Kodampaya 4 - Mataafa Qulqulloota

Peetiroosi isho Yohaannisi akka firtishoonkota Yihuta' turopa dehaaden

¹ Ete Peetiroosi isho Yohaannisi samayta' haasawattaappa caaneeyye, qeesewwa ka saarra a tooytampayasene a tika qulqulloota isho Saatuqaata ishootta kapopa de'en ka

² qoota erkamampayasene tootoppa xaana Yesuusi samayta kollishen ka se minan akka tootoppa xaana caan la'ayshen malla miiroden.

³ Ka ishootta qapen ka qoota letta halkeettaawte malla, haka parraytaaditi akka tika hida' kara' jarane' koden.

⁴ Ma xoori orra qaaletaaysho' dakaye oppaayye lekaya amane; lekumta a orra amaneeti ka kuma ken opeela padaawamte.

⁵ Parraytaadiiyyi saarra a Yihuta qimoota isho kollissampaya a seera Yursaalami karopa olopa aanen.

⁶ Orrase ollopa aane oppaayye qeesittase kutta Haanna ka Qayyaaffa ka Yohaannisi ka Iskintiroosi isho toola qeesitta kutta oppa orra a de'e nefo eeyye ca.

⁷ Ishootta ka erkamampayasene lakki otantaaysho oppa' qaatishen ka ishootta kaassaden ka kidene, “Wessen a' kootene hupna maana isho maxxa aynonne' kooten?”

⁸ Sitiiyyi Peetiroosi ka Hapura Qulqullootatin immakaade ka ishootta' oorshe ka kide, “Ishina saarra samayta isho qimooteeyye,

⁹ ino awwe koda paxaara a toonnayta takka kodde ka atta akkima dine mallan kaassatamminna,

¹⁰ namoose wa ishin dine ka fuulaayshin tura' qa'ade, maxxa Yesuusi Kiristoosise a Naasireti, isase a ishina' fannisten Waaqa ka tootoppa isha xaashenne, akkima koddite, ishin piisa'e ka samayta Isira'eeli piisa'e, a upnaysamte a koddito.

¹¹ Ha isha dakaase a' ishina harmoota a qupeetati tuffatten ka alle' katten; Ma xoori isha matta qeppeellitta'e kodde.

¹² Semmalla dina isha mali nama pila takka nefon in co. Maana malla, maxxa an ishin dinno, a Waaqa orra' daashe kaaskeella piisa qara isha mali takka nefo in cooy.”

¹³ Orra firtishoonkota ete akkima Peetiroosi isho Yohaannisi maxanyumaan haasawaden akkeneeyye, akka orra an tamaarrin ka xaaysho qara' co kodden, qoota upnaaden malla, oppa'e qawwaawen. Ka akkima turan Yesuusi olli caan upnaaden.

¹⁴ Ka qoota namase dine ishootta kapa qa'anno ikka akken malla, wa kidane dapen.

¹⁵ Ka shonkootase oppa xawwi' desa ishootta mayshen ka olli oorsaden ka kidene,

¹⁶ “Ka kuli attan orrose' koona? Wossen orra qawwanna kutta akka harkaaysho oppa' kodden, orra a Yursaalami kara kalo piisa upnaadeey, semmalla marmatta an ettaninno.

¹⁷ Ma xoori akka kollissoose samaytoppa' paldaattaan in anninini'i, arepa desa akka maxxa Yesuusi haleetan nama takka nefo in haasawannini'i, tura desa ishootta' lella.”

¹⁸ Ka sekamma ishootta halen ka akka lammatta maxxa Yesuusi in haleenin ka ishin in haasawannin ka in kollinnini'i, kokkonnayahen ka ishootta ajajen.

¹⁹ Peetiroosi isho Yohaannisi xoori i'ishootta' oorshen ka kidene, “Waaqa ajajama kapaayye ishina ajajameeta hela fuula Waaqa turaayye iparpaaccisni? Intoonno ishina'ew mattaayshina' farataay.

²⁰ Ma ino waan akkine ka dakayne haasawata diissata an ettaninno.”

²¹ Saarra a samayta isho firtishoonkota qoota wa minan Peetiroosi isho Yohaannisi qatta'amane dapen ka samayta fuuren malla, oppa'ew ooren ka turadesa ishootta' lelen ka ishootta furen, Sede nefo wa malla asse kodene, qoota samayta wa kodde malla Waaqa kalataysanno malla.

²² Namoose wossen orra qawwannaatin dine, paraadi kunda afur qaropa ca.

Qinseeta a erkamampaya isho orra amanno daanamittoppa qinsade

²³ Peetiroosi isho Yohaannisi ete furamen ka orraaysho oppopa tiitaaweneeyye, wa a saarra qeesewwa isho qimoota Yihuta ishootta' kidene piisa ishootta' lelen.

²⁴ Ishootta ka ete sede dakayeneeyye, takka nessaaysho kuttishen ka Waaqopa qinsaden ka kidene, “Waaqqo! ke a piisa qaropeela qapo ka moonta ka piita ka pakateeta isho wa kara ca piisa uume.

²⁵ Hapura Qulqullootatin ke afaa aappinno a Taawwti isase orxaytaayti kodde oppan haasawade ka kide, ‘Orra Waaqa amanni in kinnin maana'e miirode? Ata orra maana'e patta paata sule?

²⁶ Nuqussa piita takka'e oli qapen, piddampaya piita ka takka ollopa ooren. Ka Poqalla isho Kiristoosi qara' xa'en.’

²⁷ “Dukaatan Herodiisi isho Pilatoosi Pentenittase samayta a Waaqa amanni in kinnin isho a Isira'eeleta ollin katamoosen karopa ollopa de'en. Ka Yesuusi orxaytase' xaayti qulqullaawe, Kiristoosi qara' xa'en.

²⁸ Sede nefo wa malla asse koddite, wa sene a' xatta hupnaayti ka heennaattin koda' qapatte akka dikkadan malla.

²⁹ Amma nefo poqallaay, atti nyaraasso' tooye ka akka orxayaatti fuura mali qaaletaayyti maxanyumaan torraanne' kode.

³⁰ Maxxa a Yesuusi a innasene xaayti a qulqullittatinni paaqolaya akka dinan ka wa orra qawwanna isho daxxowwa akka koddanne'e, hupnaayti akkishe.”

³¹ Ete qinseeta diikkishen kammaayye, porase a oppa ollin caan ka lellehe. Ikka piisani Hapura Qulqullootatin immakaaden ka fuura mali qaaleta Waaqa maxanyumaan torren.

Orra amane a paayyota akka takkumtan kallaade

³² Orra amanno piisa karitta takka ka dikatta takka qapa, Umma nama takka nefo wa issi kiina'e, “Ini xayyo,” In qapo. Otantaaysho oppa we qapane' piisa a olturatta'ew.

³³ Erkamampaya ka tootoppa xaana a poqalla Yesuusi hupna kuttan maakkummi, Piisa qaraayye daassata Waaqa a kutta ka kitta.

³⁴ A piita taaki tikka qapa piisa qoota kannaan ka kaajaan deenaan malla, ishootta oppa rakkatampayta takka nefo in co.

³⁵ Ka kaajaan deeni ka erkamampaya' kalinni. Ikka nama takka takka'e, akka parpaaccisnitto mina' qootammi.

³⁶ Lawitta takka Yoosefi kidammo, qobbiroosi delade ka ca. Erkamampaya ka isha haleeni ka kiini, “Parnapaasi” Se kideese nefo, “Inna a xasan oorsadene” Kideeta.

³⁷ Isha' nefo piitaadi kate ka kaajaan de'e ka erkamampaya' kalshe.