Kodampaya 5 - Mataafa Qulqulloota

Hanaaniya isho Sabbiira

¹ Nama takka Hanaaniya kidammo iskatteetaadi a Sabbiira kidammitto ollinni piita katen.

² Isha ka a iskatteetaadi uptooyye kaajasene a piitaseti quda paka haattishe ka pakan aane ka erkamampaya' kalshe.

³ Peetiroosi xoori i'ishi' kide, “Atti Hanaaniya, akka' Hapura Qulqulloota' qara' darta kooto'e ka kaaja a piitaayti quda paka hattisatto'e seetanoose asse ke kode, maana'e karittaayti karopa kale?

⁴ A' kannin turan piitoose xaaytinni? A' katte kammaayyeew kaajoosen xaaytiiwwinni? Ka kuli maana malla' karittaayti karan xata asse dikatte? Waaqa diisheey nama tura' darta a'koone.”

⁵ Hanaaniya ete nessoose dakayeeyye, ipi'e ka to'e. Orra sede dakaye piisa ka harmo' fuure.

⁶ Xayyoolayta ka pukkase' xaadi ollopa oorshe ka qeede ka hawle.

⁷ A saateta sessa mina' kitto kammaayye, iskatteeta Hanaaniya ka deete, Umma wa a diirtaadi qara' kodde in upnaanne.

⁸ Peetiroosi ka isheetta' kideewwe, “Intoonno ana' leleey, hela piitase xaayshin kaaja asse caati'iwwi kattene?” Isheetta ka kiite, “Aa, kaaja asse caati'iwwin kanne.”

⁹ Peetiroosi ka isheetta' kide, “Hapura Waaqa ekkaysatta'e, atta olli' kalten? Tin orra a diirtaayti hawle ka kallo xarroppa ca ka ke nefo qeeda ka hawlaaw.”

¹⁰ Isheetta ka a isiqara in upnin mali loqqaadi kela' pi'ite ka toote. Xayyoolaytase ka ete kullinooyye, isheetta a toote akke ka qeede ka diirtase' xaadi kapa'ew isheetta hawle.

¹¹ Tika Kiristaana isho orra sede dakaye piisa ka harmo' fuure.

Erkamampaya akka wa orra qawwanna isho daxxowwa koden

¹² Erkamampaya wa orra qawwanna isho daxxowwa lekaya otanta samayta oppa' kooni; orra amanno piisa ka karitta takkan silayta Selomooni kelopa ollopa anni.

¹³ Orra ishootta oppa in qapnini oppaayye, nama ishootta quda kodda' maxanyummo takka nefo in co. A koddito ma samayta, i'ishootta ulfeessini.

¹⁴ Diira isho iskatta a Poqalla amanno dikootaaysho akata qara koopaanneew anni.

¹⁵ Orra ka paaqolaya lekaya porra kapopa sookinni ka qoolla isho shabbada qara' mukinni. Wa malla asse koonaanne' nefo, oto Peetiroosi eeppa desa tarpinooyye, qoota kaattillaytaadi nefo paaqolaya demo qara pi'o malla.

¹⁶ Orra ka katamadda Yursaalami kapan desa ca oppaayye, paaqolayaasso isho a hapurra nenneeqaatin payyahana ollopan deeni, Piisa ka dinni.

Akka pora daanamitta erakamampaya qara' xa'e

¹⁷ Qeesittase kutta isho isasene Saatuqaatoppa ca ka isha quda kodde yootanne immakaaden ka erkamampaya qara' xa'en.

¹⁸ Ka ishootta qapen ka tika hida a samayta karopa ishootta kalshen.

¹⁹ Erkampattoota Waaqa' xoori halkeettiiyyi xarrada a tikase a hida' pante ka kara ishootta sookisse.

²⁰ Ka ishootta' kiite, “Aana! ka tika qulqulloota' kela' qa'ada ka qaalese a caattoseti piisa samayta' lela!”

²¹ Erkamampayasene ka ajajase teyyaden ka paraappan tika qulqulloota kelopa kullen ka kollissa paayyen. Sitiiyyi qeesittase kutta isho isasene isha olli ca ka de'en ka firtishoonkota isho qimoota a Yihuta piisa takka ollopa halen ka akka erkamampayaan de'ane'e, tika hida opa orra erken.

²² Mattiyyasene a tooytampaya ka tikase a hida opa aanene ka eeyye erkamampayasene dapen. Ka alle tiitaawen ka ishootta' lelen.

²³ Ka ishootta' lelen ka kidene “Xarra tika hida fayya'e qulfame; tooytampaya nefo ka xarra tura qaqqa'aden anka akkine ma xoori eten xarrase a tika hida' panneeyye, nama takka' nefo kela an teyne.”

²⁴ Ajajampaytase a tooytampaya tika qulqulloota isho saarrasene a qeesewwa ete sede dakayeneeyye, tura'e ollin patte; ikka kidene, “Ka kuli sede maana koddita?”

²⁵ Sitiiyyi nama takka ka de'e ka ishootta' lele ka kide, “Ha orrase a ishina' tika hida kelopa kalissen, tin paapaha tika qulqulloota oppa'e qaqqa'aden ka eyyeeyye orra kollinni.”

²⁶ Saarase a tooytampaya tika qulqulloota isho orxayaadi ka ennoow aanen ka ishoottan de'en. Akka samayta dakaan ishootta in dakkinini'i qoota fuuren malla, ete ishootta qeennaaneeyye, irreetan ishootta in qapne ma, naappattaanne qeeden.

²⁷ Ka ishoottan de'en ka firtishoonkota tura ishootta qa'atishen, qeesittase kutta ka ishootta kaassade ka kide,

²⁸ “Akka' maxxa Yesuusi a' xa'innin ka orra a kollinnini'i, fayya'en ishin ajajne, ishina' xoori tin kollissaayshinanne Yursaalami immakten ka akkan toota namooseti minan kaassatammo' faanittan.”

²⁹ Peetiroosi isho erkamampayasene ata hase ka oorshen ka ishootta' kidene, “An nama ajajammo kapa an Waaqa ajajamo ino parpaaccisni.

³⁰ Waaqase a aappadaannoti, Yesuusise a ishina qoyra qara' fannisten ka ikassene tootoppa xaashe.

³¹ Waaqa akka samayta Isira'eeliti juppootoppa ooreta ka haseenta juppoota' daasho'e, Yesuusi mattitta ka dinshampayta kode ka akka akkittaadi ulfeenan kuti'o' kode.

³² Qootoseti desa ino kan an maakkiyya. Hapurase a Qulqulloota a Waaqa orra ishi ajajammo daashe nefo maakkittaaw.”

³³ Orrase a firtishoonkota, ete sede dakayeeyye, harmo'e miirode ka erkamampaya lessaata fade.

³⁴ Ma xoori Feresitta takka Kemaaliyaali kidammo firtishoonkotoppa takka kodde ka kollissampayta seera' kodde ka samaytoppa ulfeessame qa'ade ka akka eta shakkaya erkamampaya qinda' desa kiishane' ajaje.

³⁵ Ka sekkammaayye orrase a firtishoonkotati' kide, “Ishina orra Isira'eelitiiyyi, wa orrose' qara koonittaneeti desa isi tooytaada.

³⁶ Se turanne nama takka Tewodaasi kidammo xa'e ka kide, ‘Anti an nama kutta.’ Nama dippa afur mina co ka isha quda kodde. Ma xoori, isha i'ishshame, orrase isha quda kodde piisa ka pase, Waadi piisa ka paten.

³⁷ Sekkammaayyeew parase oppa samayta dikeneeyye, Yihuta Kelilittase ka xa'ew. Ka orra lekayta iskamma' qeedeew. Isha ka ishshameew, orrase' xaadi piisa ka paseew.

³⁸ Semmalla amma anti waan ishina' kiina, orrose kapa sekaada ka alle ishootta diisha. Dikattoose isho kodoose oton a namatiiyyi, issinni pata.

³⁹ Oton xoori, a Waaqatiiyyi, ishootta patissa a ettanissan ma laadi Waaqa oli pireeta ishin qara' koddita.”

⁴⁰ Ishootta ka dehaamase a Kemaaliyaali teyyaden. Ka erkamampayasene isi kapopa halen ka karafsiisen ka akka maxxa Yesuusi haleetan in haasawannini'i, ajajen ka furen.

⁴¹ Erkamampayasene' xoori qoota maxxa Yesuusi malla jeera teyyattaappa kayen malla, xasoottaanne firtishoonkotase tura sooken ka tawen.

⁴² Umma kuyyaata mina'e tika qulqulloota isho tikka kara qoota Yesuusi Kiristoosi desa kollissa ka otootase a fayya torreeta in qaatinne.