Kodampaya 3 - Mataafa Qulqulloota

Akka toonnayta takka' dine

¹ Kuyyaata takkaayye Peetiroosi isho Yohaannisi eta a qinseetati saateta sakal qaraayye, tika qulqulloota opa aanen.

² Eeyyeeyye xarra takka “Paxaarnayta” kidammo ca. Orra ka kuyyaata mina'e, nama takka a delade paayyite toonnaawen eyyepa deeni ka eeyye' isha kuti'inni. Isha ka eyye' kutiini ka orra tika qulqulloota kelopa deeno qaraayye, paata qinsanni;

³ namoose ete Peetiroosi isho Yohaannisi a tika qulqulloota opa kullina akke ka ishootta qaraayye kaaja qinsanni.

⁴ Ishootta ka isha quda ilda koden. Peetiroosi ka ishi' kide, “Inopa tooyyado.”

⁵ Isha ka a kaaja ishi' daashanen upnaade ka ishootta opa tooyyade.

⁶ Peetiroosi xoori i'ishi' kide, “Anti Pirreeta isho Warqeeta an qapo” Ma, wa an qapa in ke' daasha: Maxxa Yesuusi Kiristoosi a Naasiratiitin xa'e ka pora aane.”

⁷ Ka harkaadi a akkitta' tupa' qape ka isha xaashe. Loqqaadi isho mommoqtowwaadi ka eennoow kokkonnaaden.

⁸ Ikka xa'e ka qa'ade. Ka pora anni ka ishootta olli tikase a qulqulloota kelopa kulle. Ka pora anni ka shoshshorri ka Waaqa kalataysanni.

⁹ Orra piisa ka a pora anno ka Waaqa kalataysannooyye isha akke.

¹⁰ Ka akka namase tika qulqulloota turaayye, porase “Xarra paxaara” kidammo oppa' kutiino ka paata qinsanno kodde upnaaden. Ka wa isha qara' kodde minan oppa' qawwaawni ka daxxini.

Haasa Peetiroosi tika qulqulloota' kela' haasawade

¹¹ Namase dine, ete kide, “Peetiroosi isho Yohaannisi qudaayye an poqqo” ka ishootta quda' kokeeyye; orra oppa'e ollin qawwaawe ka pora takka “Shaakka Selemooni” kidammo opa ishootta kapopa hirittan aane.

¹² Peetiroosi ka ete orrase akkeeyye ishootta' kide, “Ishina orra Isira'eelitiiyyi, maana'e sede oppa' qawwaawnittan ka maana' ino quda ilda kooten? Hela takka an ino hupninnon taaki kodinno a paxaaran namoose akka aano' koone ishina' pahanaatte?

¹³ Waaqase a aappadaannoti, a Aprihaami ka a Hisaaqi ka a Yayqoopi, isha innaadi Yesuusi ulfeesse; ishina' xoori Pilatoosi tura'e isha tarpissen ka daassen ka ete Pilaatoosi isha fureeta fadeeyye tiitten.

¹⁴ Ishina qulqullittase ka hanqeellittaseti'i' kiitene ‘An isha an heenno;’ Ka takka nama ishshe akka ishina' furamo naappatten.

¹⁵ Ka isase caatta daanno ikassen, Waaqa xoori tootoppa isha xaashe. Qootoseti desa ino an maakkiyya.

¹⁶ Namoose a uptan ka quda tooynittan, amanteetase maxxa Yesuusi qudan teyattenne dine ka kokkonnaade ka qoota maxxa Yesuusi amane malla ishin piisa tura' fayya' dine.

¹⁷ “Amma nefoow, hellaannooyye! Wa a Yesuusi qara' kootene a saarraassina mina akka a upnin mali kooten in upa.

¹⁸ Waaqa xoori, akka turan qattishe ka afa xuumampaya pisa oppa' kide, ‘Kiristoosise rakkoota akkatta isha faani’ mina'e, akka asse dikkatto' kode.

¹⁹ Semmalla akka juppootaayshin ishina' hasto'e alle juppootaayshin oppaayye oora ka Poqallaapa tiitaawa.

²⁰ Waaqa kapaayye sapana a oppa harmisamtane ishina' de'aay, Waaqa ka Yesuusi dinshampaytase a turan ishina' reexe ishina' erkaay.

²¹ Akkima Waaqa xattaaw afaa xuumampayaadi a qulqullaawe oppan haasawade mina'e, isha haka eta a piita piisa harmisammitto kaynitto kara'e, moonta' jara;

²² Muuse ikide, ‘Waaqa Poqallaassin, akkima ana xaashe mina'e, hellaassin a diira oppaayye xuumampayta ishina' xaashaay, wa isha ishina' kiina piisa dakaya.

²³ Nama xuumampaytose dakayni in kinnin piisa, samaytoppaayye alle' seerama ka pata.’

²⁴ Kamma' desaaw, Saamu'eliiyyi paayyatte xuumampaya piisa ka qoota sapanooseti desa asseew haasawaden.

²⁵ Ishina, a' lehampaya xuumampaya ka akkimoose mina'ew, a' lehampaya kodayteetase a Waaqa aappadaanno olli kodade ka Aprihaami kide'e, ‘Orra piita qara co piisa sanynyeetaaytin eeppisama.’

²⁶ Semmalla Waaqa innaadi paayyota qara ishina' erke; sede nefo akka saantaayshin a neeqa qara ishin oorsho ka ishina' sako malla asse kode.”