

²⁷ Isha ka xa'e ka aane. Tin kunayta takka a toobbiya ka Waaqa sakatatta, Yursaalamipa aane; namoose nefo, nuqusitteeta takka a Toobba Hindaakke kidammitto'e, Mukissampayta atikaadi a kutta ka kaajaadi piisa qaraayye saara.

²⁸ Isha ete piitaadipa kallooyye, sarkeella qara'e kute'e ka mataafa a xuumampaytase a Issayyaasi nappapni.

²⁹ Sitiiyyi Hapura Qulqulloota ka Filippoosi kide, “Aane ka sarakellosen kapopa dehaado ka namoose oli akka.”

³⁰ Filippoosi ka eyyepa keerittan aane ka a Toobbittase mataafa a xuumampaytase a Issayyaasi nappapno dakaye ka ishi kide, “Hela wa a nappapnitta ike kalli?”

³¹ Toobbittase ka kide, “A nama olkela ana la'aysho in kinnaado maliiyyi atta ana kaleeta ettanissa?” Ka Filippoosi kide, “Sarakeella qaropa fayyado ka ana kapa kuti'e.”

³² Isha nefo mataafose a qulqulloota karaayye, pora a nappapno ikiini, “Isha kaharta a qalama qulammitto mina, ka akka haaritta laha otoo quda nyirfa mujnaane jaw kiino mina'e afaadi nefo in paqqinnin mina.

³³ Isha ijeere; umma firteeta dukaata opa ishi in daanne; caattaadi piita qara alle'e pashsheneey, qoota sanynyeetaaditi desa ayno haasawatta ettansha?”

³⁴ Kunaytase ka Filippoosi kide, “Ata xuumampaytose qoota ayno desa sede haasawade, hela qoota mattaadi mallam moon qoota nama pila malla? Atara ana' lele.”

³⁵ Filippoosi ka porose a mataafa qulqulloota qara paayye ka qoota Yesuusi desa otootase a fayya ishi torre.

³⁶ Ete annaaneeyye, ikka pora oppa pisha caan kayen. Kunaytase ka kide, “Tin, pisha areeyye caay, akkan an jaqqammini'i maana ana dawra?”

³⁷ Filippoosi ka ishi kide'e, “Oton karittaayti piisanne amanteeyye, jaqqama i'ettanissa.” Kunaytase ka kide'e, “Yesuusi Kiristoosi akkima inna Waaqa kodde in amanni.”

³⁸ Kunaytase ka akka sarakella qa'adane ajaje. Ka lamatti ollinni pishasene oppopa lekkaden, Filippoosi ka kunaytase jaqqe.

³⁹ Ete pishaappa sookeneeyye, Hapura Poqalla ka Filippoosi qeede; umma kunaytase sekkammaayye isha in akkine; a koddito ma xasanne poraadi qapade ka kalta qaraaw caade.

⁴⁰ Filippoosi xoori, piita a Astoosi kara'e teyade ka haka piita Qesaariya kayno'e katamadda pisa oppopa anni ka otootase a fayya torrini.