Kodampaya 6 - Mataafa Qulqulloota

Akka taaqonewwa tappa reexamen

¹ Eta shakkaya kammaayye, ete orra amanno koopaan annooyye, Yihutaata a afaa Kirikki' hasaawannitto; Yihutaata a piita Yihuta oppa' dalatte qara'e qoojqooja paayyite. Wa malla qoojqoojte nefo, qoota ishootta qaarqaarsa a kuyyaata mina qootammo oppaayye, iskattaaysho a diiraasso qara le'ene a taakkane kapa' tooyni in kinnin malla.

² Erkamampayasene kudanka lakki ka se minan orra amanno piisa olopa halen ka ishootta' kidene, “Damta qoota malla kideeta ka kodase' xanno a qaaleta Waaqa kollissa diissata ino parpaaccisni in kitto.

³ Semmalla hellaanno, orra a qalpeetaaysho a fayya minan kalataysame ka Hapura Qulqulloota isho ookuman immakaade nama tappa issippa reexa; ishoottan kodoose qara' shuummaay;

⁴ Ka ino qinseeta isho qaaleta a Waaqa kollissaan japaannaay.”

⁵ Wessen a kidene ka orra piisa xasayshen, sene are kammopa xata ca ka reexxamen; ishootta' nefo Istifaanoosise amanteeta isho Hapura Qulqullootatin immakaade ka Filippoosi ka Birokoroosi ka Niqaarooni ka Timoona ka Permena isho Ansookkittase Niqolawoosi isase amanteeta Yihutaata teyyade ka reexxamen.

⁶ Ikka erkamampaya tura ishootta qaatishen. Erkamampaya ka ishootta' qinsaden ka harkaasso ishootta qara' qapaden.

⁷ Qaaleta Waaqa qoota asse paldaattaan ante malla, lekuma a orra amanno ka Yursaalami kara akata koopaan aanen. Qeesewwa kuli oppaayye a akata leka ka amanen.

Taaqonittase Istifaanosi akka qapame

⁸ Istifaanosi daassata Waaqa isho hupnanne immakaade ka samaytoppa wa orra qawwanna isho daxxowwa a kukutta' kooni.

⁹ Sitiiyyi tika a qinseeta orra Yihuta a tika qinseeta, “A orra nataan sooknooti” kidammo kara ka Qereenaayye ka orra Iskintiriya oppa ka Kilqiya isho Issiya kara, orra takka takka ka Istifaanosi qara' xa'e ka isha shiisha paayye. “Orra nataan sooke” Kideeta, orra a Yihuta a karpishshuma a orra piita pila kela sooke lelli.

¹⁰ Ma xoori ookuma isho hapura Istifaanosi ishin haasawanno mina' oorissa in ettaninne.

¹¹ Sitiiyyi ikka orra a kido “Ha namoose Muuse isho Waaqa qara'e afaa otitta' haasawanni anka dakayne.” Dekandekatti isha qara' xaashen.

¹² Ka asseew samayta ka qimoota isho kollissampaya a seera isha qara' xaashen ka aanen ka Istifaanosi qapen ka firtishoonkota turopa dehayshen.

¹³ Ka orra isha qara darta maakkumo takka takkan de'en; maakkiyyasene a darta ka kidene “Ha namoose tikoose a qulqulloota isho seera qara'e afaa otitta' haasawatta kamma oori in co.

¹⁴ Ka kiiniwwi, ‘Yesuusise a Naasireti tikoose a qulqulloota'e alle' qitqishsha ka taanteta a Muuse ino' daashe alle' purshe anka dakayne.”

¹⁵ Sitiiyyi orra a firtishoonkotoppa co piisa, ete Istifaanosi quda ilda koden ka tooynaaneeyye, fuulaadi fuula erkampattoota Waaqa'e ishootta' pahanaade.